ଭି.ଡି ସତୀଶନ କେରଳମର ନୂଆ ମୁଖ୍ୟମନ୍ତ୍ରୀ ଭାବେ ଆଜି ଶପଥ ନେଇଛନ୍ତି । ତାଙ୍କୁ କେରଳର ରାଜ୍ୟପାଳ ବିଶ୍ଵନାଥ ଆର୍ଲେକର ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି । କେରଳର ଦେଶର ସାକ୍ଷର ଦେଶମାନଙ୍କ ମଧ୍ୟରେ ତୃତୀୟ ସ୍ଥାନରେ ଥିବାବେଳେ ଏବେ ଲୋକଙ୍କ ମନରେ ପ୍ରଶ୍ନ ଯେ ଶିକ୍ଷିତ ରାଜ୍ୟର ମୁଖ୍ୟମନ୍ତ୍ରୀ କେତେ ପାଠ ପଢିଛନ୍ତି । ୧୯୬୪ରେ କୋଚି ନିକଟ ନେଟ୍ଟୁରରେ ଜନ୍ମ ନେଇଥିବା ସତୀଶନ ପେଶାରେ ଜଣେ ଓକିଲ ଏବଂ ବେଶ ଉଚ୍ଚଶିକ୍ଷିତ ।

କେରଳମର ନୂଆ ମୁଖ୍ୟମନ୍ତ୍ରୀ ଭି.ଡି ସତୀଶନ ପାଠପଢାରେ ବେଶ ଆଗରେ ଥିଲେ । ସେ ଥିରୁଅନନ୍ତପୁରମର କେରଳ ଲ' ଏକାଡେମୀର ଆଇନ ପାଠ ପଢି ଏଲଏଲବି ହାସଲ କରିଛନ୍ତି । ଏହାପରେ ସେ ସରକାରୀ ଆଇନ କଲେଜରେ ଏଲଏଲଏମ ଅର୍ଥାତ୍ ଆଇନ ଡିଗ୍ରୀରେ ସ୍ନାତକୋତ୍ତର ହାସଲ କରିଛନ୍ତି । ସେ ରାଜନୀତିରେ ପାଦ ଥାପିବା ପୂର୍ବରୁ କୋର୍ଟରେ ଜଣେ ପେଶାଦାର ଓକିଲ ଭାବେ କାମ କରୁଥିଲେ । ବର୍ଷ ୨୦୦୧ରେ ଏର୍ଣ୍ଣାକୁଲମ ଜିଲ୍ଲାର ଉତ୍ତର ପରାଭୁରରେ ପ୍ରଥମ ଥର ବିଧାୟକ ହେବା ପୂର୍ବରୁ ସେ କେରଳ ହାଇକୋର୍ଟରେ ନିଜର ଆଇନ ଅଭ୍ୟାସ କରୁଥିଲେ ।

• ଛାତ୍ର ରାଜନୀତିରୁ ମୁଖ୍ୟମନ୍ତ୍ରୀ

ସତୀଶନଙ୍କ ରାଜନୈତିକ କ୍ୟାରିଅର କଲେଜ ସମୟରୁ ଜଣେ ଛାତ୍ର ନେତା ଭାବେ ଆରମ୍ଭ ହୋଇଥିଲା । ସେ ବର୍ଷ ୧୯୮୬-୧୯୮୭ରେ ମହାତ୍ମା ଗାନ୍ଧୀ ୟୁନିଭର୍ସିଟି ୟୁନିଅନର ଚେୟାରମ୍ୟାନ ହୋଇଥିଲେ ଏବଂ ସେ NSUIର ଜାତୀୟ ଏବଂ ରାଜ୍ୟ ସଚିବ ଭାବେ ମଧ୍ୟ କାମ କରିଛନ୍ତି ।

• କେତେ ସମ୍ପତ୍ତି ରଖିଛନ୍ତି ସତୀଶନ ?

ନିର୍ବାଚନ ଆୟୋଗଙ୍କୁ ଦେଇଥିବା ତଥ୍ୟ ଅନୁସାରେ, ଭି.ଡି ସତୀଶନ ଏବଂ ତାଙ୍କ ପତ୍ନୀ ଲକ୍ଷ୍ମୀ ପ୍ରିୟାଙ୍କର ମୋଟ ୫.୬ କୋଟିର ସମ୍ପତ୍ତି ଅଛି । ଏହି ସଂଖ୍ୟାରେ ସ୍ଵାମୀ ସ୍ତ୍ରୀଙ୍କର ମୋଟ ସ୍ଥାବର ଓ ଅସ୍ଥାବର ସମ୍ପତ୍ତି ବି ସାମିଲ । କେରଳମର ମୁଖ୍ୟମନ୍ତ୍ରୀ ସତୀଶନଙ୍କ ଝିଅ ମଧ୍ୟ ଲକ୍ଷ ଲକ୍ଷ ସମ୍ପତ୍ତିର ମାଲିକାଣୀ । ତାଙ୍କ ନିକଟରେ ୯,୬୧,୪୭୪ ଟଙ୍କାର ସମ୍ପତ୍ତି ଅଛି । ଏଥିରେ ତାଙ୍କ ନିକଟରେ ବର୍ଷ ୨୦୨୨ ମଡେଲର ଏକ ଭକ୍ସୱାଗେନ ଟାଇଗୁନ କାର ସାମିଲ ।

ପଢନ୍ତୁ ଏହି ଖବର: କେରଳମରେ କଂଗ୍ରେସର ନୂଆ ସରକାର: ଶପଥ ନେଲେ ଭି.ଡି ସତୀଶନ

କୋଟି କୋଟି ସମ୍ପତ୍ତିର ମାଲିକ ହେବା ସତ୍ତ୍ଵେ ମୁଖ୍ୟମନ୍ତ୍ରୀ ସତୀଶନ ଋଣ ମଧ୍ୟ କରିଛନ୍ତି । ନିର୍ବାଚନ ଆୟୋଗଙ୍କୁ ଦେଇଥିବା ତଥ୍ୟ ଅନୁସାରେ, ସେ ପ୍ରାୟ ୨୪ ଲକ୍ଷ ଟଙ୍କାର ଋଣ କରିଛନ୍ତି, ଯେଉଁଥିରେ କାର ଲାଗି ପ୍ରାୟ ୩.୨୯ ଲକ୍ଷ ଟଙ୍କା ଋଣ ଓ ଅନ୍ୟ ବ୍ୟାଙ୍କର ଋଣ ସାମିଲ ।