Nuapada By Election / ନୂଆପଡ଼ା ରାଜନୀତିରେ ନୂଆ ସମୀକରଣ, ପଦ୍ମ ଧରିଲେ ଲମ୍ବୋଧର ନିଆଲ

ନୂଆପଡ଼ା ରାଜନୀତିରେ ନୂଆ ସମୀକରଣ । ଉପନିର୍ବାଚନ ପୂର୍ବରୁ ବିଜେଡିକୁ ବଡ଼ ଝଟକା । ଶଙ୍ଖ ଛାଡ଼ି ପଦ୍ମ ଧରିଲେ ଲମ୍ବୋଦର ନିଆଲ । ବିଜେପି ରାଜ୍ୟ ସଭାପତି ମନମୋହନ ସାମଲ ଓ ପରିବହନ ମନ୍ତ୍ରୀ ବିଭୂତି ଜେନାଙ୍କ ଉପସ୍ଥିତିରେ ଲମ୍ବୋଦର ନିଆଲ ବିଜେପିରେ ସାମିଲ ହୋଇଛନ୍ତି । ୨୦୨୪ ସାଧାରଣ ନିର୍ବାଚନରେ ସେ ବିଜେଡି ଟିକେଟରୁ କଳାହାଣ୍ଡି ଲୋକସଭା ଆସନରୁ ନିର୍ବାଚନ ଲଢ଼ିଥିଲେ । ବିଜେଡିର ପ୍ରାଥମିକ ସଦସ୍ୟ ପଦରୁ ଇସ୍ତଫା ନେଇ ସେ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କୁ ଚିଠି ଲେଖି ଜଣାଇଛନ୍ତି ।

ତେବେ ଆଜି ସକାଳୁ ବିଜେପି ପ୍ରାର୍ଥୀ ଜୟ ଢୋଲକିଆଙ୍କ ଘରେ ବିଜେଡି ନେତା ଲମ୍ବୋଦର ନିଆଲଙ୍କୁ ଦେଖିବାକୁ ମିଳିଥିଲା । ଏହା ପରଠୁ ହିଁ ଚର୍ଚ୍ଚା ହେଉଥିଲା ବିଜେଡି ରାଜ୍ୟ ସାଧାରଣ ସମ୍ପାଦକ ଥିବା ଲମ୍ବୋଧର ବିଜେପିରେ ଯୋଗ ଦେଇପାରନ୍ତି । ୨୦୨୪ ସାଧାରଣ ନିର୍ବାଚନରେ ବିଜେଡିର କଳାହାଣ୍ଡି ସାଂସଦ ପ୍ରାର୍ଥୀ ଥିଲେ ଲମ୍ବୋଧର । ସେ ଦୁଇ ଥର ଖଡ଼ିଆଲା ନିର୍ବାଚନ ମଣ୍ଡଳୀରୁ ମଧ୍ୟ ବିଜେଡି ପ୍ରାର୍ଥୀ ହୋଇଥିଲେ । ଉତ୍କଳ ଯାଦବ ମହାସଭାର ବରିଷ୍ଠ ନେତା ହେଉଛନ୍ତି ଲମ୍ବୋଧର ନିଆଲ ।