BJD Equidistance Policy / CJPକୁ ସମର୍ଥନ ପରେ ପ୍ରଶ୍ନଘେରରେ ବିଜେଡି, 'ସମଦୂରତା' ନୀତିକୁ ନେଇ ରାଜନୀତିରେ ଜୋରଧରିଲା ଚର୍ଚ୍ଚା

CJP ସମର୍ଥନକୁ ନେଇ ସନ୍ଦେହ ଘେରରେ ବିଜେଡିର ସମଦୂରତା ନୀତି । କେତେବେଳେ ଇଣ୍ଡିଆ ମେଣ୍ଟର ପ୍ରତିବାଦରେ ସାମିଲ, କେତେବେଳେ ସମଦୂରତାର ବୟାନ, ତ ଆଉ କେତେବେଳେ କକରୋଚ୍ ଜନତା ପାର୍ଟି ସମର୍ଥନରେ ନବୀନ । କେନ୍ଦ୍ର ରାଜନୀତିରେ ବିଜେଡି ସୁପ୍ରିମୋଙ୍କ ବଦଳୁଥିବା ଆଭିମୁଖ୍ୟକୁ ନେଇ ଏବେ ରାଜ୍ୟ ରାଜନୀତି ଜୋର ଧରିଛି ଚର୍ଚ୍ଚା । ସୌରଭ ଦାସ ଓ ଆଶୁତୋଷ ରାଙ୍କାଙ୍କ ପାଇଁ ନ୍ୟାୟ ଦାବି କରି ନବୀନ ପୋଷ୍ଟ କରିବା ପରେ ବିଜେପି ଓ କଂଗ୍ରେସ ଆରମ୍ଭ କରିଛନ୍ତି କଡ଼ା ପ୍ରହାର । ବିଜେଡି ଦିଶାହୀନ ହୋଇପଡ଼ିଥିବା ବିଜେପି କହିଥିବା ବେଳେ, ଚାପରେ ନରହି ସ୍ପଷ୍ଟୀକରଣ ଦେବାକୁ ଦାବି କରିଛି କଂଗ୍ରେସ ।

କେତେବେଳେ ଇଣ୍ଡିଆ ମେଣ୍ଟ ପ୍ରତିବାଦରେ ସାମିଲ, କେତେବେଳେ ସମଦୂରତା ବୟାନ ତ ଆଉ କେତେବେଳେ କକରୋଚ୍ ଜନତା ପାର୍ଟି ସମର୍ଥନରେ ବିଜେଡି । କେନ୍ଦ୍ର ରାଜନୀତିରେ ନବୀନଙ୍କ ରୂପ ବଦଳା ଆଭିମୁଖ୍ୟକୁ ନେଇ ଜୋର ଧରିଛି ଚର୍ଚ୍ଚା । ଗତକାଲି ସୌରଭ ଦାସ ଓ ଆଶୁତୋଷ ରଙ୍କାଙ୍କ ପାଇଁ ନ୍ୟାୟ ଦାବି କରି ସୋସିଆଲ ମିଡ଼ିଆ `X' ରେ ପୋଷ୍ଟ କରିଥିଲେ ବିଜେଡି ସୁପ୍ରିମୋ । ଆଜି ନବୀନଙ୍କ ଆଭିମୁଖ୍ୟ ଉପରେ ପ୍ରଶ୍ନ ଉଠାଇ କଡ଼ା ସମାଲୋଚନା କରିଛନ୍ତି ରାଜ୍ୟ ବିଜେପି ସଭାପତି ମନମୋହନ ସାମଲ । ବିଜେଡି ନେତା ଦିଶାହୀନ ହୋଇ ବୁଲୁଥିବା ବେଳେ ଅରାଷ୍ଟ୍ରୀୟ ଶକ୍ତିକୁ କେବେ ରାଜ୍ୟବାସୀ ସମର୍ଥନ କରିବେ ନାହିଁ ବୋଲି କହିଛନ୍ତି ମନମୋହନ । ସେପଟେ କଂଗ୍ରେସ କହିଛି ଚାପରେ ନ ରହି ଆଭିମୁଖ୍ୟ ସ୍ପଷ୍ଟ କରନ୍ତୁ ନବୀନ । ବିଜେଡିର ମତ ଦଳ ଏବେ ବି ସମଦୂରତାରେ ଅଛି ।

ରାଜ୍ୟସଭା ନିର୍ବାଚନ ବେଳେ କଂଗ୍ରେସ ସହ ମିଶି ଏକାଠି ପ୍ରାର୍ଥୀ ଦେବାଠାରୁ ବିଜେଡି ଆଭିମୁଖ୍ୟ ନେଇ ଦ୍ଵନ୍ଦ୍ବ ସୃଷ୍ଟି ହୋଇଛି । କିଛି ଦିନ ତଳେ ନିର୍ବାଚନ କମିଶନଙ୍କ ଉପରେ ପ୍ରଶ୍ନ ଉଠାଇ ଦିଲ୍ଲୀରେ ଇଣ୍ଡିଆ ମେଣ୍ଟ ସହ ସାମିଲ ହୋଇଥିଲା ବିଜେଡି । ହେଲେ ଦୁଇ ଦିନ ପରେ ହଠାତ ଦଳର ଷ୍ଟାଣ୍ଡ ବଦଳିଲା । ସମଦୂରତା କଥା କହି ଓଡ଼ିଶା ବନ୍ଦ ବେଳେ ଇଣ୍ଡି ମେଣ୍ଟଠାରୁ ଦୂରେଇ ରହିଲା ବିଜେଡି । ଏବେ CJP ସହ ଇଣ୍ଡି ମେଣ୍ଟ ସାମିଲ ହୋଇଥିବା ବେଳେ ବହୁ ଥିବା ଗଙ୍ଗାରେ ହାତ ଧୋଇ ଅସ୍ତିତ୍ୱ ବଞ୍ଚାଇବାକୁ ଚାଁହୁନାହିଁ ତ ବିଜେଡି ?

ନିକଟରେ ହୋଇଥିବା ଛାତ୍ର ସଂସଦ ନିର୍ବାଚନ ଥିଲା ବିଜେଡି ପାଇଁ ଏସିଡ ଟେଷ୍ଟ । ଯେଉଁଥିରେ କିଛି କଲେଜରେ ସ୍ଥିତି ଜାହିର କରିଥିଲେ ବି ଏବିଭିପିଠାରୁ ଅଧିକାଂଶ କଲେଜ ଓ ବିଶ୍ବବିଦ୍ୟାଳୟରେ ମାତ ଖାଇଛି ନବୀନଙ୍କ ଦଳ । ଆଗକୁ ପଂଚାୟତ ଓ ପୌର ପରୀକ୍ଷା । ତେଣୁ ନବୀନଙ୍କ ଜେନ ଜି ପଲିଟିକ୍ସ ଦଳକୁ ନିର୍ବାଚନୀ ବୈତରଣୀ ପାର କରାଇବାରେ କେତେ ସହାୟକ ହେଉଛି ତାହା ଉପରେ ନଜର ।