ଦଳୀୟ ଅସନ୍ତୋଷର ନିଆଁକୁ ଲିଭାଇବାକୁ ଆକ୍ସନ ମୋଡ୍‌ରେ ବିଜେଡି ସୁପ୍ରିମୋ । ଅସନ୍ତୁଷ୍ଟ ନେତାଙ୍କୁ ମ୍ୟାନେଜ୍ କରିବା ପାଇଁ ନବୀନ ନିବାସରେ ବସିଥିଲା ଏକ ଗୁରୁତ୍ୱପୂର୍ଣ୍ଣ ରୁଦ୍ଧଦ୍ୱାର ବୈଠକ । ୨୪ ନିର୍ବାଚନରେ ପରାଜିତ ନେତାଙ୍କୁ ଡାକି ଦୀର୍ଘ ଦୁଇ ଘଣ୍ଟା ଧରି ଆଲୋଚନା କରିଛନ୍ତି ବିଜେଡି ମୁଖିଆ । ସୁଜାତା କାର୍ତ୍ତିକେୟନଙ୍କ ଏଣ୍ଟ୍ରି ଚର୍ଚ୍ଚା ଓ ପାଣ୍ଡିଆନଙ୍କୁ ନେଇ ଦଳ ଭିତରେ ଦ୍ୱିମତ ପ୍ରକାଶ ପାଇଥିବା ବେଳେ, ନେତାଙ୍କ ମନୋବଳ ବଢ଼ାଇବାକୁ ନବୀନ ନିଜେ ଏବେ ଜିଲ୍ଲା ଗସ୍ତ କରିବେ ବୋଲି ଆଶ୍ୱାସନା ଦେଇଛନ୍ତି ।

୨୪ ସାଧାରଣ ନିର୍ବାଚନର ଦୁଇ ବର୍ଷ ପରେ ଫେଲ୍ ମାରିଥିବା ନେତାଙ୍କୁ ଡାକି ବୈଠକ ନେଲେ ବିଜେଡି ସୁପ୍ରିମୋ । ଏଥର ନେତା କହିଲେ ଆଉ ନବୀନ ଶୁଣିଲେ । ପ୍ରାୟ ଦୁଇ ଘଣ୍ଟା ଧରି ଚାଲିଥିବା ବୈଠକରେ ପଞ୍ଚାୟତ ଓ ପୌର ନିର୍ବାଚନ ପାଇଁ ସଂଗଠନ ସୁଦୃଢ କରିବାକୁ ନେତାଙ୍କୁ କହିଲେ ମୁଖିଆ । SIR ରେ ନିଜ ସମର୍ଥକଙ୍କ ନାଁ କିପରି ନ କଟିବ ଜଗିବାକୁ ପରାମର୍ଶ ଦେଇଥିଲେ ନବୀନ । ଏହା ସହ ବିଜେଡି ଯୋଜନା ମନେ ପକାଇବା ଓ ବିଜେପି ସରକାରଙ୍କ ବିଫଳତାକୁ ଲୋକଙ୍କ ପାଖରେ ପହଁଞ୍ଚାଇବାକୁ ନବୀନ ଦେଇଛନ୍ତି ଟାସ୍କ ।

ମିଳିଥିବା ସୂଚନା ଅନୁସାରେ ପାଣ୍ଠି ଓ ସମନ୍ୱୟ ଅଭାବ ସହ ସୋସିଆଲ ମିଡିଆରେ ଦଳ ଦୁର୍ବଳ ହେଉଥିବା ନେଇ କିଛି ନେତା କ୍ଷୋଭ ପ୍ରକାଶ କରିଥିଲେ । ତେବେ ଜିଲ୍ଲା ବୁଲି ସଂଗଠନର ସମୀକ୍ଷା କରିବେ ବୋଲି ନବୀନ ନେତାଙ୍କୁ ଆଶ୍ବସନା ଦେଇଛନ୍ତି ।

ଦଳରେ ଗୋଟିଏ ପରେ ଗୋଟିଏ ନେତା ପଦ୍ମ ମୁହାଁ ହେଉଥିବା ବେଳେ ଶଙ୍ଖ ଶିବିର ଖାଲି ହେବାକୁ ବସିଲାଣି । ତେଣୁ ଚର୍ଚ୍ଚା ହେଉଛି ବୈଠକ କରି ନେତାଙ୍କ ମନୋବଳ ବଢ଼ାଇବାକୁ ଭରପୁର ଉଦ୍ୟମ କରିଛନ୍ତି ବିଜେଡି ମୁଖିଆ । ଏଇ ଯେମିତି ଦେବାଶିଷ ସାମନ୍ତରାୟଙ୍କ ଅତ୍ୟନ୍ତ ଘନିଷ୍ଠ ଚନ୍ଦ୍ର ସାରଥୀ ବେହେରାଙ୍କୁ ନବୀନ ନିବାସରୁ ଡାକରା ହୋଇଛି ।

ବଡ଼ କଥା ହେଉଛି ୨୪ ନିର୍ବାଚନରେ ବିଜେଡି ପରାଜୟ ପଛର ମୁଖ୍ୟ କାରଣ ପାଣ୍ଡିଆନ କୁହା ଯାଉଥିଲେ ବି ଏବେ ବି ଭୈରବଙ୍କୁ ପ୍ରଶଂସାରେ ପୋତି ପକାଉଛନ୍ତି କିଛି ବିଜେଡି ନେତା । ତେବେ ସୁଜାତାଙ୍କ ଏଣ୍ଟ୍ରି ଖବରକୁ ନେଇ ପୁଣି ଦଳରେ ଦେଖା ଯାଇଛି ଦ୍ବିମତ । ତେବେ ବିଜେଡିର ଉତ୍ତରାଧିକାରୀ ଓ ପାଣ୍ଡିଆନ ସର୍ବେସର୍ବାକୁ ନେଇ ଏବେ ବି ଦଳ ଭିତରେ କୁହୁଳୁଥିବା ନିଆଁ ଆଗକୁ କେଉଁ ମୋଡ଼ ନେଉଛି ତା ଉପରେ ରହିଛି ସମସ୍ତଙ୍କ ନଜର ।