ପଞ୍ଚାୟତ ଏବଂ ପୌର ନିର୍ବାଚନ ପାଇଁ ଆଗୁଆ ପ୍ରସ୍ତୁତି ଭିତରେ ସଙ୍ଗଠନକୁ ନୂଆ ବଳ ଦେବାକୁ ଓଡ଼ିଶା ଆସୁଛନ୍ତି ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ନୀତିନ ନବୀନ । ନୀତିନଙ୍କ ପ୍ରଥମ ଗସ୍ତକୁ ନେଇ ବେଶ ଉତ୍ସାହିତ ବିଜେପି କ୍ୟାମ୍ପ । ରାଷ୍ଟ୍ରୀୟ ଅଧ୍ୟକ୍ଷଙ୍କୁ ସ୍ଵାଗତ ପାଇଁ ବ୍ୟାପକ ପ୍ରସ୍ତୁତି କରୁଛି ବିଜେପି । ଦିନିକିଆ ଗସ୍ତ ଭିତରେ ରାଜ୍ୟ କାର୍ଯ୍ୟଳୟ ଆସି କୋର୍‌ କମିଟି ସହ ମନ୍ତ୍ରୀମାନଙ୍କ ସହ ବି ଆଲୋଚନା କରିବେ ନୂଆ ଅଧ୍ୟକ୍ଷ ।

ରାଜ୍ୟ ବିଜେପିକୁ ନୂଆ ମନ୍ତ୍ର ଦେବେ ନୂଆ ଅଧ୍ୟକ୍ଷ । ୧୮ରେ ଓଡ଼ିଶା ଆସୁଛନ୍ତି ନୀତିନ ନବୀନ । ନେତା ମନ୍ତ୍ରୀଙ୍କ ନେବେ କ୍ଲାସ । ରାଜ୍ୟ କାର୍ଯ୍ୟାଳୟରେ ମାନସ ମନ୍ଥନ କରିବେ ରାଷ୍ଟ୍ରୀୟ ଅଧ୍ୟକ୍ଷ । ଇ-ବାଇକ ରାଲି ଦ୍ଵାରା ଭବ୍ୟ ସ୍ଵାଗତ ସମ୍ଭର୍ଦ୍ଧନା ପାଇଁ ଚାଲିଛି ପ୍ରସ୍ତୁତି । ବିମାନ ବନ୍ଦରରୁ ବିଶାଳ ବାଇକ ରାଲିରେ ଜଟଣୀ ଅଭିମୁଖେ ଯିବେ ନୀତିନ ନବୀନ ।

ରାଷ୍ଟ୍ରୀୟ ଅଧ୍ୟକ୍ଷ ଭାବେ ଦାୟିତ୍ଵ ନେବା ପରେ ପ୍ରଥମ ଥର ଓଡ଼ିଶା ଗସ୍ତରେ ଆସୁଛନ୍ତି ନୀତିନ ନବୀନ । ଜଟଣୀ ପ୍ରଶିକ୍ଷଣ ଶିବିରରେ ଯୋଗ ଦେଇ ଅଭିଭାଷଣ ରଖିବେ ରାଷ୍ଟ୍ରୀୟ ଅଧ୍ୟକ୍ଷ । ସେଥିପାଇଁ ଚଳଚଞ୍ଚଳ ବିଜେପି କ୍ୟାମ୍ପ । ଆଜି ରାଜ୍ୟ କାର୍ଯ୍ୟାଳୟରେ ଏଥିପାଇଁ ବସିଥିଲା ପ୍ରସ୍ତୁତି ବୈଠକ ।

ଜଟଣୀରେ ଭୁବନେଶ୍ଵର ସାଙ୍ଗଠନିକ ଜିଲ୍ଲାର ପ୍ରଶିକ୍ଷିଣ ଶିବିରରେ ଯୋଗ ଦେବା ପରେ ରାଜ୍ୟ କାର୍ଯ୍ୟାଳୟକୁ ଆସିବେ ନୀତିନ ନବୀନ । ପ୍ରଥମେ କୋର କମିଟି ବୈଠକରେ ତୁଙ୍ଗ ନେତାଙ୍କ ସହ କରିବେ ଆଲୋଚନା । ପରେ ମୁଖ୍ୟମନ୍ତ୍ରୀ, ଦୁଇ ଉପ-ମୁଖ୍ୟମନ୍ତ୍ରୀ ଓ ମନ୍ତ୍ରୀମାନଙ୍କ ସହ ବି ବୈଠକ କରିବେ । ବିଜେପି ପଦାଧିକାରୀ ଏବଂ ନେତାଙ୍କ ସହ ରାଜ୍ୟ ସଙ୍ଗଠନ ନେଇ କରିବେ ଆଲୋଚନା । ସରକାରଙ୍କ ସହ ସଙ୍ଗଠନର ତାଳମେଳ କେମିତି ରହିଛି, ଡବଲ ଇଞ୍ଜିନ ସରକାରଙ୍କ ଉପଲବ୍ଧି ଲୋକଙ୍କ ପାଖରେ କେତେ ଦୂର ପହଞ୍ଚିଛି, ପ୍ରଶିକ୍ଷିଣ ଶିବିରର ଷ୍ଟାଟସ କ'ଣ, ଆଗକୁ କ'ଣ କ'ଣ କାର୍ଯ୍ୟକ୍ରମ ହାତକୁ ନିଆଯିବ ସେ ନେଇ କରିବେ ଆଲୋଚନା ।

ରାଷ୍ଟ୍ରୀୟ ଅଧ୍ୟକ୍ଷଙ୍କ ଗସ୍ତକୁ ନେଇ ବେଶ ଚଳଚଞ୍ଚଳ ବିଜେପି କ୍ୟାମ୍ପ । ରାଜ୍ୟ ଟିମ୍‌କୁ ନିତୀନ ନବୀନ କ'ଣ ନୂଆ ଟାସ୍କ ଦେଉଛନ୍ତି ନୂଆ ତା'ଉପରେ ସମସ୍ତଙ୍କ ନଜର ।