Nuapada By Election / ନୂଆପଡ଼ା ଉପନିର୍ବାଚନରେ ଜମୁଛି ପ୍ରଚାର, ଗାଁ ଗଳି କନ୍ଦିରେ ମନ୍ତ୍ରୀ ବିଧାୟକଙ୍କ ମାରାଥନ୍‌ କ୍ୟାମ୍ପେନ

ନୂଆପଡା ଉପନିର୍ବାଚନ ମଇଦାନରେ ଜମୁଛି ପ୍ରଚାର । ଗାଁର ଗଳି କନ୍ଦିରେ ମନ୍ତ୍ରୀ ବିଧାୟକ ନେତା କରୁଛନ୍ତି ମାରଥନ ପ୍ରଚାର । ବିରୋଧୀଙ୍କ ପାଇଁ ପ୍ରସଙ୍ଗ ସରକାରଙ୍କ ବିଫଳତା । ଶାସକ ଦଳର ପ୍ରସଙ୍ଗ ନୂଆପଡ଼ା ବିକାଶର ଗାଡ଼ିକୁ ଡବଲ ସ୍ପିଡରେ ନେବା । ନୂଆପଡ଼ା ମଇଦାନରେ ବିଭିନ୍ନ ପ୍ରସଙ୍ଗକୁ ନେଇ ଭୋଟ ମାଗୁଛନ୍ତି ତିନି ଦଳର ନେତା । ବିଜେଡି ଓ କଂଗ୍ରେସ ୧୫ ମାସ ସରକାରଙ୍କ ବିଫଳତାକୁ ମୁଦ୍ଦା କରିବା ସହ ମହିଳା ନିର୍ଯ୍ୟାତନା, ଦାଦନକୁ ପ୍ରସଙ୍ଗ କରି ଯାଉଛନ୍ତି ଭୋଟରଙ୍କ ପାଖକୁ । ଏପଟେ ବିରୋଧୀଙ୍କୁ ଜବାବ ଦେବାକୁ ଯାଇ ବିକାଶକୁ ପ୍ରସଙ୍ଗ କରୁଛି ଶାସକ ବିଜେପି । ତିନି ଦଳର ନେତା ନିଜ ନିଜ ଢଙ୍ଗରେ କରୁଛନ୍ତି ପ୍ରଚାର ।

ବୁଧବାର ଜୟଙ୍କ ପାଇଁ ମଇଦାନକୁ ଓହ୍ଲାଇଥିଲେ ମତ୍ସ୍ୟ ଓ ପଶୁସଂପଦ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ, ସ୍ବାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ଓ ଖାଦ୍ୟ ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର । ବୋଡେନରେ ପ୍ରଚାରର ମଙ୍ଗ ସମ୍ଭାଳିଥିଲେ ଗୋକୁଳାନନ୍ଦ ମଲ୍ଲିକ । ନୂଆପଡା ଏନଏସିର ସାତ ନମ୍ବର ୱାର୍ଡରେ ଘରକୁ ଘର ବୁଲି ଜୟଙ୍କ ପାଇଁ ପ୍ରଚାର କରିଥିଲେ ମୁକେଶ ମହାଲିଙ୍ଗ ।

ସେପଟେ ନୂଆପଡ଼ା ବ୍ଲକ ଆମାନାରା ପଞ୍ଚାୟତ ଠାରେ ବିଜେଡି ଜିଲ୍ଲା ଉପସଭାପତି ପଦରୁ ଇସ୍ତଫା ଦେଇ ବିଜେପି ଆସିଥିବା ଚନ୍ଦ୍ରକାନ୍ତ ଠାକୁରଙ୍କ ନେତୃତ୍ୱରେ ବିଜେପି ଆୟୋଜନ କରିଥିଲା ମିଶ୍ରଣ ପର୍ବ । ପଞ୍ଚାୟତର ବିଭିନ୍ନ ପଦ-ପଦବୀରେ ଥିବା ତିନି ଶହରୁ ଉର୍ଦ୍ଧ ବିଜେଡି କର୍ମୀ ଧରିଥିଲେ ପଦ୍ମ । ଏହି ମିଶ୍ରଣ ପର୍ବରେ ସାମିଲ ହୋଇଥିଲେ ଖାଦ୍ୟ ଯୋଗାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର ।

ଅଧିକ ପଢ଼ନ୍ତୁ: 'କାର ନଥିଲେ ବିବାହ ପାଇଁ ପୁଅଙ୍କୁ ଝିଅ ଦେଉନାହାନ୍ତି ଲୋକେ'

ନୂଆପଡ଼ାରେ ସାମ୍ବାଦିକ ସମ୍ମିଳନୀ କରି ସରକାରଙ୍କୁ ନିଶାନା କରଥିଲା କଂଗ୍ରେସ । ସୁଭଦ୍ରା ଯୋଜନାକୁ ନେଇ ଉପମୁଖ୍ୟମନ୍ତ୍ରୀଙ୍କୁ ଟାର୍ଗେଟ କରିଥିଲେ କଂଗ୍ରେସ ମୁଖପାତ୍ର ସୋନାଲି ସାହୁ । ସରକାରୀ ଯୋଜନାକୁ ଉପମୁଖ୍ୟମନ୍ତ୍ରୀ ଦଳୀୟ ପ୍ରଚାରରେ ଅସ୍ତ୍ର କରିଥିବାରୁ ଜବାବ ମାଗିଥିଲା କଂଗ୍ରେସ ।

ସେହିପରି ବିଜେଡି ପ୍ରାର୍ଥୀ ୨୪ ବର୍ଷ ସରକାରର ବିକାଶର ଗାଥା ଗାଇ ମାଗୁଛନ୍ତି ଭୋଟ । ବିଜେଡି ସରକାର ନୂଆପଡା ବିକାଶ ପାଇଁ କାମ କରିଛି କହିବା ସହ ୧୫ ମାସର ବିଜେପି ସରକାରକୁ ସମୋଲୋଚନା କରି ସ୍ନେହାଙ୍ଗୀନି ମାଗୁଛନ୍ତି ଭୋଟ୍‌ ।

ଗୋଟିଏ ପଟେ ପ୍ରଚାର ଜୋରଦାର ହୋଇଥିବା ବେଳେ ଅନ୍ୟପଟେ ନିଜ ଶକ୍ତି ବୃଦ୍ଧି ପାଇଁ ତିନି ପ୍ରମୁଖ ଦଳ ବିଭିନ୍ନ ସ୍ଥାନରେ ଆୟୋଜନ କରୁଛନ୍ତି ମିଶ୍ରଣ ପର୍ବ । ନେତା ଛାଡୁଛନ୍ତି ଦଳ । ଏହି କ୍ରମରେର ବିଜୁ ଛାତ୍ର ଜନତା ଦଳର ଖରିଆର ରୋଡ୍ ଏନଏସି ସଭାପତି ମନିଷ ଦିୱାଙ୍ଗନ ବିଜେଡିକୁ ବାଏ ବାଏ କରିଛନ୍ତି ।