ଭୁବନେଶ୍ଵର: ପୁଣି ହଟ୍ଟଗୋଳ, ଗୃହ ହେଲା ମୁଲତବି । ଶୁକ୍ରବାର ଭଳି ଶନିବାର ବିଧାନସଭାରେ ଦେଖା ଦେଇଛି ଅଚଳାବସ୍ଥା । ପୂର୍ବତନ ବିଧାୟକ ଜର୍ଜ ତିର୍କୀଙ୍କ ବିୟୋଗରେ ଶୋକ ପ୍ରସ୍ତାବ ପରେ ଗୃହରେ ହୋହଲ୍ଲା କରିଥିଲେ ବିରୋଧୀ ସଦସ୍ୟ । ଫଳରେ ବାଚସ୍ପତି ଗୃହକୁ ଅପରାହ୍ଣ ୪ଟା ପର୍ଯ୍ୟନ୍ତ ମୁଲତବି ଘୋଷଣା କରିଛନ୍ତି ।

ଗତକାଲି ବିରୋଧୀଙ୍କ ହଟ୍ଟଗୋଳ ଯୋଗୁଁ ପ୍ରଥମାର୍ଦ୍ଧରେ ମାତ୍ର ୪ ମିନିଟ୍ ଚାଲିବା ପରେ ଅପରାହ୍ଣ ୪ଟା ଯାଏଁ ମୁଲତବି ରଖିଥିଲେ ବାଚସ୍ପତି । ଅପରାହ୍ଣରେ ବି ହଟ୍ଟଗୋଳ ଲାଗି ରହିବାରୁ ବାଚସ୍ପତି ପୁଣି ଥରେ ଗୃହକୁ ମୁଲତବି କରିଥିଲେ । ଶନିବାର ମଧ୍ୟ ସମାନ ସ୍ଥିତି ସୃଷ୍ଟି ହୋଇଛି । ଦ୍ଵିତୀୟ ଦିନ ଭଳି ତୃତୀୟ ଦିନ ମଧ୍ୟ ପ୍ରଶ୍ନକାଳ ଓ ଶୂନ୍ୟକାଳ ଧୋଇ ଯାଇଛି ।

ଏଥିସହ ପଢ଼ନ୍ତୁ: ଆଦିବାସୀ ନେତା ତଥା ପୂର୍ବତନ ବିଧାୟକ ଜର୍ଜ ତିର୍କୀଙ୍କ ଦେହାନ୍ତ

ଶନିବାର ବିଜେଡି ବିଧାୟକ ସାର ପ୍ରସଙ୍ଗକୁ ନେଇ ହଟ୍ଟଗୋଳ କରିବାରୁ ମୁଲତବି ହୋଇଛି ଗୃହ । ସାର ପ୍ରସଙ୍ଗରେ କଂଗ୍ରେସ ବିଧାନସଭାରେ ମୁଲତବି ପ୍ରସ୍ତାବ ଆଣିଥିବା ବେଳେ ବିଜେଡି ସମାନ ପ୍ରସଙ୍ଗରେ ହଟ୍ଟଗୋଳ କରିଛି । ଯାହାକୁ ନେଇ ବିଜେପି କହିଛି, 'ସାର ପ୍ରସଙ୍ଗରେ ଆଲୋଚନା ଲାଗି ସରକାର ପ୍ରସ୍ତୁତ ଥିଲେ । ବିଜେଡି-କଂଗ୍ରେସ ଦୁଇ ବିରୋଧୀ ମିଶି ଗୃହକୁ ଚଳାଇ ଦେଉ ନାହାନ୍ତି ।'

ଶନିବାର ଗୃହ ଆରମ୍ଭରୁ ପୂର୍ବତନ ବିଧାୟକ ଜର୍ଜ ତିର୍କିଙ୍କ ବିୟୋଗରେ ଶୋକ ପ୍ରସ୍ତାବ ଆଗତ କରିଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଶୋକ ପ୍ରସ୍ତାବକୁବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ ଓ କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ ସମର୍ଥନ କରିଥିଲେ । ଏହା ପରେ ଗୋଟିଏ ମିନିଟ୍ ନିରବ ପ୍ରାର୍ଥନା ପରେ ପ୍ରଶ୍ନକାଳ ଆରମ୍ଭ ହେଉ ହେଉ ବାଚସ୍ପତିଙ୍କ ପୋଡ଼ିୟମ୍ ତଳକୁ ଯାଇ ନାରାବାଜି କରିଥିଲେ ବିଜେଡି ବିଧାୟକ । ଆସନକୁ ଯିବାକୁ ବିଧାୟକଙ୍କୁ ବାଚସ୍ପତି ଅନୁରୋଧ କରିଥିଲେ ମଧ୍ୟ ଶୁଣିନଥିଲେ । ଫଳରେ ବାଚସ୍ପତି ଗୃହକୁ ମୁଲତବି ରଖିଛନ୍ତି ।

Argus News | argus news | Odisha Latest News, Breaking News, Trending News, Live TV