Congress PAC Meeting / ନୂଆ ପ୍ରଭାରୀ ଫିଲ୍‌ କଲେ ଦଳର ପୁରୁଣା ରୋଗ, ଲାଲଜୀ ଦେଲେ ଗୁର ମନ୍ତ୍ର...ବାଡିଆପିଟା ଛାଡ଼ ଏକ ହୁଅ

କଂଗ୍ରେସ ରାଜନୈତିକ ବ୍ୟାପାର କମିଟିର ବୈଠକରେ ରାଜ୍ୟ ପ୍ରଭାରୀ ଲାଲଜୀଙ୍କ ଗୁରୁମନ୍ତ୍ର । ବାଡିଆପିଟା ଛାଡ଼ି ପିସିସି ସଭାପତିଙ୍କ ସହ ମିଶି ଏକାଠି କାମ କରିବାକୁ ସେ ପରାମର୍ଶ ଦେଇଛନ୍ତି । ରାଜ୍ୟ କଂଗ୍ରେସକୁ ଆଗକୁ ନେବାକୁ ବଡ଼ ନିଷ୍ପତ୍ତି ନିଆଯାଇଛି । ପଂଚାୟତ ଓ ପୌର ନିର୍ବାଚନ ପାଇଁ ପ୍ରସ୍ତୁତ ରହିବା ସହ ସରକାରଙ୍କ ବିଫଳତାକୁ ଅସ୍ତ୍ର କରିବାକୁ ଦଳୀୟ ନେତାଙ୍କୁ ଦିଆଯାଇଛି ଟାସ୍କ ।

ବଦଳିଲେ ପ୍ରଭାରୀ, ହେଲେ ମନ୍ତ୍ର ପୁରୁଣା । ଦଳର ଗୋଷ୍ଠୀ କନ୍ଦଳ ଜଳ ଜଳ । ଆସୁ ଆସୁ ଫିଲ୍‌ କରିଦେଲେ ଲାଲଜୀ । ରାଜ୍ୟ କଂଗ୍ରେସର ରାଜନୈତିକ ବ୍ୟାପାର କମିଟି ବୈଠକରେ ରୋକ୍‌ ଠୋକ୍‌ ଶୁଣାଇଛନ୍ତି ପ୍ରଭାରୀ ଲାଲଜୀ ଦେଶାଇ । ଗତକାଲି ଜିଲ୍ଲା ସଭାପତିଙ୍କ ସହ ୱାନ ଟୁ ୱାନ ଆଲୋଚନା ପରେ ଆଜି ବସିଥିଲା ପିଏସି ବୈଠକ । ଦଳର ଅନେକ ବରିଷ୍ଠ ନେତା ପ୍ରଭାରୀଙ୍କ ଆଗରେ ନିଜ ମତ ରଖିଥିଲେ । ତେବେ ଦଳର ଭୋଟ୍‌ ହାର ଖସିବା ଓ ସଂଗଠନ ରାଜ୍ୟରେ ଦୁର୍ବଳ ହେବା ନେଇ ଚିନ୍ତା ପ୍ରକଟ କରିଥିଲେ ପ୍ରଭାରୀ । ବଡ଼ କଥା ହେଉଛି ଗୋଷ୍ଠୀ ବିବାଦ ନ କରି ସଭାପତିଙ୍କ ସହ ମିଶି ଏକାଠି କାମ କରିବାକୁ ପରାମର୍ଶ ଦେଇଛନ୍ତି ଲାଲଜୀ ।

ଦ୍ଵିତୀୟ ପର୍ଯ୍ୟାୟରେ କିଛି ବରିଷ୍ଠ ନେତାଙ୍କ ସହ ୱାନ ଟୁ ୱାନ ଆଲୋଚନା କରିଛନ୍ତି ପ୍ରଭାରୀ । ରାଜ୍ୟ କଂଗ୍ରେସ କିଭଳି ଆଗକୁ ଯିବ ସେନେଇ ବୈଠକରେ ବଡ଼ ନିଷ୍ପତ୍ତି ହୋଇଛି । ଖୁବ୍ ଜଲଦି ପ୍ରଭାରୀ ପଞ୍ଚାୟତ ବୁଲିବେ । ପଂଚାୟତ ଓ ପୌର ନିର୍ବାଚନ ପାଇଁ ପ୍ରସ୍ତୁତ ରହିବା ସହ ସରକାର ବିଫଳତାକୁ ଅସ୍ତ୍ର କରିବାକୁ ଦଳୀୟ ନେତାଙ୍କୁ ଦିଆଯାଇଛି ଟାସ୍କ ।  ନୂଆ ପ୍ରଭାରୀଙ୍କ ଟାସ୍କ କେତେ ଦୂର ରୂପାୟନ ହେଉଛି ଓ ନେତାଙ୍କ ଭିତରେ କେତେ ସମନ୍ୱୟ ରହୁଛି ତାହା ଦେଖିବାକୁ ଅପେକ୍ଷା ।