Odisha Politics / ନୂଆ ଟିମ୍ ଘୋଷଣାର ୨୪ ଘଣ୍ଟା ନପୂରୁଣୁ କଂଗ୍ରେସରେ ଅସନ୍ତୋଷ

ଭୁବନେଶ୍ଵର: ପିସିସି ସଭାପତି ଭକ୍ତ ଚରଣ ଦାସ ଦ୍ୱିତୀୟ ଥର ପାଇଁ ନିଜର ନୂଆ ଟିମ୍ ଘୋଷଣା କରିଛନ୍ତି । ଟିମ୍ ଘୋଷଣାକୁ ୨୪ ଘଣ୍ଟା ନପୂରୁଣୁ ଦଳ ଭିତରେ ତେଜିଛି ଅସନ୍ତୋଷର ନିଆଁ । ରାୟଗଡ଼ାରୁ ବିଷମକଟକ ପର୍ଯ୍ୟନ୍ତ କଂଗ୍ରେସ ଶିବିରରେ ଫୁଟୁଛି ଅସନ୍ତୋଷ ।

ପୂର୍ବରୁ ଦଳ ବିରୋଧୀ କାର୍ଯ୍ୟରେ ଲିପ୍ତ ଥିବା ନେତାଙ୍କୁ ଅଗ୍ରାଧିକାର ଦିଆଯାଇଥିବା ନେଇ ପୁରୁଣା ନେତାମାନେ ସିଧାସଳଖ ପ୍ରଶ୍ନ ଉଠାଇଛନ୍ତି । କାହାକୁ ଆଶାଠାରୁ ବଡ଼ ପଦ ମିଳିଛି ତ ଆଉ କାହାକୁ କୋଣଠେସା କରାଯାଇଥିବା ଅଭିଯୋଗ ହୋଇଛି । ସେପଟେ କମିଟି ଗଠନକୁ ନେଇ ଦଳରେ ଥିବା ଏହି ଅସନ୍ତୋଷକୁ ସ୍ୱୀକାର କରିବା ସହ ରୋକ୍‌ଠୋକ୍ ଚେତାବନୀ ଦେଇଛନ୍ତି ପିସିସି ସଭାପତି ।

ଏଥିସହ ପଢ଼ନ୍ତୁ: ପଞ୍ଚାୟତ ପରେ ପରେ ବାଜିବ ପୌର ବିଗୁଲ୍; ସଜବାଜ ହେଲେଣି ୩ ପ୍ରମୁଖ ଦଳ 

ଦ୍ଵିତୀୟ ଥର ନିଜ ଟିମ୍ ଗଢ଼ିଲେ ପିସିସି ସଭାପତି ଭକ୍ତ ଚରଣ ଦାସ । ହେଲେ ଟିମ୍ ଗଠନର ୨୪ ଘଣ୍ଟା ଭିତରେ ତେଜିଛି ଅସନ୍ତୋଷର ନିଆଁ । ରାୟଗଡ଼ା କଂଗ୍ରେସର ପୁରୁଣା ଚେହେରା ଦୁର୍ଗା ପ୍ରସାଦ ପଣ୍ଡା ପିସିସିର ନିଷ୍ପତ୍ତି ଉପରେ ଉଠାଇଛନ୍ତି ସିଧା ସିଧା ପ୍ରଶ୍ନ ।

ସେପଟେ ବିଷମ କଟକରେ ବିଧାୟକ ନୀଳମାଧବ ହିକକ୍କା ଓ ସାଂସଦ ସପ୍ତଗିରି ଉଲାକାଙ୍କ ଭିତରେ ବିବାଦ ବଢିଛି । ପୂର୍ବରୁ ଦଳ ବିରୋଧୀ ଥିବା କିଛି ନେତାଙ୍କୁ ଏବେ ଦଳରେ ଅଗ୍ରାଧିକାରକୁ ସହଜରେ ହଜମ କରି ପାରୁନାହାନ୍ତି କିଛି ନେତା ।

କମିଟି ଗଠନକୁ ନେଇ ଦଳରେ ଥିବା ଅସନ୍ତୋଷକୁ ସ୍ୱୀକାର କରିଛନ୍ତି ପିସିସି ସଭାପତି ଭକ୍ତ ଦାସ । ତେବେ ନୂଆ କମିଟି ସଭ୍ୟଙ୍କୁ ଭକ୍ତ ଟାସ୍କ ଦେଇ କହିଛନ୍ତି, "ମାସକୁ ୨୦ ଦିନ ଜିଲ୍ଲାରେ ରହିବେ ଉପସଭାପତି, ସାଧାରଣ ସମ୍ପାଦକ ଓ ସମ୍ପାଦକ । ଯେଉଁ ଜିଲ୍ଲାରେ ରହିବେ ପଞ୍ଚାୟତ ବୁଥ୍ ଯାଏ ଯିବେ । ପ୍ରତିଦିନ କ'ଣ କାର୍ଯ୍ୟ କଲେ ଫଟୋ ସହ ଏଆଇସିସିକୁ ଜଣାଇବେ । ଯିଏ କରି ନ ପାରିବ ଦାୟିତ୍ୱ କାଢ଼ି ନିଆଯିବ ।"

ଏଥିସହ ପଢ଼ନ୍ତୁ: କର୍ଣ୍ଣାଟକରେ ପୁଣି ତେଜିଲା ଜାତିଗତ ଆରକ୍ଷଣ ପ୍ରସଙ୍ଗ; ୭୫% କୋଟା ବୃଦ୍ଧି କରିବାକୁ ଦାବି ଉଠାଇଲେ ସିଦ୍ଧରମୈୟା 

ଭକ୍ତଙ୍କ ବଡ଼ କମିଟିକୁ ନେଇ ଏବେ ବେଶ ଚର୍ଚ୍ଚା । ୨୯ ଜଣ ବରିଷ୍ଠ ନେତାଙ୍କୁ ନେଇ ରାଜନୈତିକ ବ୍ୟାପାର କମିଟିରେ ୧୫ ଜଣ ଉପସଭାପତି, ୫୭ ଜଣ ସାଧାରଣ ସମ୍ପାଦକ ପଦ ଭାର ଦିଆଯାଇଛି । ନୂଆ କରି କିଛି ନେତାଙ୍କୁ ଦଳର ଉପଦେଷ୍ଟା ଭାବେ ବି ନିଯୁକ୍ତି ମିଳିଛି । ଏହି ଟିମ ଆଗକୁ ଏକ ହୋଇ କେତେ ଦୂର କାମ କରୁଛି ନା ହାତରେ ହାତ ମିଶି ପାରୁନି ତା ଉପରେ ନଜର ।