ପଶ୍ଚିମବଙ୍ଗରେ ୨୯୩ଟି ବିଧାନସଭା ଆସନ ପାଇଁ ଭୋଟ୍ ଗଣତି ଜାରି ଥିବାବେଳେ ଅପରାହ୍ନ ୨ଟା ସୁଦ୍ଧା ମ୍ୟାଜିକ୍ ନମ୍ବର ପାର କରିଛି ବିଜେପି । ଏଯାବତ୍ ବିଜେପି ୧୯୪ଟି ଆସନରେ ଆଗୁଆ ଥିବାବେଳେ ଟିଏମସି ୯୨ଟି ଆସନରେ ଆଗୁଆ ରହିଛି । ଏହାରି ମଧ୍ୟରେ ପଶ୍ଚିମବଙ୍ଗ ନିର୍ବାଚନୀ ବିଜୟକୁ ନେଇ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ପ୍ରତିକ୍ରିୟା ରଖିଛନ୍ତି । ମହାପ୍ରଭୁଙ୍କୁ ଅବମାନନା କରିଥିବାରୁ ଦିଦି ଏହାର ଫଳ ଭୋଗିଥିବା ଉପମୁଖ୍ୟମନ୍ତ୍ରୀ କହିଛନ୍ତି ।

• 'ଦିଦିଙ୍କ ପତା ସଫା କରିଛନ୍ତି ମହାପ୍ରଭୁ'

ଗଣମାଧ୍ୟମକୁ ପ୍ରତିକ୍ରିୟା ଦେଇ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା କହିଛନ୍ତି, "ଯେବେ ଜଗନ୍ନାଥ ଧାମ ନେଇ ବିବାଦ ଆସିଥିଲା ସେବେ ଆମେ କହିଥିଲୁ ମହାପ୍ରଭୁଙ୍କୁ ଅବମାନନାକୁ ଗ୍ରହଣ କରାଯିବ ନାହିଁ । ଏହା ସତ ବୋଲି ପ୍ରମାଣିତ ହେଲା । ମହାପ୍ରଭୁଙ୍କ ସହ ଯିଏ ଖେଳିବାକୁ ଚେଷ୍ଟା କରିଛି ମହାପ୍ରଭୁ ନିଜେ ତାର ପତା ସଫା କରିଛନ୍ତି । ମହିଳା ହୁଅନ୍ତୁ କି ପୁରୁଷ କାହାର ଅହଙ୍କାର ମହାପ୍ରଭୁ ରଖନ୍ତି ନାହିଁ ।" ମହାପ୍ରଭୁ ଭାଇ, ଭଉଣୀଙ୍କ ଅହଙ୍କାରକୁ ଭାଙ୍ଗିଲେ କହି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ମମତା ବାନାର୍ଜୀ ଓ ନବୀନ ପଟ୍ଟନାୟକଙ୍କୁ କଟାକ୍ଷ କରିଛନ୍ତି ।

• ଦୀଘା ଜଗନ୍ନାଥ ମନ୍ଦିରକୁ ନେଇ ଉଠିଥିଲା ବିବାଦ

ପଶ୍ଚିମବଙ୍ଗର ଦୀଘାରେ ନିର୍ମିତ ଜଗନ୍ନାଥ ମନ୍ଦିରକୁ "ଦୀଘା ଜଗନ୍ନାଥ ଧାମ" ଭାବେ ନାମିତ କରିବାକୁ ନେଇ ଓଡ଼ିଶାରେ ତୀବ୍ର ବିବାଦ ଦେଖାଦେଇଥିଲା । ଏହାକୁ ନେଇ ସେବାୟତ, ରାଜନେତା ଓ ସାଧାରଣ ଜନତାଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଥିଲା, କାରଣ କେବଳ ପୁରୀକୁ ହିଁ ମୂଳ ଜଗନ୍ନାଥ ଧାମ ଭାବେ ଗ୍ରହଣ କରାଯାଏ । ବିବାଦର ମୁଖ୍ୟ କାରଣ ନାମକରଣକୁ ନେଇ ଉପୁଜିଥିଲା ।

ପଢନ୍ତୁ ଏହି ଖବର: ଅଙ୍ଗ-ବଙ୍ଗ-କଳିଙ୍ଗ...ସବୁଠି ଫୁଟିଲା ପଦ୍ମ

ଦୀଘା ମନ୍ଦିରକୁ "ଜଗନ୍ନାଥ ଧାମ" କହିବା ଓଡ଼ିଶାର ସଂସ୍କୃତି ଉପରେ କୁଠାରାଘାତ ଥିଲା । ଏହାସହିତ ପୁରୀ ଶ୍ରୀମନ୍ଦିର ବାହାରେ ପଥର ବଦଳରେ ଦାରୁ (ନିମ୍ବକାଠ) ମୂର୍ତ୍ତି ସ୍ଥାପନକୁ ନେଇ ଆପତ୍ତି ଉଠିଥିଲା । ଦଇତାପତିମାନଙ୍କ ମତରେ ବ୍ରହ୍ମ କେବଳ ପୁରୀରେ ହିଁ ଅଛନ୍ତି, ଅନ୍ୟ କୌଣସି ସ୍ଥାନରେ ନୁହେଁ । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଚିଠି ଲେଖି ଦୀଘା ମନ୍ଦିରକୁ "ଜଗନ୍ନାଥ ଧାମ" ନ କହିବାକୁ ଦାବି କରିଥିଲେ । ପ୍ରଥମରୁ ବିଜେପି ଜଗନ୍ନାଥ ମନ୍ଦିରକୁ ନେଇ ରାଜନୀତି କରୁଛି ବୋଲି ଦିଦି ଅଭିଯୋଗ ଆଣିଥିଲେ । ମାତ୍ର ଜଗନ୍ନାଥ ପ୍ରେମୀ ତୀବ୍ର ବିରୋଧ କରିବା ପରେ ସେ 'ଧାମ' ଶବ୍ଦଟିକୁ ହଟାଇବାକୁ ବାଧ୍ୟ ହୋଇଥିଲେ ।