କିଛି ଦିନ ତଳେ ଆମ୍ ଆଦମି ପାର୍ଟି (AAP)ର ଟାର୍ଗେଟ୍ ହୋଇଯାଇଥିବା ରାଜ୍ୟସଭା ସାଂସଦ ରାଘବ ଚଡ୍ଡାଙ୍କ ବଡ଼ ଘୋଷଣା । ଦଳ ଅଣଦେଖା କରିବା ପରେ ଏବେ ପଦ୍ମ ଧରିଛନ୍ତି ରାଘବ । ଶୁକ୍ରବାର ଅପରାହ୍ନରେ ପ୍ରେସ କନଫରେନ୍ସ କରି ଆପରୁ ଇସ୍ତଫା ଦେବା ସହ ବିଜେପିରେ ସାମିଲ ହେବା ନେଇ ଘୋଷଣା କରିଛନ୍ତି । ତେବେ ରାଘବ ଏକା ନୁହନ୍ତି, ତାଙ୍କ ସହ ଆପର ଆଉ ୭ ଜଣ ଦଳ ଛାଡ଼ି AAPକୁ ଶକ୍ତ ଝଟକା ଦେଇଛନ୍ତି । ଆପର ଦୁଇ ତୃତୀୟାଂଶ ସଦସ୍ୟ ଏବେ ଦଳ ଛାଡ଼ି ପଦ୍ମ ଧରିଛନ୍ତି । ସବୁଠୁ ଖାସ୍ କଥା ହେଉଛି, ଆପ୍ ୧୫ ଦିନ ତଳେ ରାଘବଙ୍କୁ ହଟାଇ ଯାହାକୁ ରାଜ୍ୟସଭାର ଉପନେତା କରିଥିଲେ, ସେହି ଅଶୋକ ମିତ୍ତଲ ମଧ୍ୟ ବିଜେପିରେ ସାମିଲ ହୋଇଛନ୍ତି ।

• 'ଆଇ ଆମ୍ ଦ ରାଇଟ୍ ପର୍ସନ ଇନ୍ ଦ ରଙ୍ଗ ପାର୍ଟି'

ରାଘବ ଚଡ୍ଡା ପ୍ରେସ କନଫରେନ୍ସରେ ଆପ୍ ଉପରେ ବର୍ଷିଛନ୍ତି । ରାଘବ କହିଛନ୍ତି, "ଆମ୍ ଆଦମି ପାର୍ଟି ଏବେ ନିଜର ବିଚାରଧାରା ଓ ମୂଲ୍ୟବୋଧରୁ ସମ୍ପୂର୍ଣ୍ଣ ଭାବେ ବାଟବଣା ହୋଇଯାଇଛି । ଦଳ ଏବେ ଜନତାଙ୍କ ପାଇଁ କାମ କରିବା ପରିବର୍ତ୍ତେ, ନିଜର ବ୍ୟକ୍ତିଗତ ସୁବିଧା ଉପରେ ଧ୍ୟାନ ଦେଉଛି । ମୁଁ ଏବେ ଆମ୍ ଆଦମି ପାର୍ଟିରୁ ଦୂରକୁ ଯାଉଛି ଓ ଜନତାଙ୍କ ସହ ଯୋଡ଼ି ହେବାକୁ ଯାଉଛି ।"

• ବିଜେପିରେ ମିଶିଲେ AAPର ୭ ସାଂସଦ

ଆମ୍ ଆଦମି ପାର୍ଟିର ମୋଟ ୭ ଜଣ ସାଂସଦ ବିଜେପିରେ ସାମିଲ ହେବାକୁ ଯାଉଛନ୍ତି ବୋଲି ପ୍ରେସ କନଫରେନ୍ସରେ ରାଘବ ଚଡ୍ଡା ସ୍ପଷ୍ଟ କରିଛନ୍ତି । ସେ ଆହୁରି କହିଛନ୍ତି ଯେ ଇସ୍ତଫା, ମିଶ୍ରଣର କାଗଜପତ୍ର କାମ ମଧ୍ୟ ସେ ସାରିଦେଇଛନ୍ତି । ରାଜ୍ୟସଭାରେ ଆମ୍ ଆଦମି ପାର୍ଟିର ଦୁଇ ତୃତୀୟାଂଶ ସାଂସଦ ବିଜେପିରେ ସାମିଲ ହେବାକୁ ଯାଉଥିବା ସେ କହିଛନ୍ତି । ରାଜ୍ୟସଭାରେ ଆପର ମୋଟ ୧୦ ଜଣ ସଦସ୍ୟ ଅଛନ୍ତି ଓ ଏବେ ତନ୍ମଧ୍ୟରୁ ୭ ଜଣ ସାଂସଦ ଦଳ ଛାଡ଼ି ପଦ୍ମ ଧରିବାକୁ ନିଷ୍ପତ୍ତି ନେଇଛନ୍ତି । ଏପରିକି ରାଘବ ସେମାନଙ୍କ ନାମ ମଧ୍ୟ ଗଣମାଧ୍ୟମ ସମ୍ମୁଖରେ ପ୍ରକାଶ କରିଛନ୍ତି ।

ରାଘବଙ୍କ କହିବାନୁସାରେ, ବିଜେପିରେ ସାମିଲ ହେବାକୁ ଥିବା ଆମ୍ ଆଦମି ପାର୍ଟିର ସାଂସଦମାନେ କାଗଜରେ ହସ୍ତାକ୍ଷର କରିସାରିଛନ୍ତି ଓ ଏହାକୁ ରାଜ୍ୟସଭା ସଭାପତିଙ୍କୁ ପ୍ରଦାନ କରିଛନ୍ତି । ପ୍ରେସ କନଫରେନ୍ସରେ ରାଘବ କହିଛନ୍ତି ଯେ ଯେଉଁ ସାସଂଦ ବିଜେପିରେ ସାମିଲ ହେବାକୁ ଯାଉଛନ୍ତି, ସେମାନଙ୍କ ମଧ୍ୟରୁ ଏବେ ତାଙ୍କ ସହ ଦୁଇ ଜଣ ସାଂସଦ ଉପସ୍ଥିତ ଅଛନ୍ତି ଓ ଅନ୍ୟମାନଙ୍କ ମଧ୍ୟରେ ହରଭଜନ ସିଂ, ରଜିନ୍ଦର ଗୁପ୍ତା, ବିକ୍ରମ ସାହାଣି ଓ ସ୍ଵାତି ମାଲିୱାଲ ସାମିଲ ବୋଲି ସେ କହିଛନ୍ତି । ସେହି ସାଂସଦମାନେ ହେଉଛନ୍ତି:
ସ୍ଵାତି ମାଲିୱାଲ
ଅଶୋକ କୁମାର ମିତ୍ତଲ
ସନ୍ଦୀପ ପାଠକ
ହରଭଜନ ସିଂ
ବଲବିର ସିଂହ ସୋଚିୱାଲ
ବିକ୍ରମଜିତ ସିଂହ ସାହାଣି

ଏଠାରେ କହିରଖୁଛୁ କି, ନିକଟରେ ରାଘବ ଚଡ୍ଡାଙ୍କୁ ଆପ୍ ରାଜ୍ୟସଭା ଉପନେତା ପଦରୁ ହଟାଇ ଦେଇଥିଲା । ଆପ୍ ରାଜ୍ୟସଭାରେ ଜରୁରୀ ପ୍ରସଙ୍ଗ ନ ଉଠାଇ ସାଧାରଣ ପ୍ରସଙ୍ଗ ଉପରେ ଆଲୋଚନା କରୁଛନ୍ତି । ଆପ୍ ଏହା ମଧ୍ୟ ଅଭିଯୋଗ ଆଣିଥିଲା ଯେ ରାଘବ ପ୍ରଧାନମନ୍ତ୍ରୀ ମୋଦିଙ୍କୁ ଡରୁଛନ୍ତି । ଯେତେବେଳେ ରାଘବ ଏହାକୁ ବିରୋଧ କରି ନିଜର ମନ୍ତବ୍ୟ ରଖିଥିଲେ, ଏହାପରେ ଆପ୍ ନିଜର ଅଭିଯୋଗ ଫର୍ଦ୍ଦକୁ ବୃଦ୍ଧି କରିଥିଲା । ଦଳର ଅନେକ ନେତା ସୋସିଆଲ ମିଡିଆରେ ରାଘବଙ୍କ ବିରୋଧରେ ମନ୍ତବ୍ୟ ଦେଇଥିବା ଦେଖିବାକୁ ମିଳିଥିଲା ।