Raja Swain Puppet Remark / କାହା ପାଇଁ ରାଜାଙ୍କ ‘କଣ୍ଢେଇ’ କାହାଣୀ ? ଶଙ୍ଖ ଦଳ ରାଜନୀତିରେ ପୁଣି ହଟଚମଟ

ଆମେ ରାଜନେତା ଆମେ କାରିଗର । ଆମେ କଣ୍ଡେଇ ତିଆରି କରୁ । ଭାଙ୍ଗିଗଲେ ଆଉ ଗୋଟିଏ ତିଆରି ବି କରିପାରୁ । ସ୍ଵାୟତ୍ତ ଶାସନ ଦିବସରେ ବିଜେଡିର ବରିଷ୍ଠ ବିଧାୟକ ରାଜା ସ୍ଵାଇଁଙ୍କ ଏହି ଭାଷଣକୁ ହଲଚଲ ବିଜେଡି ରାଜନୀତି । କାହା ପାଇଁ ରାଜାଙ୍କ କଣ୍ଡେଇ ଉପାଖ୍ୟାନ । ବିଜେପି ଏହାକୁ ସୁଜାତାଙ୍କୁ ନିଶାନା ବୋଲି କହିଥିବା ବେଳେ ବିଜେଡି ବିଧାୟକ ଗଣେଶ୍ଵର ବେହେରା କହିଛନ୍ତି କଣ ପାଇଁ କହିଲେ, ସେ କହିପାରିବେ କିନ୍ତୁ ସେ ଠିକ କହିଛନ୍ତି ।

ଢେର ଦିନ ହେବ ଦଳ ଠାରୁ ଦୂରେଇ ରହୁଛନ୍ତି । ଶଙ୍ଖ ଭବନ ନଯାଇ ଘରେ ସାମ୍ବାଦିକ ସମ୍ମିଳନୀ କରୁଛନ୍ତି । ଦଳ ସହ ସମାନ୍ତରାଳ ଭାବେ ରାଜା ସ୍ଵାଇଁ ଚାଲିଥିବା କୁହାଯାଉଥିବା ବେଳେ ଏମିତି ଏକ ବୟାନ ବିଜେଡି ରାଜନୀତିରେ ହଟଚମଟ ସୃଷ୍ଟି କରିଛି । ଆଠଗଡ଼ରେ ସ୍ଵାୟତ୍ତ ଶାସନ କାର୍ଯ୍ୟକ୍ରମରେ ୨୪ ନିର୍ବାଚନକୁ ନେଇ ବୁଲେଇ ବଙ୍କାଇ ବାଣ ମାରିଛନ୍ତି ରାଜା ସ୍ଵାଇଁ । କହିଛନ୍ତି ଆମେ ରାଜନେତା କାରିଗର । ବହୁ କଣ୍ଡେଇ ହାତରେ ତିଆରି କରିଛୁ । କେତେବେଳେ ପାଣି ପଡି ରଙ୍ଗ ଛାଡି ଯାଉଛି, ତ କେତେବେଳେ ଭାଙ୍ଗି ଯାଉଛି । କିନ୍ତୁ ଆମେ କ'ଣ ଆଉ ଗୋଟେ କଣ୍ଡେଇ ତିଆରି କରିପାରୁବୁନି ବୋଲି କହିଛନ୍ତି ରାଜା ସ୍ଵାଇଁ । ବିଜେପି ନେତା ଅଭୟ ବାରିକ କହିଛନ୍ତି, ସୁଜାତା ଯୋଗ ଦେବା ପରେ ରାଜା ସ୍ଵାଇଁଙ୍କୁ ପଚାରୁନାହାନ୍ତି । ସେଥିପାଇଁ ଏମିତି କହିଥାଇପାରନ୍ତି । ବିଜେଡି ବରିଷ୍ଠ ନେତା ଗଣେଶ୍ଵର ବେହେରା କହିଛନ୍ତି, ସେ କେଉଁ ଲକ୍ଷ୍ୟରେ କହିଛନ୍ତି ସେ କହିପାରିବେ ।

ଏଠି ପ୍ରଶ୍ନ ଉଠୁଛି କାହାକୁ କଣ୍ଢେଇ କହି ଟାର୍ଗେଟ କରିଛନ୍ତି ରାଜା । ସୁଜାତାଙ୍କୁ ନିଶାନା କରିଛନ୍ତି କି ରାଜା । କାରିଗର ନୂଆ ମୂର୍ତ୍ତି ତିଆରି କରି ପାରିବ ଅର୍ଥାତ ବିଜେଡିର ନେତା କିଏ ହେବ ସେ ନିଷ୍ପତ୍ତି ଆମେ ନେବୁ ବୋଲି କହିବାକୁ ଚାହୁଁଛନ୍ତି କି ରାଜା ସ୍ଵାଇଁ । ସୁଜାତାଙ୍କ ମିଶ୍ରଣ ଦିନ ଅନୁପସ୍ଥିତ ଥିଲେ ରାଜା ସ୍ଵାଇଁ । ପରେ ଅନେକ ନେତା ସୁଜାତାଙ୍କୁ ଭେଟିଥିବା ବେଳେ ଏ ଯାଏଁ ରାଜା କିନ୍ତୁ ଦୂରେଇ ରହିଛନ୍ତି । ଏମିତି କି ଶଙ୍ଖ ଭବନ ଯାଉନାହାନ୍ତି । ଆଉ ସମାନ ପ୍ରସଙ୍ଗରେ ଦଳ ଗୋଟିଏ ସାମ୍ବାଦିକ ସମ୍ମିଳନୀ କରିଥିବା ବେଳେ, ରାଜା ସ୍ଵାଇଁ ଆଉ ଗୋଟିଏ ସାମ୍ବାଦିକ ସମ୍ମିଳନୀ କରୁଛନ୍ତି ।

ଏପ୍ରିଲ ୨୦୨୫ରେ ନବୀନଙ୍କୁ ଚିଠି ଲେଖି ଦଳର ସଙ୍ଗଠନକୁ ହାଇଜାକ କରିବାକୁ ଦିଆ ନଯାଉ ବୋଲି କହିଥିଲେ ରାଜା ସ୍ଵାଇଁ । ପରେ ଅଗଷ୍ଟ ୨୦୨୫ରେ ନବୀନ ଅସୁସ୍ଥ ହୋଇ ହସ୍ପିଟାଲରେ ଥିବା ବେଳେ ରାଜା ସ୍ଵାଇଁଙ୍କୁ ଆଇ ଆମ ଡାଉନ ବଟ୍‌ ନଟ୍‌ ଆଉଟ ବୋଲି ଶୁଣାଇଥିଲେ ପାଣ୍ଡିଆନ । ଆଉ ପୁଣି ସୁଜାତା ମିଶିବା ପରେ ଦଳରୁ ଦୂରେଇ ରହୁଥିବା ରାଜାଙ୍କୁ ପ୍ରଥମ ଥର ପାଇଁ ପ୍ରଧାନମନ୍ତ୍ରୀଙ୍କ ମନ୍‌ କୀ ବାତରେ ଉପସ୍ଥିତ ଥିବା ଦେଖିବାକୁ ମିଳିଥିଲା । ଆଉ ଏବେ ରାଜାଙ୍କ କଣ୍ଢେଇ ଉପାଖ୍ୟାନ ରାଜନୈତିକ ହଟଚମଟ ତିଆରି କରିଛି ।