ବରିଷ୍ଠ ସାମ୍ବାଦିକ ରୁବେନ ବାନାର୍ଜୀ ନବୀନ ପଟ୍ଟନାୟକଙ୍କ ଉପରେ ଲେଖିଥିବା ବହିରେ କରିଛନ୍ତି ସାଂଘାତିକ ଖୁଲାସା । ମୃତ୍ୟୁ ପୂର୍ବରୁ ପାଣ୍ଡିଆନଙ୍କ ଉପରେ ସନ୍ଦେହ କରିଥିଲେ ନବୀନ ପଟ୍ଟନାୟକଙ୍କ ଭଉଣୀ ଗୀତା ମେହେଟ୍ଟା । ନବୀନଙ୍କୁ ପାଣ୍ଡିଆନ ଭୁଲ ବାଟରେ ନେଉଥିବା ଭଉଣୀ ଗୀତା ମେହେଟ୍ଟାଙ୍କର ହୋଇଥିଲା ସନ୍ଦେହ । ଡାକ୍ତରଖାନାକୁ ଦେଖା କରିବାକୁ ଯାଇଥିବା ଜଣେ ପାଖ ଲୋକକୁ ଡାକି ଦୁର୍ବଳ ସ୍ୱରରେ ଏପରି କହିଥିଲେ ଗୀତା ମେହେଟ୍ଟା ।

ନବୀନ ପଟ୍ଟନାୟକଙ୍କ ଉପରେ ଲେଖିଥିବା ବହିର ପଞ୍ଚମ ଅଧ୍ୟାୟ 'ପାଣ୍ଡିଆନ କୁହକ'ରେ ରୁବେନ ଲେଖିଛନ୍ତି ଯେ କୁହାଯାଏ ନବୀନଙ୍କର ବଡ଼ ଭଉଣୀ ଗୀତା ମେହେଟ୍ଟା ଥରେ ପାଣ୍ଡିଆନଙ୍କ କଥା ଉଠାଇଥିଲେ । ୨୦୨୩ ମସିହା ସେପ୍ଟେମ୍ବର ମାସରେ ତାଙ୍କର ନିଧନ ହେବାର ଅବ୍ୟବହିତ ପୂର୍ବରୁ ସେ ଦୁର୍ବଳ ସ୍ୱରରେ ନବୀନଙ୍କ ଲାଗି ଚିନ୍ତା କରିଥିଲେ । ସେ ତାଙ୍କୁ ଅବାଟରେ ନେଉନି ତ, ତାଙ୍କୁ ଡାକ୍ତରଖାନାରେ ଦେଖୁବାକୁ ଯାଇଥିବା ବେଳେ ଜଣଙ୍କୁ ସେ ଖୋଲି କହିଥିଲେ ବୋଲି ଲେଖିଛନ୍ତି ରୁବେନ ।

ସେପଟେ ପାଣ୍ଡିଆନ ଦମ୍ପତିଙ୍କୁ ନେଇ ବିଜେଡିରେ ବଢୁଛି ବିଦ୍ରୋହ । ଏକଜୁଟ ହୋଇ ବଡ଼ ପ୍ଲାନ କରୁଛନ୍ତି ବିଜୁ ଲିଗାସି ପରିବାର। ଖବରକାଗଜକୁ ସାକ୍ଷାତକାର ଦେଇ ଭୈରବ ପାଣ୍ଡିଆନଙ୍କ ଉପରେ ବର୍ଷିଥିବା ଦଳର ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ ନିଜ ଘରେ ମେଳି ବାନ୍ଧି କରିଛନ୍ତି ଶକ୍ତି ପ୍ରଦର୍ଶନ । ଖାଲି ଶକ୍ତି ପ୍ରଦର୍ଶନ କରି ନାହାନ୍ତି ବରଂ ବୈଠକ କରି ଦେଇଛନ୍ତି ଯୁଦ୍ଧଙ୍ଗ ଦେହି ଡାକରା । ଖୋଲାଖୋଲି ସାମ୍ନାକୁ ଆସିନଥିଲେ ବି ବହୁ ବିଜୁ ଲିଗାସି ନେତାଙ୍କ ପୁଅମାନଙ୍କୁ ଧରି ଗୁପ୍ତ ବୈଠକ କରିଛନ୍ତି ଦେବାଶିଷ । ବାହାରକୁ ସୌଜନ୍ୟମୂଳକ ବୈଠକ ଓ ଭୋଜିଭାତ କୁହାଯାଉଥିବା ଏହି ମେଳି ପଛରେ ପାଣ୍ଡିଆନଙ୍କୁ ମାତ୍ ଦେବା ଲାଗି ବଡ଼ ଷ୍ଟ୍ରାଟେଜି ପ୍ରସ୍ତୁତ ହୋଇଥିବା କୁହାଯାଇଛି । ଚର୍ଚ୍ଚା ହେଉଛି ପ୍ଲାନ୍-A,B,C ନେଇ ଆଗକୁ ବଢ଼ୁଛନ୍ତି ବିଜୁ ଲିଗାସି ପରିବାର ।

Argus News | argus news | Odisha Latest News, Breaking News, Trending News, Live TV