Swami Prasad Maurya Targets Akhilesh Yadav / 'ମୋତେ ସାର୍ଟିଫିକେଟ ଦେବାକୁ ଅଖିଳେଶ ଯାଦବ କିଏ'

ଆଗାମୀ ୨୦୨୭ ବିଧାନସଭା ନିର୍ବାଚନକୁ ନେଇ ଏବେ ଠାରୁ ସରଗରମ ହୋଇ ଉଠିଲାଣି ଉତ୍ତର ପ୍ରଦେଶର ରାଜନୈତିକ ପାଣିପାଗ। ଏହି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଯାଉଥିବା ସମସ୍ତ ଦଳ ନିର୍ବାଚନ ରଣନୀତି ପ୍ରସ୍ତୁତ କରିବାରେ ଏବଂ ସେମାନଙ୍କ ଦଳୀୟ ସଙ୍ଗଠନକୁ ମଜବୁତ କରିବାରେ ଲାଗି ପଡ଼ିଛନ୍ତି। ଏହି ସମୟରେ ବିରୋଧି ମେଣ୍ଟ (INDIA) ରେ ମେଣ୍ଟ ହେବା ଏବଂ ଆସନ ଭାଗବଣ୍ଟାକୁ ନେଇ ଆଲୋଚନା ଜାରି ରହିଛି। ରାଜନୈତିକ ମହଲରେ ମଧ୍ୟ ଏହା ଚର୍ଚ୍ଚା ହେଉଛି ଯେ ଆସନ ଭାଗ ବଣ୍ଟନକୁ ନେଇ ମେଣ୍ଟ ସହଯୋଗୀ ଦଳ ମଧ୍ୟରେ ମତଭେଦ ଦେଖାଦେଇପାରେ। ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ଏବଂ ପୂର୍ବତନ ମନ୍ତ୍ରୀ ସ୍ୱାମୀ ପ୍ରସାଦ ମୌର୍ଯ୍ୟଙ୍କ ମଧ୍ୟରେ ଚାଲିଥିବା ବାକ୍ ଯୁଦ୍ଧକୁ ନେଇ ଏବେ ଉତ୍ତର ପ୍ରଦେଶ ରାଜନୀତି ସରଗରମ ହୋଇଉଠିଛି। ଅଖିଳେଶ ଯାଦବଙ୍କ ବୟାନର ଜବାବ ଦେଇ ସ୍ୱାମୀ ପ୍ରସାଦ ମୌର୍ଯ୍ୟ ପ୍ରତିକ୍ରିୟା ଦେଇଛନ୍ତି।

ସ୍ୱାମୀ ପ୍ରସାଦ ମୌର୍ଯ୍ୟ କହିଛନ୍ତି ଯେ କେବଳ ଅଖିଳେଶ ଯାଦବ ବିରୋଧି ମେଣ୍ଟରେ ନାହାଁନ୍ତି। ବିରୋଧି ମେଣ୍ଟର ଜାତୀୟ ସଂଯୋଜକ ହେଉଛନ୍ତି କଂଗ୍ରେସ ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ। ଅନ୍ତିମ ନିଷ୍ପତ୍ତି ତାଙ୍କ ଉପରେ ନିର୍ଭର କରେ। ମୋତେ ସାର୍ଟିଫିକେଟ ଦେବାକୁ ଅଖିଳେଶ ଯାଦବ କିଏ? ମୁଁ ସେମାନଙ୍କ ଭାଗରେ ପଡ଼ିଥିବା ଆସନ ପାଇଁ ଟିକେଟ୍ ମଧ୍ୟ ମାଗି ନଥିଲି। ଆମେ କଂଗ୍ରେସ ସହ କଥା ହୋଇଛୁ। ଆମେ ରାହୁଲ ଗାନ୍ଧୀଙ୍କ ସହ କଥା ହୋଇଛୁ ଆମେ ପ୍ରିୟଙ୍କା ଗାନ୍ଧୀଙ୍କ ସହ କଥା ହୋଇଛୁ। ଆମେ ଉତ୍ତର ପ୍ରଦେଶ କଂଗ୍ରେସ ପ୍ରଭାରୀଙ୍କ ସହ କଥା ହୋଇଛୁ। ମୁଁ ତାଙ୍କ ସହ ଆଦୌ କଥା ହୋଇନାହିଁ। ଯଦି ସେ ଏତେ ସକ୍ଷମ ହୋଇଥାନ୍ତେ ତାହେଲେ ମୁଁ ଉତ୍ତର ପ୍ରଦେଶରେ ଥିବା ସମୟରେ ପ୍ରଥମେ ତାଙ୍କ ସହ କଥା ହୋଇଥାନ୍ତି।

ଦିଲ୍ଲୀରେ ସ୍ୱାମୀ ପ୍ରସାଦ ମୌର୍ଯ୍ୟଙ୍କ ବୈଠକ ପରେ, ଆରଏସଏସପି ବିରୋଧି ମେଣ୍ଟରେ (INDIA) ସାମିଲ ହେବା ନେଇ ଚର୍ଚ୍ଚା ଆରମ୍ଭ ହୋଇ ଯାଇଥିଲା। ସେ ନଭେମ୍ବର ୧ ତାରିଖ ରବିବାରେ ଦିଲ୍ଲୀରେ ଆୟୋଜିତ ହେଉଥିବା ବିରୋଧି ମେଣ୍ଟର ପ୍ରତିବାଦ ଶୋଭାଯାତ୍ରାରେ ଯୋଗଦେବାର ଘୋଷଣା ମଧ୍ୟ କରିଥିଲେ। ଏହି ସମୟରେ ଯେତେବେଳେ ସମାଜବାଦୀ ପାର୍ଟି (ସପା) ମୁଖ୍ୟ ଅଖିଳେଶ ଯାଦବଙ୍କୁ ସ୍ୱାମୀ ପ୍ରସାଦଙ୍କ ବିଷୟରେ ପଚରାଯାଇଥିଲା, ସେତେବେଳେ ସେ ଏହି ସମ୍ଭାବନାକୁ ସ୍ପଷ୍ଟ ଭାବରେ ଖାରଜ କରିଥିଲେ। ସପା ମୁଖ୍ୟ କହିଥିଲେ ଯେ ସ୍ୱାମୀ ପ୍ରସାଦ ମୌର୍ଯ୍ୟ ବିରୋଧି ମେଣ୍ଟର ଅଂଶ ହେବେ ନାହିଁ। ଗତ ଶୁକ୍ରବାର (ଅକ୍ଟୋବର ୩୦) ଲକ୍ଷ୍ନୌସ୍ଥିତ ଦଳୀୟ କାର୍ଯ୍ୟାଳୟରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଅଖିଳେଶ ଯାଦବ ଏକଥା କହିଥିଲେ।