Vijay TVK / ତାମିଲନାଡୁରେ TVKର ବମ୍ଫର ଜିତ୍; କୁଆଡେ ଗଲେ ବିଜୟ ?

ତାମିଲନାଡୁରେ ନିର୍ବାଚନ ଫଳ ଆସିବା ପରେ ଏବେ ଖୋଜା ପଡ଼ିଛନ୍ତି ଥାଲାପତି ବିଜୟ । ତାଙ୍କ ପାର୍ଟି ତାମିଲଗା ଭେଟ୍ରି କାଜାଗମ (TVK) ପ୍ରଥମ ଥର ନିର୍ବାଚନୀ ମୈଦାନକୁ ଓହ୍ଲାଇଥିବାବେଳେ ଜବରଦସ୍ତ ପ୍ରଦର୍ଶନ କରି ୧୦୦ରୁ ଅଧିକ ଆସନରେ ବିଜୟ ହାସଲ କରିଛି ଦଳ । ଫିଲ୍ମ ଜଗତରେ ଯେପରି ସୁପରଷ୍ଟାର, ଠିକ୍ ସେହିପରି ରାଜନୀତିରେ ବି ସୁପରଷ୍ଟାର ପାଲଟିଯାଇଛନ୍ତି ବିଜୟ । ଟିଭିକେକୁ ରାଜ୍ୟରେ ବମ୍ଫର ବିଜୟ ମିଳିଥିବାବେଳେ ଖୋଦ ଦଳର ମୁଖିଆ ତଥା ପ୍ରମୁଖ ଚେହେରା ଏବେ ଯାଏଁ ଲୋକଙ୍କ ସାମ୍ନାକୁ ଆସିନି ।

ଆଜି ସକାଳ ୮ଟାରୁ ଭୋଟ ଗଣତି ଆରମ୍ଭ ହୋଇସାରିଥିବାବେଳେ କମାଲ୍ କରିଥିଲା ବିଜୟଙ୍କ ଦଳ ଟିଭିକେ । ଧିରେ ଧିରେ ଦଳ ମ୍ୟାଜିକ୍ ନମ୍ବର ୧୧୮ ଆଡ଼କୁ ଅଗ୍ରସର ହେଉଥିଲା । ଆଉ ପଛରେ ପଡ଼ିଥିଲେ DMK ଓ AIADMK । ତାମିଲନାଡୁ ଫଳ ରାଜନୈତିକ ବିଶେଷଜ୍ଞଙ୍କୁ ମଧ୍ୟ ଚକିତ କରିଛି । ୨୦୨୬ ବିଧାନସଭା ନିର୍ବାଚନରେ ମୋଟ ୨୩୪ଟି ଆସନ ମଧ୍ୟରୁ TVK ୧୦୯ ଆସନରେ ଆଗୁଆ ଥିବାବେଳେ DMK ୫୯ ଓ AIADMK ୪୫, PMK 5, କଂଗ୍ରେସ ୫, ବିଜେପି ୩ଟି ଓ IUMP ଦୁଇଟି ଆସନରେ ଆଗୁଆ ଅଛି ।

• ଜୋରଦାର ସେଲିବ୍ରେସନ, କିନ୍ତୁ ହିରୋ 'ଗାୟବ'

ଟିଭିକେ କାର୍ଯ୍ୟାଳୟରେ ଉତ୍ସବର ମାହୋଲ । ସମର୍ଥକମାନେ 'ହ୍ଵିସିଲ ପୋଡୁ' ନାରା ଦେଇ ଉତ୍ସବ ପାଳୁଛନ୍ତି । ଥାଲାପତି ବିଜୟଙ୍କ ଘରେ ମଧ୍ୟ ବେଶ ଉତ୍ସାହ ଦେଖିବାକୁ ମିଳିଛି । ଏହି ପୁରା ଉତ୍ସବ ମଧ୍ୟରେ ଦେଖାନାହାନ୍ତି ଥାଲାପତି । ଏବେ ବିଜୟଙ୍କ ଅନୁପସ୍ଥିତିକୁ ନେଇ ଚର୍ଚ୍ଚା ଆରମ୍ଭ ହୋଇଛି । ବିଜୟଙ୍କ ନିର୍ବାଚନୀ ଯାତ୍ରା ଏଯାବତ୍ କୌଣସି ବ୍ଲକବଷ୍ଟ ଫିଲ୍ମଠାରୁ କମ ନାହିଁ । ଏହା ବେଶ ଦମଦାର ଓ ଚକିତ କଲା ପରି ।

ପଢନ୍ତୁ ଏହି ଖବର: 'ହିନ୍ଦୀ ଓ ହିନ୍ଦୁ' ବିରୋଧ ଜାଲରେ ଫସିଗଲେ ଷ୍ଟାଲିନ୍‌-ଉଦୟାନିଧି ! ତାମିଲନାଡ଼ୁରେ ବୁଡ଼ିଗଲା DMK

ବିଜୟ ଜାଣିଶୁଣି ସାମ୍ନାକୁ ଆସୁନାହାନ୍ତି ନା ଏହା ପଛରେ କୌଣସି ରଣନୀତି ସେ ନେଇ ଚର୍ଚ୍ଚା ହେଉଛି । ଗୋଟିଏ ବିଜୟଙ୍କ ଚେହେରା ଦେଖିବାକୁ ମିଳୁନଥିବାବେଳେ ଅନ୍ୟପଟେ ତାଙ୍କ ପିତା ଏସ.ଏ ଚନ୍ଦ୍ରଶେଖର ମନ୍ଦିର ଯାଇ ଭଗବାନଙ୍କ ଦର୍ଶନ କରିଛନ୍ତି । ସେହିପରି ବିଜୟଙ୍କ ବନ୍ଧୁ ତଥା ଅଭିନେତ୍ରୀ ତ୍ରିଷାଙ୍କୁ ତିରୁପତି ମନ୍ଦିରରେ ଦେଖିବାକୁ ମିଳିଛି ।

• ଅଙ୍କ ବିଗାଡ଼ିଦେଲେ ବିଜୟ

ଏଥର ବିଜୟ ସମଗ୍ର ନିର୍ବାଚନୀ ସମୀକରଣକୁ ବିପର୍ଯ୍ୟସ୍ତ କରିଦେଇଛନ୍ତି । ୨୦୨୧ ମସିହାରେ କ୍ଷମତାକୁ ଆସିଥିବା DMK ତାମିଲନାଡୁରେ ଦ୍ୱିତୀୟ ଥର କ୍ଷମତାରେ ରହିବାରୁ ବଞ୍ଚିତ ହେଉଥିବା ପରି ମନେ ହେଉଛି । ୨୩୪ ଆସନ ବିଶିଷ୍ଟ ବିଧାନସଭାରେ ବହୁମତ ସଂଖ୍ୟା ୧୧୮ । ବର୍ତ୍ତମାନର ଟ୍ରେଣ୍ଡ ଅନୁସାରେ TVK ପ୍ରାୟ ୧୦୯ ଆସନରେ ଆଗୁଆ ଅଛି, ଯେତେବେଳେ DMK+ ୫୯ ଏବଂ AIADMK+ ମେଣ୍ଟ ୪୪ ଆସନରେ ଆଗୁଆ ରହିଛି ।