Odisha Panchayat Election / ପାର୍ବଣ ପୂର୍ବରୁ ପଞ୍ଚାୟତ ମୁହାଁ ରାଜନୀତି ! ୩ ଦଳର ବଡ଼ ପ୍ଲାନ୍

ମାର୍ଚ୍ଚ ଶେଷ ଆଡକୁ ପଞ୍ଚାୟତ ନିର୍ବାଚନ ଏକ ପ୍ରକାର ସ୍ଥିର ହୋଇ ସାରିଥିବା ବେଳେ, ପାର୍ବଣ ପୂର୍ବରୁ ପଞ୍ଚାୟତକୁ ଯିବାକୁ ପ୍ଲାନ କରୁଛନ୍ତି ୩ ରାଜନୈତିକ ଦଳ । ଗ୍ରାଉଣ୍ଡକୁ ଯିବେ ନେତା, ଭୋଟରକୁ ଛୁଇଁବାକୁ କସରତ । ବିଜେପି ଏବଂ କଂଗ୍ରେସ ମାସିକିଆ କାର୍ଯ୍ୟକ୍ରମ ହାତକୁ ନେଇଥିବା ବେଳେ ବିଜେଡି ପ୍ରତିବାଦ କରି ଲୋକଙ୍କ ପାଖକୁ ଯିବାକୁ ପ୍ଲାନ କରିଛି ।

ସେପ୍ଟେମ୍ବର ୧୭ ପ୍ରଧାନମନ୍ତ୍ରୀଙ୍କ ଜନ୍ମଦିନରୁ ବିଜେପି କରିବ ମାସିକିଆ ସେବା ପର୍ବ କାର୍ଯ୍ୟକ୍ରମ । ସେପ୍ଟେମ୍ବର ୧୭, ମୋଦିଙ୍କ ଜନ୍ମଦିନରୁ ଅକ୍ଟୋବର ୧୭ ଯାଏଁ ଚାଲିବ ଅଭିଯାନ । ୧୩ଟି ପ୍ରମୁଖ କାର୍ଯ୍ୟକ୍ରମରେ ଲୋକଙ୍କ ପାଖକୁ ଯିବ ଦଳ । ୧୭ ତାରିଖ ସନ୍ଧ୍ୟାରେ ରାଜ୍ୟର ସମସ୍ତ ଲାଭର୍ଥୀଙ୍କ ଘରେ ହେବ ଦୀପ ପ୍ରଜ୍ଜ୍ୱଳନ । ପ୍ରତ୍ୟେକ ଅଙ୍ଗନବାଡି, ସ୍କୁଲ ଏବଂ କଲେଜରେ ଚିତ୍ରାଙ୍କନ ଏବଂ ଭାଷଣ ପ୍ରତିଯୋଗିତା ହେବ । ଗାଁ ଗାଁରେ ପରିବର୍ତ୍ତନର କାହାଣୀକୁ ନେଇ ହେବ ଫଟୋ ଚିତ୍ର ପ୍ରଦର୍ଶନୀ । ଛକରେ ନମୋ ସେବା ଗାଥା ପଥପ୍ରାନ୍ତ ନାଟକ ସହ ବିକଶିତ ଭାରତ ସଂକଳ୍ପ ଯାତ୍ରାରେ ଯୁବକମାନଙ୍କୁ ସାମିଲ କରାଯିବ । ଡବଲ ଇଞ୍ଜିନ ସରକାରଙ୍କ ଯୋଜନା ଲୋକଙ୍କ ପାଖରେ ରଖିବେ ନେତା । ମୋଦିଙ୍କ ଶାସନ କାଳର ୨୫ ବର୍ଷରେ ୨୫ ସେବାକୁ ନେଇ ବି ଗାଁକୁ ଯିବେ । ନିକଟରେ କଟକ ରାଜ୍ୟ କାର୍ଯ୍ୟକାରିଣୀରେ ମଧ୍ୟ ଏହି କାର୍ଯ୍ୟକ୍ରମକୁ ସଫଳ କରିବାକୁ ନେତାକୁ ଦିଆଯାଇଛି ଟାସ୍କ । ଆଜି ସାମ୍ବାଦିକ ସମ୍ମିଳନୀ କରି ଏହି କାର୍ଯ୍ୟକ୍ରମକୁ ସଫଳ କରିବାକୁ କର୍ମୀଙ୍କୁ ଆହ୍ଵାନ ଦେଇଛନ୍ତି ବିଜେପି ରାଜ୍ୟ ସଭାପତି ।

ଏପଟେ କଂଗ୍ରେସ ଏବଂ ବିଜେଡି ମଧ୍ୟ ସେପ୍ଟେମ୍ବର କାର୍ଯ୍ୟକ୍ରମ ଚୂଡାନ୍ତ କରିଛନ୍ତି । ଧାନ ପଞ୍ଜିକରଣରେ ସମସ୍ୟା, ଏଫସିଆଇ ଚାଉଳ ନ ଉଠାଇବା ଭଳି ପ୍ରସଙ୍ଗକୁ ନେଇ ସେପ୍ଟେମ୍ବର ୧୫ରୁ ଅକ୍ଟୋବର ୧୫ ଯାଏଁ ରାଜ୍ୟବ୍ୟାପୀ କିଷାନ ପଦଯାତ୍ରା କରିବ କଂଗ୍ରେସ । ଏପଟେ MMDR ପ୍ରସଙ୍ଗରେ ରାଜଭବନ ଘେରାଉ କରି ରାସ୍ତାକୁ ଓହ୍ଲାଇ ଥିବା ବିଜେଡି ମଧ୍ୟ ଜିଲ୍ଲାସ୍ତରରେ ପ୍ରତିବାଦ ପାଇଁ ପ୍ରସ୍ତୁତ ହେଉଛି ।

ରାଜନୈତିକ ସମୀକ୍ଷକ କହିଛନ୍ତି, ପଞ୍ଚାୟତ ନିର୍ବାଚନର ୬ ମାସ ପୂର୍ବରୁ ରାଜନୈତିକ ଦଳ ତାଙ୍କର କସରତ ଆରମ୍ଭ କରିଛନ୍ତି । ୩ ଦଳ ପାଇଁ ଏହି ପଞ୍ଚାୟତ ନିର୍ବାଚନ ହେବ ଏସିଡ୍‌ ଟେଷ୍ଟ ।

୨୦୨୨ରେ ୮୫୩ ଜିଲ୍ଲା ପରିଷଦ ଆସନରୁ ୭୬୬ ବିଜେଡି ଦଖଲ କରିଥିବା ବେଳେ ବିଜେପି ୪୨ ଆଉ କଂଗ୍ରେସ ୩୭ଟି ଆସନ ଅକ୍ତିଆର କରିଥିଲା । କିନ୍ତୁ ଏବେ ଶାସନ ବଦଳିଛି । କ୍ଷମତାରେ ବିଜେପି ଥିବା ବେଳେ ପଞ୍ଚାୟତ ପରୀକ୍ଷାରେ କାହା ଷ୍ଟ୍ରାଟେଜୀ କାମ ଦେବ ଆଉ କାହାର ଫେଲ୍ ମାରିବ ତା ଉପରେ ନଜର ।