Kerala New CM / କେରଳମର ନୂଆ ମୁଖ୍ୟମନ୍ତ୍ରୀ ହେବେ ଭି.ଡି ସତୀଶନ, ୧୦ ଦିନ ପରେ ନାଁ ଘୋଷଣା

କେରଳରେ ଅନେକ ଦିନ ଧରି ରାଜନୈତିକ ଅସ୍ଥିରତା, ବୈଠକ ଏବଂ ଆଭ୍ୟନ୍ତରୀଣ କଳହ ପରେ ଶେଷରେ କଂଗ୍ରେସ ଏକ ବଡ଼ ନିଷ୍ପତ୍ତି ନେଇଛି। କଂଗ୍ରେସ ନେତୃତ୍ୱାଧୀନ କେରଳମରେ ନୂତନ ମୁଖ୍ୟମନ୍ତ୍ରୀ ଭାବରେ ଭି.ଡି ସତୀଶନଙ୍କୁ ବାଛିଛି । ଏହାକୁ ରାଜ୍ୟର ରାଜନୀତିରେ ନୂତନ ପିଢ଼ିର ନେତୃତ୍ୱର ଆରମ୍ଭ ବୋଲି କୁହାଯାଉଛି । ବରିଷ୍ଠ କଂଗ୍ରେସ ନେତା ଦୀପା ଦାସ ମୁନସି, ମୁକୁଲ ୱାସନିକ୍ ଏବଂ ଅଜୟ ମାକେନ୍ ଦିଲ୍ଲୀରେ ଆନୁଷ୍ଠାନିକ ଭାବରେ ତାଙ୍କ ନାମ ଘୋଷଣା କରିଛନ୍ତି ।

କଂଗ୍ରେସ ନେତାମାନେ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ଭି.ଡି. ସତୀଶନ ରାଜ୍ୟର ନୂତନ ମୁଖ୍ୟମନ୍ତ୍ରୀ ହେବେ । କେରଳ ବିଧାନସଭା ନିର୍ବାଚନ ପାଇଁ ମତଦାନ ଏପ୍ରିଲ ୯ ତାରିଖରେ ହୋଇଥିଲା ଏବଂ ଫଳାଫଳ ମେ ୪ ତାରିଖରେ ଘୋଷଣା କରାଯାଇଥିଲା । ବିଧାନସଭା ନିର୍ବାଚନ ଫଳାଫଳ ଘୋଷଣା ହେବାର ପ୍ରାୟ ୧୦ ଦିନ ପରେ କଂଗ୍ରେସ ଦଳ ମୁଖ୍ୟମନ୍ତ୍ରୀଙ୍କ ନାମ ଘୋଷଣା କରିଛି ।

• ରେଜଲ୍ଟ ଆସିବାର ୧୦ଦିନ ପରେ ନାଁ ଘୋଷଣା

ମୁଖ୍ୟମନ୍ତ୍ରୀ ପଦକୁ ନେଇ ଅନେକ ଦିନ ଧରି କଂଗ୍ରେସରେ ଅନ୍ତଃକନ୍ଦଳ ଦେଖିବାକୁ ମିଳିଥିଲା । ଥିରୁଅନନ୍ତପୁରମରୁ ଦିଲ୍ଲୀ ପର୍ଯ୍ୟନ୍ତ ନେତାଙ୍କ ବୈଠକ ଜାରି ଥିଲା । ଶେଷ ସମୟ ପର୍ଯ୍ୟନ୍ତ ବି ଦଳ ଭରସା କରିପାରୁନଥିଲା ଯେ କାହାକୁ କେରଳମର ମୁଖିଆ ବାଛିବ । କଂଗ୍ରେସର ସାଧାରଣ ସମ୍ପାଦକ କେସି ବେଣୁଗୋପାଳ ମଧ୍ୟ ଶେଷ ପର୍ଯ୍ୟାୟ ଆଲୋଚନା ଲାଗି ଦିଲ୍ଲୀ ପହଞ୍ଚିଥିଲେ । କୁହାଯାଉଛି ରାହୁଲ ଗାନ୍ଧୀ ତାଙ୍କ ସହିତ ଆଲୋଚନା ପରେ ନିଷ୍ପତ୍ତି ନେଇଛନ୍ତି ।

• ୬ ଥରର ବିଧାୟକ ସତୀଶନ

କୋଚି ଜିଲ୍ଲାର ବାସିନ୍ଦା ସତୀଶନ ଏହି ମାସରେ ୬୨ ବର୍ଷ ବୟସରେ ପଦାର୍ପଣ କରୁଛନ୍ତି । ପେଶାରେ ସେ ଜଣେ ଓକିଲ । ୨୦୦୧ ମସିହାରେ ସତୀଶନ ପ୍ରଥମ ଥର ପାଇଁ ପାରାଭୁର ନିର୍ବାଚନମଣ୍ଡଳୀରୁ ବିଧାନସଭା ନିର୍ବାଚନରେ ​​ବିଜୟୀ ହୋଇ ନିଜର ରାଜନୈତିକ କ୍ୟାରିଅର ଆରମ୍ଭ କରିଥିଲେ । ୨୦୦୧ ଠାରୁ ୨୦୨୬ ପର୍ଯ୍ୟନ୍ତ ଲଗାତାର ୬ ଥର ପାରାଭୁରରୁ ନିର୍ବାଚନ ଜିତି ଆସୁଛନ୍ତି ସତୀଶନ । ତାଙ୍କର ଦମଦାର ଭାଷଣ ଏବଂ ବିରୋଧୀଙ୍କ ଉପରେ ତୀକ୍ଷ୍ଣ ଆକ୍ରମଣ ତାଙ୍କୁ ଖୁବଶୀଘ୍ର କଂଗ୍ରେସ ଦଳର ପ୍ରମୁଖ ଚେହେରା ମଧ୍ୟରୁ ଜଣେ କରିଥିଲା । ତାଙ୍କର ସବୁଠାରୁ ବଡ଼ ରାଜନୈତିକ ଉତ୍ଥାନ ସେତେବେଳେ ହୋଇଥିଲା ଯେତେବେଳେ ୨୦୨୧ ବିଧାନସଭା ନିର୍ବାଚନରେ ​​କଂଗ୍ରେସ ନେତୃତ୍ୱାଧୀନ ୟୁଡିଏଫ୍ ଏକ ବଡ଼ ପରାଜୟ ବରଣ କରିଥିଲା ।

ପଢନ୍ତୁ ଏହି ଖବର: କେରଳରେ ପ୍ରଥମ ଥର ପାଇଁ ମେୟର ପଦବୀ ଜିତି ଇତିହାସ ରଚିଲା ବିଜେପି

ପରାଜୟ ପରେ, ଦଳ ତାଙ୍କୁ ବିରୋଧୀ ଦଳ ନେତା ନିଯୁକ୍ତ କରିଥିଲା । ପ୍ରଥମରୁ ଅନେକ ନେତା ତାଙ୍କୁ ଏକ ଆପୋଷ ପ୍ରାର୍ଥୀ ବୋଲି ବିବେଚନା କରୁଥିଲେ, କିନ୍ତୁ ସେ ଏହି ଦାୟିତ୍ୱକୁ ନିଜର ଶକ୍ତିରେ ପରିଣତ କରିଥିଲେ । ସେ ସୁନା ଚୋରା ଚାଲାଣ ମାମଲା, ଏଆଇ କ୍ୟାମେରା ବିବାଦ ଏବଂ ଆଇନ ଶୃଙ୍ଖଳା ଭଳି ପ୍ରସଙ୍ଗରେ ପିନାରାଇ ବିଜୟନ ସରକାରଙ୍କୁ ଲଗାତାର ଆକ୍ରମଣ କରିଥିଲେ ଏବଂ ନିଜକୁ ରାଜ୍ୟର ସବୁଠାରୁ ଆକ୍ରମଣାତ୍ମକ ବିରୋଧୀ ନେତା ଭାବରେ ପ୍ରତିଷ୍ଠିତ କରିଥିଲେ ।

• ମୁଖ୍ୟମନ୍ତ୍ରୀ ନାଁ ପାଇଁ ବୈଠକ ପରେ ବୈଠକ

ମେ ୪ ତାରିଖରେ ନିର୍ବାଚନ ଫଳାଫଳ ବାହାରିବା ପରେ ନୂଆ ମୁଖ୍ୟମନ୍ତ୍ରୀ ନାଁ ଘୋଷଣା ପାଇଁ ବୈଠକ ପରେ ବୈଠକ ବସିଥିଲା । ମେ ୮ ତାରିଖରେ କଂଗ୍ରେସର ସଭାପତି ମଲ୍ଲିକାର୍ଜୁନ ଖଡ଼ଗେ ଓ ରାହୁଲ ଗାନ୍ଧୀ କେରଳର ପ୍ରମୁଖ ନେତାଙ୍କ ସହିତ ବୈଠକ କରିଥିଲେ । ଏହି ବୈଠକରେ ବେଣୁଗୋପାଳ, ଚେନ୍ନିଥଲା ଓ ସତୀଶନଙ୍କ ବ୍ୟତୀତ କେରଳ ପ୍ରଦେଶ କଂଗ୍ରେସ କମିଟି (KPCC)ର ପ୍ରମୁଖ ନେତା ଜୋସେଫ ଓ ଦଳର ରାଜ୍ୟ ପ୍ରଭାରୀ ଦୀପା ଦାସ ମୁନସି ବି ଉପସ୍ଥିତ ଥିଲେ । ଶେଷରେ ବହୁ ଆଲୋଚନା ପର୍ଯ୍ୟାଲୋଚନା ପରେ ସତୀଶନଙ୍କ ନାଁରେ ମୋହର ବାଜିଛି । କେରଳରେ କଂଗ୍ରେସ ପ୍ରାୟ ୧୦ ବର୍ଷ ପରେ ସତ୍ତାକୁ ଫେରିଛି ।