Pandian Venezuela Visit / କାହିଁକି ଭେନଜୁଏଲା ଯାଇଥିଲେ ଭୈରବ ପାଣ୍ଡିଆନ୍ ? ବାଦ-ବିବାଦ ଭିତରେ ସାମ୍ନାକୁ ଆସୁଛି ସତ

ଭୂକମ୍ପ ବିଧ୍ଵଂସ ଭେନେଜୁଏଲାରୁ ଆସିଲା ପାଣ୍ଡିଆନଙ୍କ ଫୋଟୋ । ଆଉ ସାଙ୍ଗେ ସାଙ୍ଗେ ପାଣ୍ଡିଆନଙ୍କୁ ସାଇକ୍ଲୋନ ମ୍ୟାନ୍‌ ବନାଇଦେଲେ ବିଜେଡି ନେତା । କହିଲେ ମନ୍ତ୍ର ଦେବାକୁ ପାଣ୍ଡିଆନଙ୍କୁ ପଠାଇଛନ୍ତି କେନ୍ଦ୍ର ସରକାର । ହେଲେ ସାଂଘାତିକ ଅଭିଯୋଗ ଆଣି ପୋଲ ଖୋଲିଲା ବିଜେପି । କହିଲା କେନ୍ଦ୍ରରୁ ନୁହେଁ ସତ୍ୟସାଇ ଟ୍ରଷ୍ଟ ପକ୍ଷରୁ ଭଲ୍ୟୁଣ୍ଟର ଭାବେ ସେବା କରିବାକୁ ଭେନେଜୁଏଲା ଯାଇଥିଲେ ପାଣ୍ଡିଆନ ।

ମନ୍ମଥ ରାଉତରାୟ କହୁଛନ୍ତି ଭୂକମ୍ପ ବିଧ୍ଵଂସ ଭେନଜୁଏଲାରୁ ପାଣ୍ଡିଆନଙ୍କୁ ଆସିଥିଲା ନିମନ୍ତ୍ରଣ । ୟୁଏନ ପକ୍ଷରୁ ପାଣ୍ଡିଆନଙ୍କୁ ପଠାଯାଇଥିଲା ଭେନେଜୁଏଲା । କିନ୍ତୁ ବିଜେପି ଆଣିଛି ସାଂଘାତିକ ଅଭିଯୋଗ । ଦଳର ମୁଖପାତ୍ର ଅନୀଲ ବିଶ୍ଵାଳ କହିଛନ୍ତି, ଭି.କେ ପାଣ୍ଡିଆନ ସତ୍ୟସାଇ ଇଣ୍ଟର ନ୍ୟାସନାଲ ଅର୍ଗନାଇଜେସନର ସଦସ୍ୟ ଭାବେ ସେବା କରିବାକୁ ଯାଇଥିଲେ । ତାଙ୍କୁ ୟୁଏନ କି କେନ୍ଦ୍ର ସରକାର ପଠାଇନାହାଁନ୍ତି । ଓଡ଼ିଶାରେ କେବେ ଭୂମିକମ୍ଫ ହେଲା ଆଉ ପାଣ୍ଡିଆନ ଭୂମିକମ୍ପ ମୁକାବିଲା ଏକ୍ସପର୍ଟ କେମିତି ହେଲେ ବୋଲି ପ୍ରଶ୍ନ କରିଛି ଦଳ । ସେପଟେ ବିଜେଡିର ଯୁକ୍ତି ଭାରତ ସରକାର ପକ୍ଷରୁ ହିଁ ପାଣ୍ଡିଆନ ଭେନେଜୁଏଲା ଯାଇଥିଲେ ।

ତଥ୍ୟ କହୁଛି ଭେନେଜୁଏଲା ଏବଂ ଲାଟିନ ଆମେରିକାରେ ସତ୍ୟ ସାଇ ବାବାଙ୍କର ହଜାର ହଜାର ସଂଖ୍ୟାରେ ଶ୍ରଦ୍ଧାଳୁ ରହିଛନ୍ତି । ଏମିତି କି ଭେନେଜୁଏଲାର ପୂର୍ବତନ ରାଷ୍ଟ୍ରପତି ନିକୋଲସ ମଦୁରା ଏବଂ ଏବେର କାମଚଳା ରାଷ୍ଟ୍ରପତି ଯାହାକୁ ପାଣ୍ଡିଆନ ଭେଟିଛନ୍ତି ଡେଲସୀ ରୋଡିଗଜ ମଧ୍ୟ ସତ୍ୟସାଇଙ୍କ ଭକ୍ତ । ନିକଟରେ ଭାରତ ଗସ୍ତରେ ଆସିଥିବା ବେଳେ ସତ୍ୟସାଇ ମନ୍ଦିର ଯାଇ ପୂଜା କରିଥିଲେ ରାଷ୍ଟ୍ରପତି ଡେଲସି ରୋଡିଗଜ । ସତ୍ୟସାଇ ଇଣ୍ଟରନ୍ୟାସନାଲ ସଂସ୍ଥା ପକ୍ଷରୁ ଭୂମିକମ୍ପ ପରେ ବିଧ୍ଵଂସ ଭେନେଜୁଏଲାରେ ସେବା ଦେବାକୁ ଭଲ୍ୟୁଣ୍ଟର ଭାବେ ଯାଇଥିଲେ ପାଣ୍ଡିଆନ । ନିଜ ଇନଷ୍ଟାଗ୍ରାମ ପୋଷ୍ଟରେ ବି ତା'ର ସଙ୍କେତ ଦେଇଛନ୍ତି ଭି.କେ ପାଣ୍ଡିଆନ । କିନ୍ତୁ ବିଜେଡି ତାକୁ ନେଇ ସାଇକ୍ଲୋନ ମ୍ୟାନ୍‌ ଭାବେ ଆରମ୍ଭ କରି ଦେଇଛି ପ୍ରଚାର । ଯାହାକୁ ନେଇ ରାଜନୈତିକ ସମୀକ୍ଷକ ମଧ୍ୟ ପ୍ରଶ୍ନ ଉଠାଇଛନ୍ତି ।

ସୁଜାତାଙ୍କ ଏଣ୍ଟ୍ରି ହେଉ ହେଉ ସୁଚିନ୍ତିତ ଭାବେ ପ୍ରୋ ପାଣ୍ଡିଆନ ଗୋଷ୍ଠୀ ଭେନେଜୁଆଲ ଗସ୍ତକୁ ନେଇ ପ୍ରଚାର ପ୍ରସାର ଆରମ୍ଭ କରିଛନ୍ତି । ଜାତୀୟ ଏବଂ ଆନ୍ତର୍ଜାତୀୟ ରାଜନୀତିରେ ବି ପାଣ୍ଡିଆନ ଦବଦବା ରଖୁଥିବା ନେଇ ବାର୍ତ୍ତା ଦେବାକୁ ନେତାଙ୍କୁ ଦିଆଯାଇଛି ନିର୍ଦ୍ଦେଶ । କିନ୍ତୁ ଏବେ ଏ ରଣନୀତି ଫସର ଫାଟିଥିବା ଚର୍ଚ୍ଚା ହେଲାଣି ।