West Bengal Bypoll 2026 / ରେଜିନଗର ଲଢେଇରେ ମୁହାଁମୁହିଁ ହେବେ ଟିଏମସି-କଂଗ୍ରେସ; କାହିଁକି ମମତା ବାନାର୍ଜୀଙ୍କୁ ଦେଲା ନାହିଁ ସମର୍ଥନ?

ଆସନ୍ତା ଅକ୍ଟୋବର ୬ ତାରିଖରେ ପଶ୍ଚିମବଙ୍ଗର ନନ୍ଦିଗ୍ରାମ ଏବଂ ରେଜିନଗର ବିଧାନସଭା ଆସନରେ ଅନୁଷ୍ଠିତ ହେଉଛି ଉପନିର୍ବାଚନ। ଏହି ନିର୍ବାଚନ ପାଇଁ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ (ଟିଏମସି) କଂଗ୍ରେସ ସହିତ ମେଣ୍ଟ କରିବାକୁ ଚାହୁଁଥିଲା। ହେଲେ ଟିଏମସି ପ୍ରୟାସ ବିଫଳ ହୋଇଥିଲା। ସୂତ୍ର ଅନୁଯାୟୀ ଟିଏମସି, କଂଗ୍ରେସ ଲାଗି ନନ୍ଦିଗ୍ରାମ ଆସନ ଛାଡ଼ିଥିବା ବେଳେ ରେଜିନଗର ଆସନରେ ପ୍ରତିଦ୍ୱନ୍ଦ୍ୱିତା କରିବାକୁ ଚାହୁଁଥିଲା। ହେଲେ ତଥାପି କଂଗ୍ରେସ, ଟିଏମସି ପକ୍ଷରୁ ଦିଆଯାଇଥିବା ପ୍ରସ୍ତାବରେ ରାଜି ହୋଇନଥିଲା।

ଉଭୟ ଦଳର ଶୀର୍ଷ ନେତୃତ୍ୱ ସୂତ୍ର ଏହା ନିଶ୍ଚିତ କରିଛନ୍ତି। ଯଦିଓ ଏନେଇ ଔପଚାରିକ ଭାବେ କୌଣସି ସୂଚନା ଦିଆଯାଇ ନାହିଁ। ଉପନିର୍ବାଚନ ପାଇଁ ଭୋଟ୍ ଅକ୍ଟୋବର ୬ ଏବଂ ଗଣତି ୯ ତାରିଖରେ ହେବ। କଂଗ୍ରେସ, ବିଜେପି, ସିପିଏମ, ମମତା ବାନାର୍ଜୀଙ୍କ ଟିଏମସି ଏବଂ ବିଦ୍ରୋହୀ ରୀତବ୍ରତ ବାନାର୍ଜୀଙ୍କ ନେତୃତ୍ୱାଧିନ ବିଦ୍ରୋହୀ ଟିଏମସି ମଧ୍ୟ ଉଭୟ ଆସନ ପାଇଁ ସେମାନଙ୍କର ପ୍ରାର୍ଥୀ ଘୋଷଣା କରିଛନ୍ତି।

ମୁର୍ଶିଦାବାଦ ଜିଲ୍ଲାରେ ଅବସ୍ଥିତ ରେଜିନଗର ଆସନ, ଆମ ଜନତା ଉନ୍ନୟନ ପାର୍ଟି (AJUP) ଅଧ୍ୟକ୍ଷ ହୁମାୟୁଁ କବୀରଙ୍କ ଇସ୍ତଫା ପରେ ଖାଲି ହୋଇଛି। ୨୦୨୬ ବିଧାନସଭା ନିର୍ବାଚନ ପରେ ବଙ୍ଗ ନିର୍ବାଚନରେ ​​ହୁମାୟୁଁ କବୀର ଜଣେ ପ୍ରମୁଖ ମୁସଲିମ ନେତା ଭାବରେ ଉଭା ହୋଇଛନ୍ତି। ରେଜିନଗର ବ୍ୟତୀତ, ସେ ପଡ଼ୋଶୀ ନାୱଦା ଆସନରେ ମଧ୍ୟ ବିଜୟୀ ହୋଇଥିଲେ। ରେଜିନଗର ଆସନ ପାଇଁ ଉପନିର୍ବାଚନରେ ​​ସେ ତାଙ୍କ ପୁଅ ଗୁଲାମ ନବୀ ଆଜାଦଙ୍କୁ ପ୍ରାର୍ଥୀ କରିଛନ୍ତି।

ଗତ ୨୦୨୬ ବିଧାନସଭା ନିର୍ବାଚନରେ ବିଜେପି ଏହି ମୁସଲିମ ବହୁଳ ନିର୍ବାଚନମଣ୍ଡଳୀରେ ଦ୍ୱିତୀୟ ସ୍ଥାନ ଅଧିକାର କରିଥିଲା। ୨୦୨୧ ନିର୍ବାଚନରେ ଜିତିଥିବା ଟିଏମସି ତୃତୀୟ ସ୍ଥାନରେ ରହିଥିଲା। ସେହିପରି କଂଗ୍ରେସ ୨ ପ୍ରତିଶତରୁ କମ୍ ଭୋଟ ପାଇଥିଲା। ଯଦିଓ ପୂର୍ବ ନିର୍ବାଚନରେ ​​କଂଗ୍ରେସ ପ୍ରତିଦ୍ୱନ୍ଦ୍ୱିତା କରିନଥିଲା। ହେଲେ ଏହି ନିର୍ବାଚନମଣ୍ଡଳୀ କେବ କଂଗ୍ରେସ ଗଡ଼ ଥିଲା।

କ'ଣ ରହିଛି ରେଜିନଗର ନିର୍ବାଚନମଣ୍ଡଳୀର ଇତିହାସ?
ହୁମାୟୁଁ କବୀର ୨୦୧୧ ପଶ୍ଚିମବଙ୍ଗ ବିଧାନସଭା ନିର୍ବାଚନରେ କଂଗ୍ରେସ ପ୍ରାର୍ଥୀ ଭାବେ ବିଜୟୀ ହୋଇଥିଲେ। ଏହି ନିର୍ବାଚନରେ ​​କଂଗ୍ରେସ-ଟିଏମସି ମଧ୍ୟରେ ମେଣ୍ଟ ହୋଇଥିଲା। ହେଲେ ପରେ AJUP ମୁଖ୍ୟ କବୀର କଂଗ୍ରେସ ଛାଡି଼ ଟିଏମସି ହାତ ଧରିଥିଲେ। ହେଲେ ଏହାର ୨ ବର୍ଷ ପରେ ଅନୁଷ୍ଠିତ ଉପନିର୍ବାଚନରେ ​​କବୀର, ଟିଏମସି ପ୍ରାର୍ଥୀ ଭାବେ ନିର୍ବାଚନ ଲଢି ତୃତୀୟ ସ୍ଥାନକୁ ଖସି ଆସିଥିଲେ।

୨୦୧୬ ବିଧାନସଭା ନିର୍ବାଚନରେ କଂଗ୍ରେସ ପୁଣି ରେଜିନଗର ଆସନ ଦଖଲ କରିଥିଲା। ସ୍ୱାଧିନ ପ୍ରାର୍ଥୀ ଭାବରେ ପ୍ରତିଦ୍ୱନ୍ଦ୍ୱିତା କରୁଥିବା ହୁମାୟୁଁ କବୀର ଦ୍ୱିତୀୟ ସ୍ଥାନ ଅଧିକାର କରିଥିଲେ। ସେତେବେଳେ ଟିଏମସି ପୁଣି ଥରେ ତୃତୀୟ ସ୍ଥାନରେ ରହିଥିଲା। ହେଲେ ତଥାପି ୨୦୨୧ ନିର୍ବାଚନରେ ଟିଏମସି ୨ ଥରର କଂଗ୍ରେସ ବିଧାୟକ ରବିଉଲ ଆଲାମ ଚୌଧୁରୀଙ୍କୁ ଦଳୀୟ ପ୍ରାର୍ଥୀ କରିଥିଲା। ଯିଏ ପ୍ରଥମ ଥର ପାଇଁ ଟିଏମସି ପ୍ରାର୍ଥୀ ଭାବେ ଜିତିଥିଲେ। ଠିକ ଏହାର ୫ ବର୍ଷ ପରେ ଅନୁଷ୍ଠିତ ହୋଇଥିବା ୨୦୨୬ ପଶ୍ଚିମବଙ୍ଗ ବିଧାନସଭା ନିର୍ବାଚନରେ କଂଗ୍ରେସ ତୃତୀୟ ସ୍ଥାନରେ ରହି ୨ ପ୍ରତିଶତରୁ କମ୍ ଭୋଟ ପାଇଥିଲା।

କଂଗ୍ରେସ କହିବା ଅନୁସାରେ, ଟିଏମସି ବିଭାଜିତ ହେବା ପରେ, ଦଳ ପୁଣି ଥରେ ଲଢେଇ କରିବାକୁ ସକ୍ଷମ ହୋଇପାରିବ। କାରଣ ଉଭୟ ଟିଏମସି ଗୋଷ୍ଠୀ ଉଭୟ ନନ୍ଦଗ୍ରାମ-ରେଜିନଗର ଆସନରେ ଅନୁଷ୍ଠିତ ହେଉଥିବା ଉପନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଛନ୍ତି। ଏହି କାରଣରୁ କଂଗ୍ରେସ ରେନିନଗର ଆସନ, ମମତା ବାନାର୍ଜୀଙ୍କ ନେତୃତ୍ୱାଧିନ ଟିଏମସି ପାଇଁ ଛାଡ଼ିବା ସପକ୍ଷରେ ନଥିଲା।

ପଶ୍ଟିମବଙ୍ଗର ରେଜିନଗର ବିଧାନସଭା ଆସନ, ରାଜ୍ୟର ବହରମପୁର ଲୋକସଭା ନିର୍ବାଚନମଣ୍ଡଳୀ ଅଧିନସ୍ଥ। ଯେଉଁଠାରେ ୨୦୨୪ ଲୋକସଭା ନିର୍ବାଚନରେ ଟିଏମସି ପ୍ରାର୍ଥୀ ୟୁସୁଫ ପଠାନ୍, ୫ ଥର ପାଇଁ କଂଗ୍ରେସ ସାଂସଦ ଅଧିର ରଞ୍ଜନ ଚୌଧୁରୀଙ୍କୁ ପରାସ୍ତ କରିଥିଲେ। ୟୁସୁଫ୍ ପଠାନ୍ ଏବେ ଟିଏମସି ଛାଡି NCPI (Nationalist Citizens Party of India) ହାତ ଧରି ସାରିଛନ୍ତି। ରେଜିନଗର ଉପନିର୍ବାଚନରେ ​​କଂଗ୍ରେସ ଏହାକୁ ଏକ ପ୍ରସଙ୍ଗ ମଧ୍ୟ କରିପାରେ।

ଟିଏମସି ସହିତ ମେଣ୍ଟ କରିବା ସପକ୍ଷରେ ନାହାନ୍ତି ସ୍ଥାନୀୟ କଂଗ୍ରେସ ନେତା
କଂଗ୍ରେସ ସୂତ୍ରରୁ ମିଳିଥିବା ଖବର ଅନୁସାରେ ଯଦି ଟିଏମସି ମେଣ୍ଟ କରିବାକୁ ଚାହୁଁଛି, ତାହେଲେ ସେମାନେ ରେଜନଗର ଛାଡ଼ି ନନ୍ଦିଗ୍ରାମ ଆସନରେ ପ୍ରତିଦ୍ୱନ୍ଦ୍ୱିତା କରିବା ଆବଶ୍ୟକ। ନନ୍ଦିଗ୍ରାମ ଆସରେ ଟିଏମସି ମାତ୍ର ୧୦ ହଜାର ଭୋଟ୍ ବ୍ୟବଧାନରେ ପରାସ୍ତ ହୋଇଥିଲା। ଅନ୍ୟପକ୍ଷରେ କଂଗ୍ରେସ ନୋଟା ଅପେକ୍ଷା କମ୍ ଭୋଟ ପାଇଥିଲା। ହେଲେ ରେଜିନଗର ଆସନର ସ୍ଥାନୀୟ କଂଗ୍ରେସ ନେତା ଟିଏମସି ସହିତ ମେଣ୍ଟ କରିବା ସପକ୍ଷରେ ନାହାଁନ୍ତି। ସେମାନେ ବିଶ୍ୱାସ କରନ୍ତି ଯେ ୧୫ ବର୍ଷ ଧରି ଶାସନ କରିବା ପରେ କ୍ଷମତାରୁ ବିତାଡ଼ିତ ହୋଇଥିବା ଟିଏମସି, ବିଧାନସଭା ନିର୍ବାଚନ ପରେ ବିଭାଜିତ ହୋଇସାରିଛି। ଏପରିକି ଜନସାଧାରଣଙ୍କ ଅସନ୍ତୋଷ ଲାହି ରହିଛି। ସ୍ପଷ୍ଟ ଭାବରେ, ମମତା ବାନାର୍ଜୀଙ୍କ ପ୍ରଭାବ ହ୍ରାସ ପାଇବା ପରେ ଯାଇ କଂଗ୍ରେସ ପଶ୍ଚିମବଙ୍ଗରେ କ୍ଷମତାକୁ ଫେରିପାରିବ।

ହେଲେ ତଥାପି ନବନିଯୁକ୍ତ ପଶ୍ଚିମବଙ୍ଗ କଂଗ୍ରେସ ପ୍ରଭାରୀ ପ୍ରକାଶ ଯୋଶୀ କୌଣସି ମେଣ୍ଟ ଆଲୋଚନାକୁ ଅସ୍ୱୀକାର କରିଛନ୍ତି। ଏନେଇ ସେ କହିଛନ୍ତି ତାଙ୍କ ପାଖରେ ଏ ବିଷୟରେ କୌଣସି ଖବର ନାହିଁ। ସେ ଆହୁରି ମଧ୍ୟ କହିଛନ୍ତି ଯେ କଂଗ୍ରେସ ଏହାର ସାମର୍ଥ୍ୟ ବଳରେ ଉପନିର୍ବାଚନ ଲଢ଼ିବ। ଦଳର ପ୍ରାଥମିକ ଲକ୍ଷ୍ୟ ଦଳୀୟ ସଙ୍ଗଠନକୁ ପୁନର୍ବାର ମଜବୁତ କରିବା। ରାଜ୍ୟରେ ଲୋକ ଏବେ ଦଳକୁ ଏକ ବିକଳ୍ପ ଭାବରେ ଦେଖୁଛନ୍ତି କାରଣ ସେମାନେ ପନ୍ଦର ବର୍ଷ ପୁରୁଣା ଟିଏମସି ସରକାରକୁ ବଦଳାଇ ସାରିଛନ୍ତି।

ବିଧାନସଭା ନିର୍ବାଚନରେ ​​ପରାଜୟ ଏବଂ ଦଲୀୟ ସାଂସଦ ଏବଂ ବିଧାୟକଙ୍କ ବିଦ୍ରୋହ ମଧ୍ୟରେ, ମମତା ବାନାର୍ଜୀ ଦିଲ୍ଲୀ ଆସି ସୋନିଆ ଗାନ୍ଧୀଙ୍କୁ ଭେଟିଥିଲେ। ପରଦିନ, ଅଭିଷେକ ବାନାର୍ଜୀ ଏବଂ ରାହୁଲ ଗାନ୍ଧୀଙ୍କ ମଧ୍ୟରେ ଦୀର୍ଘ ଆଲୋଚନା ହୋଇଥିଲା। ଟିଏମସି, କଂଗ୍ରେସ ସହ ବିଲୟ ହେବା ନେଇ ଚର୍ଚ୍ଚା ଆରମ୍ଭ ହୋଇଥିଲା। ଯାହାକୁ କଂଗ୍ରେସ ପରେ ଅସ୍ୱୀକାର କରିଥିଲା। ହେଲେ ତଥାପି ସେବେଠାରୁ ସ୍ପଷ୍ଟ ଖବର ମିଳୁଛି ଯେ କଂଗ୍ରେସ ଏବଂ ମମତା ବାନାର୍ଜୀ ଭବିଷ୍ୟତରେ ଏକ ମେଣ୍ଟ ଗଠନ କରିପାରିବେ। ହେଲେ ତଥାପି ଉପ-ନିର୍ବାଚନରେ ​​କଂଗ୍ରେସର ଆଭିମୁଖ୍ୟ ସ୍ପଷ୍ଟ କରୁଛି ଯେ ଉଭୟ ଦଳ ଏକାଠି ହେବା ଏତେ ସହଜ ହେବ ନାହିଁ। ହେଲେ ତଥାପି ଲୋକସଭା ଆସନ ବଣ୍ଟନ ବହୁତ ଜଟିଳ ହେବ ନାହିଁ।