ପଶ୍ଚିମବଙ୍ଗରେ ପ୍ରଥମ ପର୍ଯ୍ୟାୟ ମତଦାନ ପାଇଁ ଶେଷ ହୋଇଛି ପ୍ରଚାର । ଥମିଛି ମାଇକର ଗର୍ଜନ, ହେଲେ ବଢ଼ିଛି ରାଜନୈତିକ ଉଷ୍ମତା । ଭୋଟରଙ୍କୁ ଆକୃଷ୍ଟ କରିବା ପାଇଁ ଶେଷ ମୁହୂର୍ତ୍ତରେ ସବୁ ବଳ ଲଗାଇ ଦେଇଛନ୍ତି ହେଭିୱେଟ୍‌ । ଗୋଟିଏ ପଟେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ମାରାଥନ ପ୍ରଚାର କରି ମହିଳା ସୁରକ୍ଷା ଓ ଗୋରଖା ଆନ୍ଦୋଳନ ପ୍ରସଙ୍ଗରେ ମମତା ସରକାରଙ୍କୁ ଘେରିଥିବା ବେଳେ, ଅନ୍ୟପଟେ ବରାନଗରରେ ପରିବର୍ତ୍ତନର ଆହ୍ବାନ ଦେଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।

ଥମିଲା ମାଇକ, ଶେଷ ହେଲା ପ୍ରଚାର । ପଶ୍ଚିମବଙ୍ଗରେ ପ୍ରଥମ ପର୍ଯ୍ୟାୟ ମତଦାନ ପୂର୍ବରୁ ଭୋଟରଙ୍କ ମନ ଜିଣିବାକୁ ମଇଦାନରେ ନିଜର ସବୁ ବଳ ଲଗାଇ ଦେଇଛନ୍ତି ରାଜନୈତିକ ଦଳ । ଏମିତିରେ ଶେଷ ଦିନରେ ବେଶ ରୋଚକ ହୋଇଛି କ୍ୟାମ୍ପେନ୍ ।

ପଶ୍ଚିମବଙ୍ଗରେ ପ୍ରଥମ ପର୍ଯ୍ୟାୟ ନିର୍ବାଚନକୁ ଆଉ ମାତ୍ର ଗୋଟିଏ ଦିନ ବାକି । ଏହା ପୂର୍ବରୁ ଆଜି ଶେଷ ହୋଇଛି ପ୍ରଚାର । ଯେଉଁଥିପାଇଁ ଆଜି ପ୍ରଚାର ମଇଦାନ ପୂରା ସରଗରମ ହୋଇଛି । ମେଦିନିପୁର, ସିଲିଗୁଡ଼ି ସମେତ ଉତ୍ତର ବଙ୍ଗରେ ମାରାଥନ ପ୍ରଚାର କରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ । ମମତା ସରକାରରେ ଭୁଶୁଡ଼ିଥିବା ଆଇନଶୃଙ୍ଖଳା ପରିସ୍ଥିତି ଏବଂ ବୃଦ୍ଧି ପାଉଥିବା ମହିଳା ଅପରାଧକୁ ନେଇ ଦିଦିଙ୍କୁ ଘେରିଛନ୍ତି । ଗୋରଖା ଆନ୍ଦୋଳନ ପ୍ରସଙ୍ଗ ଉଠାଇ ଖୋଲିଛନ୍ତି ଟିଏମସି ସରକାରର ପୋଲ୍ । କିଭଳି ମମତା ଗୋରଖା ଆନ୍ଦୋଳନକାରୀଙ୍କ ପ୍ରତି ସମ୍ବେଦନହୀନ ବ୍ୟବହାର କରିଛନ୍ତି ସେ ବିଷୟରେ ଉଲ୍ଲେଖ କରି ବିଜେପି କ୍ଷମତାକୁ ଆସିଲେ ଏହି ସମାଜର ସମସ୍ତ ସମସ୍ୟାର ସମାଧାନ କରିବ ବୋଲି ପ୍ରତିଶ୍ରୁତି ଦେଇଛନ୍ତି ଶାହ ।

ସେପଟେ ଦମ୍ ଦମ୍ ଲୋକସଭା ଅନ୍ତର୍ଗତ ବରାନଗର ନିର୍ବାଚନ ମଣ୍ଡଳୀରେ ମଇଦାନକୁ ଓହ୍ଲାଇ ମମତା ସରକାର ଉପରେ ବର୍ଷିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଏହି ଅସବରରେ ଆସନ୍ତା ୪ ମଇରେ ବିଜେପି ବଙ୍ଗରେ ସରକାର ଗଢୁଥିବା କହି ଦେଇଛନ୍ତି ପରିବର୍ତ୍ତନର ଆହ୍ବାନ ।

ଉତ୍ତର ବଙ୍ଗରେ ସୀମା ସୁରକ୍ଷା ଏକ ବଡ଼ ସମସ୍ୟା ଭାବେ ଉଭା ହୋଇଛି । ରାଜ୍ୟରେ ଅନୁପ୍ରବେଶକାରୀଙ୍କ ସଂସ୍ୟା ବୃଦ୍ଧି ପାଉଥିବା ବେଳେ ଏହାକୁ ନିୟନ୍ତ୍ରଣ କରିବାରେ ଫେଲ୍ ମାରିଛନ୍ତି ମମତା ସରକାର । ଯାହାକୁ ଏଥର ବଡ଼ ମୁଦ୍ଦା କରିଛି ବିଜେପି । ତେବେ ଚଳିତ ଥର ଦିଦି ବଙ୍ଗୀୟ ଅସ୍ମିତାକୁ ଅସ୍ତ୍ର କରିଥିବା ଦେଖିବାକୁ ମିଳୁଛି । ୨୦୨୧ରେ ଉତ୍ତର ବଙ୍ଗରେ ବିଜେପି ଭଲ ପ୍ରଦର୍ଶନ କରିଥିବା ବେଳେ ଚଳିତ ଥର କାହା ପକ୍ଷରେ ରହିବ ଜନମତ ତାହା ସମୟ କହିବ ।