ପଶ୍ଚିମବଙ୍ଗରେ ରାଜନୀତି ନିର୍ବାଚନ ପରେ ମଧ୍ୟ ବେଶ ସରଗରମ । ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ତଥା ଟିଏମସି ସୁପ୍ରିମୋଙ୍କୁ ଲାଗୁଛି ଗୋଟିଏ ପରେ ଗୋଟିଏ ଝଟକା । ଦଳ ଭିତରେ ଅନ୍ତଃକନ୍ଦଳ ଲାଗି ରହିଥିବାବେଳେ ବିଧାୟକ ଓ ସାଂସଦ ବିଦ୍ରୋହୀ ସାଜିଛନ୍ତି । ଏହାରି ଭିତରେ ଏବେ ଶୁଭେନ୍ଦୁ ସରକାର ଦିଦିଙ୍କୁ ଆଉ ଏକ ଝଟକା ଦେଇଛନ୍ତି । ଦିଦିଙ୍କ 'ଏପାଙ୍ଗ ଓପାଙ୍ଗ ଝପାଙ୍ଗ' ଉପରେ ରୋକ୍ ଲଗାଇଛନ୍ତି ସିଏମ ଶୁଭେନ୍ଦୁ ।

ଶୁଭେନ୍ଦୁ ସରକାର ଗୋଟିଏ ପଟେ ସରକାରୀ ପୁସ୍ତକାଳୟରେ ମମତା ବାନାର୍ଜୀଙ୍କ ଦ୍ଵାରା ଲିଖିତ ପୁସ୍ତକଗୁଡ଼ିକୁ ହଟାଇବାକୁ ନିଷ୍ପତ୍ତି ନେଇଛନ୍ତି । ସେପଟେ ଟିଏମସି ଶାସନରେ ୬୩୫ କୋଟି ଟଙ୍କାର ଏକ ମହା ବିଜ୍ଞାପନ ଘୋଟାଲାର ଫାଇଲ୍ ଖୋଲି ଯାଞ୍ଚ କରିବାକୁ ନିର୍ଦ୍ଦେଶ ଦେଇଛନ୍ତି । ତେବେ ପ୍ରଥମେ ଆସନ୍ତୁ ଜାଣିନେବା ଦିଦିଙ୍କ 'ଏପାଙ୍ଗ ଓପାଙ୍ଗ ଝପାଙ୍ଗ' କଣ ?

• ଏପାଙ୍ଗ ଓପାଙ୍ଗ ଝପାଙ୍ଗ କଣ ?

"ଏପାଙ୍ଗ ଓପାଙ୍ଗ ଝପାଙ୍ଗ" ମୂଳତଃ ଏକ ପିଲାଙ୍କ ଏନର୍ଜି ଡ୍ରିଙ୍କ ବିଜ୍ଞାପନ ପାଇଁ ଏକ ଜିଙ୍ଗଲ୍ ଥିଲା ଏବଂ ବଙ୍ଗଳାରେ ଏହାର କୌଣସି ସିଧା ଅର୍ଥ ନାହିଁ । ବିରୋଧୀ ଦଳଗୁଡ଼ିକ ମମତା ବାନାର୍ଜୀଙ୍କୁ ତାଙ୍କ କବିତାରେ ଏହି ଶବ୍ଦଗୁଡ଼ିକ ବ୍ୟବହାର କରିବା ପରଠାରୁ ତାଚ୍ଛଲ୍ୟ କରିଆସୁଛନ୍ତି । ୨୦୨୨ରେ, ମମତା ବାନାର୍ଜୀ ତାଙ୍କ କବିତା ସଂଗ୍ରହ "କବିତା ବିତାନ୍" ପାଇଁ ବଙ୍ଗଳା ଏକାଡେମୀ ପୁରସ୍କାର ପାଇଥିଲେ। ସେହି ସମୟରେ, କବିତାଟି ସାହିତ୍ୟିକ ଏବଂ ରାଜନୈତିକ ବିତର୍କକୁ ଆରମ୍ଭ କରିଥିଲା । ସାହିତ୍ୟିକ ଭାଷାରେ ଏପରି କବିତାକୁ "ନନସେନ୍ସ କବିତା" କିମ୍ବା "ଅର୍ଥହୀନ କବିତା" କୁହାଯାଏ ବୋଲି ବିରୋଧୀ କହିଥିଲେ ।

ପଢନ୍ତୁ ଏହି ଖବର: ମମତାଙ୍କ ସାୟନି ସାଜିଲେ ବିଦ୍ରୋହୀ, ୧୭ବର୍ଷରେ ସାଜିଥିଲେ ହିରୋଇନ୍‌; ପାଖରେ ରଖିଛନ୍ତି କେତେ ସମ୍ପତ୍ତି ?

ଏବେ ଏହି ପୁସ୍ତକଗୁଡ଼ିକୁ ପଶ୍ଚିମବଙ୍ଗ ରାଜ୍ୟ ପୁସ୍ତକାଳୟରୁ ହଟାଇବା ଉପରେ ବିଚାର କରାଯାଉଛି । ଏ ନେଇ ପଶ୍ଚିମବଙ୍ଗ ପୁସ୍ତକାଳୟ ମନ୍ତ୍ରୀ ଗିରିଶଙ୍କର ଘୋଷ ସ୍ପଷ୍ଟ ଭାବରେ କହିଛନ୍ତି, "ଲୋକମାନେ ଜ୍ଞାନ ଅର୍ଜନ କରିବା ପାଇଁ ପାଠାଗାରକୁ ଯାଆନ୍ତି । ତେଣୁ ସେଠାରେ ଉପଲବ୍ଧ ପୁସ୍ତକଗୁଡ଼ିକ ରହିବା ଆବଶ୍ୟକ, ଯାହାକୁ ପଢ଼ାଯାଇ ଲୋକଙ୍କ ଜ୍ଞାନକୁ ସମୃଦ୍ଧ କରାଯାଇପାରିବ ।"

• ରାଜ୍ୟର ବିଭିନ୍ନ ପାଠାଗାରରୁ ହଟିବ ଦିଦିଙ୍କ ପୁସ୍ତକ

ଘୋଷ ଆହୁରି କହିଛନ୍ତି, "ରାଜ୍ୟର ସମସ୍ତ ପାଠାଗାରରୁ ଅପାଙ୍ଗ ଓପାଙ୍ଗ ଝପାଙ୍ଗ ହଟାଇ ଦିଆଯିବ।" ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଦ୍ୱାରା ଲିଖିତ ପୁସ୍ତକଗୁଡ଼ିକୁ ମଧ୍ୟ ପାଠାଗାରରୁ ବାଦ ଦିଆଯିବ କି ବୋଲି ପଚରାଯିବାରୁ ମନ୍ତ୍ରୀ କହିଥିଲେ, "ପିଲାଙ୍କ ମନ ବିକଶିତ ନ କରୁଥିବା ସମସ୍ତ ପାଠ୍ୟପୁସ୍ତକ ରଖି ମୁଁ ସ୍ଥାନ ନଷ୍ଟ କରିବି ନାହିଁ । ସେମାନଙ୍କ ସ୍ଥାନରେ ପାଠାଗାରରେ ରବିନ୍ଦ୍ରନାଥ, ନଜରୁଲ୍ ଇସଲାମ୍ ଏବଂ ବିବେକାନନ୍ଦଙ୍କ ପୁସ୍ତକ ରହିବ । ଶିବାଜୀ ଏବଂ ରାଣା ପ୍ରତାପଙ୍କ ଜୀବନୀ ରହିବ ।"

• ୫୧୫ଟି ପୁସ୍ତକ ମଧ୍ୟରୁ ୯୦ଟି ପୁସ୍ତକ ମମତାଙ୍କର

ସୂଚନା ଥାଉ କି, ଜୁନ ୨୦୨୫ରେ ତତ୍କାଳୀନ ମମତା ବାନାର୍ଜୀ ସରକାର ତାଙ୍କର ପ୍ରାୟ ୯୦ଟି ପୁସ୍ତକକୁ ସ୍କୁଲ ପାଠାଗାରରେ ସାମିଲ କରିବାକୁ ନିର୍ଦ୍ଦେଶ ଦେଇଥିଲେ ଏବଂ ସ୍କୁଲଗୁଡ଼ିକୁ ଆର୍ଥିକ ସହାୟତା ପ୍ରଦାନ କରିଥିଲେ । ତାଲିକାରେ ଥିବା ୫୧୫ଟି ପୁସ୍ତକ ମଧ୍ୟରୁ ପ୍ରାୟ ୯୦ଟି ମମତା ବାନାର୍ଜୀଙ୍କ ଦ୍ୱାରା ରଚିତ । ଏଥିପାଇଁ ମାଧ୍ୟମିକ ଏବଂ ଉଚ୍ଚ ମାଧ୍ୟମିକ ବିଦ୍ୟାଳୟଗୁଡ଼ିକୁ ପାଣ୍ଠି ଯୋଗାଇ ଦିଆଯାଇଥିଲା । ପ୍ରତ୍ୟେକ ସ୍କୁଲ ପାଇଁ ୧ ଲକ୍ଷ ଟଙ୍କା ବ୍ୟୟବରାଦ କରାଯାଇଥିଲା । କିନ୍ତୁ ରାଜ୍ୟରେ ନୂଆ ବିଜେପି ସରକାର ଏବେ ସେହି ନିଷ୍ପତ୍ତିଗୁଡ଼ିକୁ ପରିବର୍ତ୍ତନ କରି କେବଳ "ସୂଚନାମୂଳକ" ସାହିତ୍ୟ ଉପରେ ଧ୍ୟାନ ଦେଉଛି ।