Hera Panchami Ritual / ସମ୍ପନ୍ନ ହେଲା ହେରାପଞ୍ଚମୀ ନୀତି, ଆଜିଠୁ ବାହୁଡ଼ା ଯାତ୍ରା ପାଇଁ ପ୍ରସ୍ତୁତି ଆରମ୍ଭ

ରାଗିଲେ ମା’ ଲକ୍ଷ୍ମୀ, ଭାଙ୍ଗିଲେ ନନ୍ଦିଘୋଷ ରଥ । ବିଳମ୍ବିତ ରାତିରେ ଶ୍ରୀଗୁଣ୍ଡିଚା ମନ୍ଦିରରେ ସମ୍ପନ୍ନ ହେଲା ହେରାପଞ୍ଚମୀ ନୀତି । ମହାପ୍ରଭୁ ଶ୍ରୀଜଗନ୍ନାଥ ଭାଇ-ଭଉଣୀଙ୍କୁ ସାଙ୍ଗରେ ଘେନି ଗୁଣ୍ଡିଚା ଘରକୁ ଚାଲିଆସିଥିବାରୁ, ବିରହ ବେଦନା ଓ ଅଭିମାନ ସହି ନପାରି ମା’ ଲକ୍ଷ୍ମୀ ଠାକୁରାଣୀ ମା’ ବିମଳାଙ୍କ ପରାମର୍ଶ କ୍ରମେ ଗୋପନରେ ଶ୍ରୀଗୁଣ୍ଡିଚା ମନ୍ଦିରକୁ ଆସିଥିଲେ ।

ବିଳମ୍ବିତ ରାତି ପ୍ରାୟ ୧୨ଟାରେ ମା’ ଲକ୍ଷ୍ମୀ ଘଣ୍ଟ, କାହାଳୀ ଶୋଭାଯାତ୍ରାରେ ଶ୍ରୀମନ୍ଦିରରୁ ବାହାରି ଶ୍ରୀଗୁଣ୍ଡିଚା ମନ୍ଦିରରେ ପହଞ୍ଚିଥିଲେ । ଜୟ ବିଜୟ ଦ୍ୱାର ନିକଟରେ ମହାପ୍ରଭୁଙ୍କ ଦର୍ଶନ କରିଥିଲେ ମଧ୍ୟ ସନ୍ଧ୍ୟାଧୂପ ଚାଲିଥିବାରୁ ଦ୍ୱାର ବନ୍ଦ ରହିଥିଲା । ଫଳରେ ଅପମାନିତ ମନେ କରି ମା' କ୍ରୋଧାନ୍ବିତ ହୋଇପଡ଼ିଥିଲେ । ରାଗ ଓ ଅଭିମାନରେ ନାକଚଣା ଦ୍ୱାର ଦେଇ ବାହାରିବା ସମୟରେ ମା' ଲକ୍ଷ୍ମୀ ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥର କାଠ ଭାଙ୍ଗି ଦେଇଥିଲେ । ରଥ ଭାଙ୍ଗିବା ପରେ ମା’ ଆଉ ବଡ଼ଦାଣ୍ଡ ବାଟେ ନଫେରି, ନିରାଡ଼ମ୍ବର ଭାବେ 'ହେରାଗୋହିରି ସାହି' ଦେଇ ଶ୍ରୀମନ୍ଦିରକୁ ପ୍ରତ୍ୟାବର୍ତ୍ତନ କରିଥିଲେ । ରାତି ୩ଟା ସୁଦ୍ଧା ଏହି ସମସ୍ତ ନୀତିକାନ୍ତି ସମ୍ପୂର୍ଣ୍ଣ ହୋଇଥିଲା । ମହାପ୍ରଭୁଙ୍କ ଏହି ଅପରୂପ ଦାମ୍ପତ୍ୟ ଲୀଳା ଦେଖିବା ପାଇଁ ବଡ଼ଦାଣ୍ଡରେ ହଜାର ହଜାର ଭକ୍ତଙ୍କ ଗହଳି ଜମିଥିଲା ।

ଅଧିକ ପଢ଼ନ୍ତୁ: ଆଡ଼ପ ଦର୍ଶନ ପାଇଁ ଶ୍ରୀକ୍ଷେତ୍ରରେ ଭକ୍ତଙ୍କ ଗହଳି; ଅବଢା ପାଇଁ ଆନନ୍ଦିତ ଭକ୍ତ

ସେପଟେ ଆଜି ପବିତ୍ର ନବଦିନାତ୍ମକ ଯାତ୍ରାର ଷଷ୍ଠ ଦିନ ତଥା ସପ୍ତମୀ ତିଥି । ମହାପ୍ରଭୁଙ୍କ ଶ୍ରୀମନ୍ଦିର ବାହୁଡ଼ା ଯାତ୍ରା ପାଇଁ ଆଜିଠାରୁ ପ୍ରସ୍ତୁତି ଆରମ୍ଭ ହେବ । ଏହି କ୍ରମରେ ଆଜି ଗୁଣ୍ଡିଚା ମନ୍ଦିର ସମ୍ମୁଖରେ ଥିବା ତିନି ରଥର ଦକ୍ଷିଣମୋଡ଼ ହେବ । ସକାଳ ଧୂପ ପରେ ମଧ୍ୟାହ୍ନ ପ୍ରାୟ ସାଢେ ୧୨ଟା ସୁଦ୍ଧା ତିନି ଦିଅଁଙ୍କ ଶ୍ରୀଅଙ୍ଗରୁ ଆଜ୍ଞାମାଳ ଆସି ରଥରେ ଲାଗି ହେବ । ମହାପ୍ରଭୁଙ୍କ ଆଜ୍ଞା ପାଇବା ପରେ ରଥ ଦକ୍ଷିଣମୋଡ଼ ନେବ । ପ୍ରଥମେ ଦେବୀ ସୁଭଦ୍ରାଙ୍କ ଦର୍ପଦଳନ, ପରେ ପ୍ରଭୁ ବଳଭଦ୍ରଙ୍କ ତାଳଧ୍ୱଜ ଏବଂ ଶେଷରେ ମହାପ୍ରଭୁ ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥର ଦକ୍ଷିଣ ମୋଡ କରାଯିବ । ରଥଯାତ୍ରା ପରଠାରୁ ଉତ୍ତରମୁହାଁ ହୋଇ ରହିଥିବା ତିନି ରଥ ଆଜି ଦକ୍ଷିଣମୋଡ଼ ନେଇ ନାକଚଣା ଦ୍ୱାରସ୍ଥିତ ଶରଧାବାଲିରେ ବିଜେ କରିବେ । ଏଥିପାଇଁ ଶରଧାବାଲିକୁ ସଫାସୁତରା କରାଯାଇ ସମତୁଲ କରାଯାଇଛି ।