RSS Volunteers in Puri / ପୁରୀରେ ସେବା ପଥରେ ସଂଘ ପରିବାର, ୩୦ ଜିଲ୍ଲାରୁ ୩୦୦୦ରୁ ଅଧିକ ସ୍ୱୟଂସେବକ ସାମିଲ

କୌଣସି ପଦବୀର ମୋହ ନାହିଁ, ନାହିଁ କୌଣସି ପ୍ରଶଂସାର ଆଶା । ସ୍ବୟଂ ସେବକଙ୍କର ଶୃଙ୍ଖଳିତ ଓ ନିଶ୍ୱାର୍ଥପର ସେବା ଯୋଗୁଁ ହିଁ ଚଳିତ ବର୍ଷ ବଡ଼ଦାଣ୍ଡରେ କୌଣସି ଅପ୍ରୀତିକର ପରିସ୍ଥିତି ସୃଷ୍ଟି ହୋଇନାହିଁ । ଲକ୍ଷ ଲକ୍ଷ ଶ୍ରଦ୍ଧାଳୁ ସୁରକ୍ଷିତ ଭାବେ କାଳିଆର ଦର୍ଶନ କରି ଫେରିଛନ୍ତି । ଭିଡ଼ ଭିତରେ କିଏ କାଦୁଅରେ ପଡ଼ିଯାଇଥିଲେ ତ କିଏ ନିଶ୍ୱାସ ନେଇପାରୁନଥିଲେ । ଏପରି ସ୍ଥିତିରେ ଅସୁସ୍ଥଙ୍କୁ ଆମ୍ବୁଲାନ୍ସରେ ନେଇ ହସ୍ପିଟାଲ୍ ପହଞ୍ଚାଇଥିଲେ ସ୍ବୟଂ ସେବକ ।

ମାନବ ସେବା ହିଁ ମାଧବ ସେବା । ଜଗନ୍ନାଥ ସଂସ୍କୃତିର ମୂଳମନ୍ତ୍ରକୁ ସାର୍ଥକ କରିଛନ୍ତି ସ୍ବୟଂସେବକ । ବଡ଼ଦାଣ୍ଡରେ ଭକ୍ତ ଓ ଭଗବାନଙ୍କ ମହାମିଳନ । ପ୍ରତିକୂଳ ପରିସ୍ଥିତିରେ, ସଙ୍କଟ କାଳରେ ପ୍ରଶାସନ ସହିତ କାନ୍ଧକୁ କାନ୍ଧ ମିଳାଇ ଆଗେଇ ଆସିଥିଲେ ହଜାର ହଜାର ରାଷ୍ଟ୍ରବାଦୀ ସ୍ୱେଚ୍ଛାସେବୀ । ସେବା ପଥରେ ସାଜିଥିଲେ ଦେବଦୂତ । ଗତକାଲିର ପ୍ରବଳ ବର୍ଷା ପରେ ଆଜି ବଡ଼ଦାଣ୍ଡରେ ବଢ଼ି ଚାଲିଥିଲା ଅସହ୍ୟ ଗୁଳୁଗୁଳି । ଲୋକେ ଝାଳରେ ଭିଜୁଥିଲେ ।

ଲକ୍ଷ ଲକ୍ଷ ଜନସମୁଦ୍ରର ଚାପ ମଧ୍ୟରେ ଶ୍ୱାସରୁଦ୍ଧ ହୋଇ ଅନେକ ଶ୍ରଦ୍ଧାଳୁ ହଠାତ୍ ଚେତାଶୂନ୍ୟ ହୋଇ ପଡ଼ିଥିଲେ । ବଡ଼ଦାଣ୍ଡରେ ଜରୁରୀକାଳୀନ ସ୍ଥିତି ସୃଷ୍ଟି ହୋଇଥିବାବେଳେ ଦେବଦୂତ ସାଜିଛନ୍ତି ଓଡ଼ିଶାର ସମସ୍ତ ୩୦ଟି ଜିଲ୍ଲାରୁ ୩ ହଜାରରୁ ଅଧିକ ରାଷ୍ଟ୍ରୀୟ ସ୍ୱୟଂସେବକ ସଂଘର ସ୍ୱୟଂସେବକ । ଉତ୍କଳ ବିପନ୍ନ ସହାୟତା ସମିତିର ପ୍ରତ୍ୟକ୍ଷ ସହଯୋଗରେ କର୍ମକର୍ତ୍ତାମାନେ ବଡ଼ଦାଣ୍ଡର କୋଣ ଅନୁକୋଣରେ ହୋଇଥିଲେ ମୁତୟନ ।

କେବଳ ପାଣି ବାଣ୍ଟିବା ନୁହେଁ, ଏଥର ସଂଘ ପରିବାର ପକ୍ଷରୁ ବଡ଼ଦାଣ୍ଡରେ ମୋଟ୍ ୯ ପ୍ରକାରର ସେବା ଯୋଗାଇ ଦିଆଯାଇଥିଲା । ପ୍ରବଳ ଗୁଳୁଗୁଳିରୁ ଶ୍ରଦ୍ଧାଳୁଙ୍କୁ ଆଶ୍ୱସ୍ତି ଦେବା ପାଇଁ ବଡ଼ଦାଣ୍ଡରେ ଶ୍ରଦ୍ଧାଳୁଙ୍କ ଉପରକୁ ଲଗାତାର ଜଳ ସିଞ୍ଚନ କରାଯାଉଥିଲା । ଏହା ସହିତ ସ୍ୱତନ୍ତ୍ର ପ୍ରାଥମିକ ଚିକିତ୍ସା କ୍ୟାମ୍ପ, ଶୀତଳ ପାନୀୟ ଜଳ ବଣ୍ଟନ, ଷ୍ଟ୍ରେଚର ସେବା ଏବଂ ବଡ଼ଦାଣ୍ଡକୁ ସ୍ୱଚ୍ଛ ଓ ନିର୍ମଳ ରଖିବା ପାଇଁ ଚାଲିଥିଲା ସ୍ୱଚ୍ଛତା ଅଭିଯାନ । ବିଶ୍ୱ ହିନ୍ଦୁ ପରିଷଦ, ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ଓ ହିନ୍ଦୁ ଜାଗରଣ ମଞ୍ଚର କାର୍ଯ୍ୟକର୍ତ୍ତା ମଧ୍ୟ ମହାଯଜ୍ଞରେ ସାମିଲ ହୋଇଥିଲେ । ଉତ୍କଳ ବିପନ୍ନ ସହାୟତା ସମିତି ଓ RSS ପକ୍ଷରୁ ଖୋଲାଯାଇଥିବା ପ୍ରାଥମିକ ଚିକିତ୍ସା କେନ୍ଦ୍ରରେ ଅସୁସ୍ଥ ଓ ଆହତ ଶ୍ରଦ୍ଧାଳୁଙ୍କୁ ମାଗଣାରେ ଔଷଧ ଓ ଡାକ୍ତରୀ ସେବା ପ୍ରଦାନ କରାଯାଉଛି ।

ସବୁଠାରୁ ବଡ଼ ଚ୍ୟାଲେଞ୍ଜ ଥିଲା ଅସୁସ୍ଥ ଶ୍ରଦ୍ଧାଳୁଙ୍କ ଜୀବନ ରକ୍ଷା କରିବା । ପ୍ରବଳ ଭିଡ଼ ଓ ବର୍ଷା ଯୋଗୁଁ ରାସ୍ତା ଜାମ୍ ଥିବା ବେଳେ ଆମ୍ବୁଲାନ୍ସ ଯିବା ଅସମ୍ଭବ ମନେ ହେଉଥିଲେ ବି ସ୍ୱୟଂସେବକମାନେ ନିଜ ଜୀବନକୁ ବାଜି ଲଗାଇ ଲକ୍ଷ ଲକ୍ଷ ଲୋକଙ୍କ ଭିତରେ ଏକ ଦୃଢ଼ ମାନବ ଶୃଙ୍ଖଳା ତିଆରି କରିଥିଲେ । ନିଜ ଶରୀରକୁ ପ୍ରାଚୀର ସଦୃଶ ଛିଡ଼ା କରି ଆମ୍ବୁଲାନ୍ସ ଯିବା ପାଇଁ ପ୍ରସ୍ତୁତ କରିଥିଲେ ସ୍ବତନ୍ତ୍ର ଗ୍ରୀନ୍ କରିଡର । ଏପରି ବିପତ୍ତି ସମୟରେ ରାଷ୍ଟ୍ରବାଦୀ ସଂଗଠନଗୁଡ଼ିକର ସେବା ପ୍ରମାଣିତ କରିଛି ଯେ, ମାନବ ଜାତିର ସେବା ହିଁ ଈଶ୍ୱରଙ୍କର ସବୁଠାରୁ ବଡ଼ ପୂଜା ।