Adharapana Niti / ଆଜି ରଥ ଉପରେ ଅନୁଷ୍ଠିତ ହେବ ଅଧରପଣା ନୀତି…

ରଥଯାତ୍ରାର ଶେଷ ପର୍ବ ପୂର୍ବରୁ ଶ୍ରୀକ୍ଷେତ୍ରର ପବିତ୍ର ପରିବେଶ ଆଜି ଆହୁରି ଭାବବିହ୍ୱଳ । ମହାପ୍ରଭୁଙ୍କ ଅଧର ସ୍ପର୍ଶରେ ପବିତ୍ର ହେଉଥିବା ଦିବ୍ୟ ‘ଅଧର ପଣା’ ନୀତିକୁ ନେଇ ଭକ୍ତମାନଙ୍କ ମନରେ ଉତ୍ସାହ ଓ ଆଧ୍ୟାତ୍ମିକ ଉତ୍କଣ୍ଠା ଚରମସୀମାରେ ପହଞ୍ଚିଛି । ଆସନ୍ତାକାଲି ପତିତପାବନ ଶ୍ରୀଜଗନ୍ନାଥ ରତ୍ନସିଂହାସନକୁ ବାହୁଡ଼ିବା ପୂର୍ବରୁ, ଆଜିର ଏହି ଅନନ୍ୟ ନୀତି ରଥଯାତ୍ରାର ଏକ ରହସ୍ୟମୟ ଓ ଦିବ୍ୟ ପରମ୍ପରାକୁ ପୁଣିଥରେ ଜୀବନ୍ତ କରିଦେବ ।

ଆସନ୍ତାକାଲି ପତିତପାବନ ଯାତ୍ରାର ଲୀଳାଖେଳା ସାରି ରତ୍ନସିଂହାସନକୁ ବାହୁଡ଼ିବେ ମହାବାହୁ । ଆଜି ଗରୁଡ ଶୟନ ଦ୍ୱାଦଶୀ ତିଥିରେ ରଥ ଉପରେ ଅନୁଷ୍ଠିତ ହେବ ମହାପ୍ରଭୁଙ୍କ ଅଧର ପଣା ନୀତି । ମଧ୍ୟାହ୍ନ ଧୂପ ସରିବା ପରେ ଏହି ନୀତି ଅନୁଷ୍ଠିତ ହେବ । ରାତି ୮ ଟା ବେଳକୁ ଏହି ନୀତି ସମ୍ପାଦିତ ହେବା ନେଇ ନୀତି ନିର୍ଘଣ୍ଟ ହୋଇଛି ।

ମହାପ୍ରଭୁଙ୍କ ଅଧର ଚୁମିତ ପଣାକୁ ପାଇବା ପାଇଁ ପାର୍ଶ୍ଵ ଦେବାଦେବୀଙ୍କ ସହ ଅଶରୀର ମାନେ ଚାହିଁ ରହିଥାନ୍ତି ବୋଲି ମତ ରହିଛି । ସ୍ୱତନ୍ତ୍ର ଭାବେ ଏହି ପଣାକୁ ଶ୍ରୀବିଗ୍ରହ ମାନଙ୍କର ଅଧର ପର୍ଯ୍ୟନ୍ତ ମାପ ରେ ନିର୍ମିତ ତିନି ତିନଟି ତୁମ୍ଭାକାର ହାଣ୍ଡିରେ ପ୍ରସ୍ତୁତ କରାଯାଇଥାଏ । ଯଜ୍ଞ ପୂଜା ଦ୍ୱାରା ରଥଯାତ୍ରା ସମୟରେ ଶ୍ରୀଜିଉମାନଙ୍କ ସହିତ ବହୁ ଦେବାଦେବୀ ,ଚଣ୍ଡୀ,ଚାମୁଣ୍ଡା ମଧ୍ୟ ଯାତ୍ରା କରିଥାନ୍ତି ।

ସେମାନଙ୍କ ସନ୍ତୁଷ୍ଟି ପାଇଁ ସ୍ୱତନ୍ତ୍ର ଭାବେ ବଡଓଡ଼ିଆ ମଠ, ରାଘବଦାସ ମଠ ଓ ଶ୍ରୀମନ୍ଦିର ପ୍ରଶାସନ ପକ୍ଷରୁ ଏହି ପଣା ସାମଗ୍ରୀ ଯୋଗାଇ ଦିଆଯାଏ । ଛେନା ,ଛାଚି , କ୍ଷୀର ,ସର,ଗୋଲମରିଚ ,କର୍ପୁର ,ଜାଇଫଳ,କଦଳୀ ଆଦିକୁ ମିଶ୍ରଣ କରାଯାଇ ପଣା ପ୍ରସ୍ତୁତ କରାଯିବା ସହ ଏହି ଅଧର ହାଣ୍ଡିକୁ ରଥ ଉପରେ ଭଙ୍ଗାଯିବାର ରହିଛି ଦିବ୍ୟ ପରମ୍ପରା ।