Adapa Darshan / ରାତି ପାହିଲେ ବାହୁଡ଼ା; ଆଜି ଗୁଣ୍ଡିଚା ମନ୍ଦିର ଆଡ଼ପ ମଣ୍ଡପରେ ଶେଷ ଦର୍ଶନ

ପୁରୀ: ରାତି ପାହିଲେ ବାହୁଡା ଦଶମୀ । ଜନ୍ମବେଦୀ ଛାଡି ରତ୍ନବେଦୀକୁ ବାହୁଡିବେ ମହାପ୍ରଭୁ । ଆଜି ଗୁଣ୍ଡିଚା ମନ୍ଦିର ଆଡପ ମଣ୍ଡପରେ ଶେଷ ଦର୍ଶନ ବା ନବମୀ ସଂଧ୍ୟା ଦର୍ଶନ । ସକାଳୁ ସଂଧ୍ୟା ୬ଟା ପର୍ଯ୍ୟନ୍ତ ଭକ୍ତଙ୍କ ପାଇଁ ଦର୍ଶନ ବ୍ୟବସ୍ଥା କରିଛି ପ୍ରଶାସନ। ପ୍ରବଳ ଭକ୍ତଙ୍କ ସମାଗମକୁ ଦୃଷ୍ଠିରେ ରଖି ଜିଲ୍ଲା ଓ ପୋଲିସ ପ୍ରଶାସନ ସମସ୍ତ ବ୍ୟବସ୍ଥା ଗ୍ରହଣ କରାଯାଇଛି ।

• ସକାଳ ୫ଟାରୁ ଚାଲିଛି ଦର୍ଶନ

ଗତକାଲି ରାତି ଅହେତୁକ ନୀତି ବିଳମ୍ବ ଯୋଗୁ ମହାପ୍ରଭୁଙ୍କ ରାତ୍ର ପହୁଡ଼ ୧ଟା ୩୦ରେ ହୋଇଥିଲା । ଆଜି ସକାଳୁ ୫ଟାରେ ଗୁଣ୍ଡିଚା ମନ୍ଦିର ଦ୍ୱାର ଫିଟା ପରେ ଚାଲିଛି ଦର୍ଶନ। ନୀତି ନିର୍ଘଣ୍ଟ ଅନୁଯାୟୀ ଆଜି ଭୋର ୫.୩୦ଟାରେ ମଙ୍ଗଳ ଆଳତି ହୋଇଥିବା ବେଳେ ୬ଟା ୪୦ରେ ଅବକାଶ ଓ ୧୦ଟା ସୁଦ୍ଧା ସରିଛି ଗୋପାଳ ବଲ୍ଲଭ ଓ ସକାଳ ଧୂପ ହୋଇଛି ।

• 'ଟ୍ରାଫିକ୍ ମାର୍ଗଦର୍ଶିକା ମାନି ପୁରୀ ଆସନ୍ତୁ'

ଏନେଇ ପୁରୀ ଏସପି ପ୍ରତୀକ ସିଂ କହିଛନ୍ତି, "ଶୃଙ୍ଖଳିତ ଭାବେ ଚାଲିଛି ଦର୍ଶନ। ଶ୍ରୀମନ୍ଦିର ପ୍ରଶାସନ ପକ୍ଷରୁ ଯେଉଁ ନିଷ୍ପତ୍ତି ହୋଇଛି ସେହି ଅନୁଯାୟୀ ଆଜି ସଂଧ୍ୟା ୬ଟା ପର୍ଯ୍ୟନ୍ତ ଦର୍ଶନ ଚାଲିବ । ଶ୍ରୀଗୁଣ୍ଡିଚା ମନ୍ଦିର ଭିତରେ ଏବଂ ବାହାରେ ବ୍ୟାପକ ସୁରକ୍ଷା ବ୍ୟବସ୍ଥା କଡାକଡି ହୋଇଛି । ଆସନ୍ତାକାଲି ବାହୁଡା ପାଇଁ ମଧ୍ୟ ଶ୍ରୀକ୍ଷେତ୍ର ହାଇଆଲଟରେ ରହିଛି ।" ତେବେ ବାହୁଡ଼ା ଏବଂ ସୁନାବେଶ ପାଇଁ ଜାରି ହୋଇଥିବା ଟ୍ରାଫିକ୍ ମାର୍ଗଦର୍ଶିକା ମାନି ପୁରୀ ଆସିବାକୁ ସେ ଭକ୍ତଙ୍କୁ ପରାମର୍ଶ ଦେଇଛନ୍ତି ।

• ଆଡ଼ପ ଦର୍ଶନର ସ୍ଵତନ୍ତ୍ରତା

ଆଡ଼ପ ମଣ୍ଡପରେ ସଂଧ୍ୟା ଦର୍ଶନର ସ୍ବତନ୍ତ୍ରତା ରହିଛି । ବର୍ଷ ତମାମ ଶ୍ରୀମନ୍ଦିରରେ ଶ୍ରୀଜିଉଙ୍କୁ ଦର୍ଶନ କରିବାରେ ଯେତିକି ପୂଣ୍ୟ ମିଳିଥାଏ ଆଡପ ମଣ୍ଡପରେ ଗୋଟିଏ ଦିନ ଦର୍ଶନ କଲେ ସେତିକି ପୂଣ୍ୟ ମିଳିଥାଏ ବୋଲି ବିଶ୍ବାସ ରହିଛି । ଦର୍ଶନ ପାଇଁ ଶରଧାବାଲି ଲୋକାରଣ୍ୟ ହୋଇଛି । ସେପଟେ ଆସନ୍ତାକାଲି ବାହୁଡା଼ଯାତ୍ରା ପହଣ୍ଡି ବିଜେ ସଅଳ କରିବାକୁ ବ୍ୟବସ୍ଥା ହୋଇଛି। | ଆଜି ସନ୍ଧ୍ୟା ଦର୍ଶନ ବା ଆଡ଼ପମଣ୍ଡପରେ ଶେଷ ଦର୍ଶନ ଯୋଗୁ ଗୁଣ୍ଡିଚା ମନ୍ଦିରରେ ଅସମ୍ଭବ ଭିଡ଼ ଦେଖିବାକୁ ମିଳିଛି।

ଅନ୍ୟପଟେ ବାହୁଡ଼ା ଯାତ୍ରା ପାଇଁ ନୀତି ନିର୍ଘଣ୍ଟ ହୋଇସାରିଛି । କେଉଁ ନୀତି କେତେବେଳେ ହେବ ନିମ୍ନରେ ଜାଣନ୍ତୁ:

ମଙ୍ଗଳ ଆଳତି- ଭୋର ୪ଟା
ମଇଲମ - ୪:୧୫ଟା
ତଡ଼ପଲାଗି - ୪:୩୦ଟା
ରୋଷହୋମ - ୪:୩୦ଟା
ଅବକାଶ - ୫ଟା
ସୂର୍ଯ୍ୟପୂଜା - ୫:୧୫ଟା
ଦ୍ୱାରପାଳ ପୂଜା - ୫:୩୦ଟା
ବେଶ ଶେଷ - ୫:୩୦ଟା
ଗୋପାଳବଲ୍ଲଭ ଓ ସକାଳ ଧୂପ ଖେଚୁଡ଼ି - ୫ଟା ୪୫ରୁ ୬ଟା ୪୫
ସେନାପଟା ଲାଗି - ୭ଟାରୁ ୧୧:୩୦ଟା)
ମଙ୍ଗଳାର୍ପଣ - ୧୧ ଟା ୪୫
ବାହୁଡ଼ା ପହଣ୍ଡି - ଦିବା ୧୨ଟାରୁ ୨ଟା ୩୦
ବେଶ ଶେଷ - ୧ଟାରୁ ୨ଟା ୩୦
ଗଜପତି ମହାରାଜାଙ୍କ ଦ୍ୱାରା ରାଜନୀତି ଓ ଛେରା ପହଁରା - ଅପରାହ୍ନ ୨ଟା ୩୦ରୁ ୩ଟା ୩୦
ଚାରମାଳ ଫିଟା ଓ ଘୋଡ଼ା ଲାଗିବା - ଅପରାହ୍ନ ୩ଟାରୁ ୪ଟା
ରଥଟଣା ଆରମ୍ଭ - ଅପରାହ୍ନ ୪ଟା