Last Adapa Darshan / ବନ୍ଦ ହେଲା ଚଳିତ ବର୍ଷର ଶେଷ ଦିନର ଆଡ଼ପ ଦର୍ଶନ; ବାହୁଡା ନୀତିକାନ୍ତି ପ୍ରସ୍ତୁତି ଆରମ୍ଭ

ପୁରୀ: ବନ୍ଦ ହେଲା ଚଳିତ ବର୍ଷର ଶେଷ ଦିନର ଆଡ଼ପ ଦର୍ଶନ । ବାହୁଡାଯାତ୍ରା ନୀତିକାନ୍ତି ପୂର୍ବ ପ୍ରସ୍ତୁତି ପାଇଁ ସନ୍ଧ୍ୟା ୬ଟାରୁ ଦର୍ଶନ ବନ୍ଦ କରାଯାଇଛି । ମଙ୍ଗଳ ଆଳତୀ ପର ଠାରୁ ଅର୍ଥାତ୍ ପ୍ରାୟ ୧୨ ଘଣ୍ଟା ଅହରହ ଦର୍ଶନ ହୋଇଥିଲା । ଆଜି ଶେଷ ଦିନରେ ଶ୍ରୀଗୁଣ୍ଡିଚା ମନ୍ଦିରରେ ଭକ୍ତଙ୍କ ପ୍ରବଳ ଗହଳି ଦେଖିବାକୁ ମିଳିଥିଲା । ବର୍ଷ ତମାମ ଶ୍ରୀମନ୍ଦିରରେ ଶ୍ରୀଜିଉଙ୍କୁ ଦର୍ଶନ କରିବାରେ ଯେତିକି ପୂଣ୍ୟ ମିଳିଥାଏ ଆଡପ ମଣ୍ଡପରେ ଗୋଟିଏ ଦିନ ଦର୍ଶନ କଲେ ସେତିକି ପୂଣ୍ୟ ମିଳିଥାଏ । ଏହି ବିଶ୍ଵାସରେ ପ୍ରବଳ ଭକ୍ତଙ୍କ ସମାଗମ ହୋଇଥିଲା ।

ଆସନ୍ତାକାଲି ବାହୁଡ଼ା ଯାତ୍ରା ପ୍ରସ୍ତୁତିକୁ ନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକ ଗଣମାଧ୍ୟମକୁ ସୂଚନା ଦେଇ କହିଛନ୍ତି, "ଏବେ ବାହୁଡ଼ା ଯାତ୍ରା ପୂର୍ବ ପ୍ରସ୍ତୁତି ସଠିକ୍ ଭାବରେ ହେବ । ପହଣ୍ଡି ପୂର୍ବରୁ ସେନାପଟା ଲାଗି ଓ ମଙ୍ଗଳାର୍ପଣ ପରେ ପହଣ୍ଡି ନୀତି ସୁରୁଖୁରୁରେ ହେବ । ଆସନ୍ତା ଜୁଲାଇ ୨୫ରେ ସୁନାବେଶ ରହିଛି । ନୀତି ବହୁଳତା ସତ୍ତ୍ୱେ ସମୟରେ ପହଞ୍ଚିବ ରଥ । ମାଉସୀ ମା' ମନ୍ଦିର ନିକଟରେ ପୋଡ ପିଠା, ଶ୍ରୀନଅର ନିକଟରେ ଲକ୍ଷ୍ମୀ ନାରାୟଣ ଭେଟ ହେବା ପରେ ରଥ ସଠିକ୍ ସମୟରେ ସିଂହଦ୍ୱାରରେ ପହଞ୍ଚିବ । ପୁଣି ରାତିସାରା ସୁନାବେଶ ପାଇଁ ବ୍ୟାରିକେଡ଼ ପ୍ରସ୍ତୁତ କରାଯିବ ।"

• ଏଥର ଭିଜିବ ବାହୁଡ଼ା

ସେପଟେ IMDର ସୂଚନା ଅନୁଯାୟୀ ଆସନ୍ତାକାଲି ଝିପିଝିପି ବର୍ଷା ରହିଛି । ମୁଖ୍ୟ ପ୍ରଶାସକ କହିଛନ୍ତି ପ୍ରତି ଦୁଇ ଘଣ୍ଟାରେ ଥରେ IMD ସହ ଯୋଗାଯୋଗ ରଖା କରି ସୂଚନା ଅଣାଯାଉଛି । ରାଜ୍ୟରେ ଘୂର୍ଣ୍ଣିବଳୟ ସକ୍ରିୟ ରହିଛି । ଏହାର ପ୍ରଭାବରେ ଆଗାମୀ ଦୁଇ ଦିନ ବର୍ଷା ଜାରି ରହିବ । ବିଜୁଳି ଘଡ଼ଘଡ଼ି ସହ ବିଭିନ୍ନ ସ୍ଥାନରେ ପ୍ରବଳ ବର୍ଷା ହେବ । ଗତ କିଛି ଦିନ ହେବ ରାଜ୍ୟରେ ଜାରି ରହିଛି ବର୍ଷା । ଆସନ୍ତାକାଲି ବାହୁଡ଼ା ଥିବାରୁ ବର୍ଷାରେ ଭିଜିବ ବାହୁଡ଼ା ଯାତ୍ରା ।

• ଆଜି ସକାଳ ୫ଟାରୁ ଚାଲିଥିଲା ଦର୍ଶନ

ବୁଧବାର ରାତି ଅହେତୁକ ନୀତି ବିଳମ୍ବ ଯୋଗୁ ମହାପ୍ରଭୁଙ୍କ ରାତ୍ର ପହୁଡ଼ ୧ଟା ୩୦ରେ ହୋଇଥିଲା । ଆଜି (ଗୁରୁବାର) ସକାଳୁ ୫ଟାରେ ଗୁଣ୍ଡିଚା ମନ୍ଦିର ଦ୍ୱାର ଫିଟା ପରେ ଚାଲିଥିଲା ଦର୍ଶନ । ନୀତି ନିର୍ଘଣ୍ଟ ଅନୁଯାୟୀ ଆଜି ଭୋର ୫.୩୦ଟାରେ ମଙ୍ଗଳ ଆଳତି ହୋଇଥିବା ବେଳେ ୬ଟା ୪୦ରେ ଅବକାଶ ଓ ୧୦ଟା ସୁଦ୍ଧା ସରିଛି ଗୋପାଳ ବଲ୍ଲଭ ଓ ସକାଳ ଧୂପ ହୋଇଥିଲା ।

ପଢନ୍ତୁ ଏହି ଖବର: ବାହୁଡ଼ା ପୂର୍ବରୁ ଚାଲିଛି ପୋଡ଼ପିଠା ପ୍ରସ୍ତୁତି, ମାଉସୀ ମା’ ହାତରୁ ପୋଡ଼ପିଠା ଖାଇବେ ମହାବାହୁ

• 'ଟ୍ରାଫିକ୍ ମାର୍ଗଦର୍ଶିକା ମାନି ପୁରୀ ଆସନ୍ତୁ'

ବାହୁଡ଼ା, ସୁନାବେଶ ନେଇ ପୁରୀରେ ପ୍ରବଳ ଭିଡ଼ ହୋଇପାରେ । ଭକ୍ତମାନେ ଯେପରି ସଠିକ୍ ଭାବେ ଆସି ପହଞ୍ଚି ମହାପ୍ରଭୁଙ୍କ ଦର୍ଶନ କରିପାରିବେ ସେଥିଲାଗି ସ୍ଵତନ୍ତ୍ର ବ୍ୟବସ୍ଥା ହୋଇଛି । ଏନେଇ ପୁରୀ ଏସପି ପ୍ରତୀକ ସିଂ କହିଛନ୍ତି, "ଆସନ୍ତାକାଲି ବାହୁଡା ପାଇଁ ଶ୍ରୀକ୍ଷେତ୍ର ହାଇଆଲର୍ଟରେ ରହିଛି ।" ତେବେ ବାହୁଡ଼ା ଏବଂ ସୁନାବେଶ ପାଇଁ ଜାରି ହୋଇଥିବା ଟ୍ରାଫିକ୍ ମାର୍ଗଦର୍ଶିକା ମାନି ପୁରୀ ଆସିବାକୁ ସେ ଭକ୍ତଙ୍କୁ ପରାମର୍ଶ ଦେଇଛନ୍ତି ।