ପୁରୀ: ଗତକାଲି ଅଧାରେ ଅଟକିଥିବା ଆସ୍ଥାର ଯାତ୍ରା ଆଜି ପୂର୍ଣ୍ଣତା ପାଇଛି । ଗତକାଲି ସମୟ ସହ ଅଟକିଯାଇଥିବା ରଥ ଆଜି ଲକ୍ଷ ଲକ୍ଷ ଭକ୍ତଙ୍କ ଭକ୍ତିର ସ୍ପର୍ଶରେ ମା' ଗୁଣ୍ଡିଚାଙ୍କ ଦ୍ୱାରରେ ପହଞ୍ଚିଛି । ଗତକାଲି ଭଳି ଆଜି ବି ଭକ୍ତଙ୍କ ମଧ୍ୟରେ ସେହି ଉତ୍ସାହ ଦେଖିବାକୁ ମିଳିଛି । ସକାଳୁ ସକାଳୁ ବଡ଼ଦାଣ୍ଡରେ ଜମିଥିଲା ଲକ୍ଷ ଲକ୍ଷ ଭକ୍ତଙ୍କ ସମୁଦ୍ର । ତେବେ ଭିଡ଼କୁ ଦୃଷ୍ଟିରେ ରଖି ଛୋଟ ପିଲା ଏବଂ ବୟସ୍କଙ୍କୁ ନେଇ ପୁରୀ ନ ଆସିବାକୁ ପୋଲିସ ଡିଜି ୱାଇ.ବି ଖୁରାନିଆ ସୂଚନା ଦେଇଛନ୍ତି ।

ରଥଯାତ୍ରା ପାଇଁ ସାରା ବିଶ୍ଵରୁ ଅନେକ ଭକ୍ତ ଶ୍ରୀକ୍ଷେତ୍ରକୁ ଧାଇଁ ଆସିଛନ୍ତି । ରାତିସାରି ବଡ଼ଦାଣ୍ଡରେ ଲୋକଙ୍କ ଗହଳି ଦେଖିବାକୁ ମିଳିଛି । ବିଶେଷ କରି ନନ୍ଦିଘୋଷ ସାମ୍ନାରେ ଅଧିକ ଭିଡ଼ ପରିଲକ୍ଷିତ ହୋଇଛି । ଭିଡ଼ ଯୋଗୁଁ ଅଣନିଶ୍ବାସୀ ହୋଇ ରଥଯାତ୍ରା ଦିନ ଜଣେ ଭକ୍ତଙ୍କ ଜୀବନ ଯାଇଛି । ପୁରୀ ମେଡିକାଲରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ଆଉ ଜଣେ ଶ୍ରଦ୍ଧାଳୁ ଗୁରୁତର ଅବସ୍ଥାରେ ପୁରୀ ମେଡିକାଲରେ ଭର୍ତ୍ତି ହୋଇଛନ୍ତି ।

• ଭକ୍ତଙ୍କୁ DGଙ୍କ ଅପିଲ୍

ବର୍ଷାକୁ ଖାତିର ନ କରି ବଡ଼ଦାଣ୍ଡରେ ରୁଣ୍ଡ ହୋଇଛନ୍ତି ଲକ୍ଷାଧିକ ଲୋକ । ପ୍ରତିଟି ଲୋତକ ତା'ର ପ୍ରାଣ ପ୍ରିୟ ଠାକୁରକୁ ଚାହିଁ ରହିଛନ୍ତି । ତେବେ ମରିଚିକୋଟ ଛକ ନିକଟରେ ଏହି ଅଘଟଣ ଘଟିଛି । ଭିଡ଼ ଭିତରେ ଅନେକ ଅଣନିଶ୍ଵାସୀ ହୋଇଥିବାବେଳେ ସେମାନଙ୍କୁ ତୁରନ୍ତ ପୁରୀ ମେଡିକାଲକୁ ନିଆଯାଇଥିଲା । ଏଭଳି ପରିସ୍ଥିତିକୁ ଦୃଷ୍ଟିରେ ରଖି ରଥଯାତ୍ରା, ବାହୁଡ଼ା ଯାତ୍ରା ଏବଂ ସୁନାବେଶ ପାଇଁ ଜନସାଧାରଙ୍କ ପାଇଁ ପୋଲିସର ନିର୍ଦ୍ଦେଶାବଳୀକୁ ଜନସାଧାରଣ ମାନିବାକୁ ଅପିଲ କରିଛନ୍ତି ପୋଲିସ ଡିଜି । ଛୋଟ ପିଲା ଏବଂ ବୟସ୍କଙ୍କୁ ଧରି ପୁରୀ ନ ଆସିବାକୁ ଅନୁରୋଧ କରିଛନ୍ତି ପୋଲିସ ଡିଜି ।

ପଢନ୍ତୁ ଏହି ଖବର: ରଥଯାତ୍ରାରେ ଅଘଟଣ, ଅଣନିଃଶ୍ବାସୀ ହୋଇ ଚାଲିଗଲା ଜଣେ ଭକ୍ତଙ୍କ ଜୀବନ

• କାଲି ଜନ୍ମବେଦୀକୁ ବିଜେ କରିବେ ତିନି ଠାକୁର

ବରିଷ୍ଠ ସେବାୟତ ବିନାୟକ ଦାସ ମହାପାତ୍ର ସୂଚନା ଦେଇଛନ୍ତି ଯେ ଆଜି ରଥ ଉପରେ ଗୋପାଳବଲ୍ଲଭ, ସକାଳ ଧୂପ ନୀତି, ମଧ୍ୟାହ୍ନ ଧୂପ, ସନ୍ଧ୍ୟା ଆଳତି, ସନ୍ଧ୍ୟା ଧୂପ, ବଡ଼ ସିଂହାର ବେଶ ଏବଂ ପହୁଡ଼ ନୀତି ଅନୁଷ୍ଠିତ ହେବ । ଆସନ୍ତାକାଲି ଭୋରୁ ମଙ୍ଗଳା ଆଳତୀ, ଅବକାଶ, ଗୋପାଳ ବଲ୍ଲଭ, ସକାଳ ଧୂପ, ଯାତ୍ରାଙ୍ଗି ମହାସ୍ନାନ, ମଧ୍ୟାହ୍ନ ଧୂପ, ସନ୍ଧ୍ୟା ଆଳତି, ସନ୍ଧ୍ୟା ଧୂପ, ଘୋଡ଼ା ପିଠା, ଚାରମାଳ ବନ୍ଧା ନୀତି ପରେ ପୁଷ୍ପାଞ୍ଜଳି, ଡୋର ଲାଗି ଏବଂ ଗୋଟି ପହଣ୍ଡିରେ ଚାରି ଠାକୁର ଜନ୍ମ ବେଦୀକୁ ଯିବେ ।