ବଡ଼ଦାଣ୍ଡରେ ଅଟକିଛି ତିନି ରଥ । ନନ୍ଦିଘୋଷ, ତାଳଧ୍ୱଜ ଆଉ ଦେବଦଳନ ରଥ ଉପରେ ବିରାଜମାନ କରିଛନ୍ତି ଜଗତର ନାଥ ଶ୍ରୀଜଗନ୍ନାଥ, ବଳଭଦ୍ର ଆଉ ଦେବୀ ସୁଭଦ୍ରା । ଆଜି ଦିନସାରା ପ୍ରଭୁଙ୍କ କୃପା ବର୍ଷା ଭଳି ଶ୍ରାବଣର ଝିପିଝିପି ବର୍ଷା ଲାଗିରହିଥିଲା । ହେଲେ ଏ ବର୍ଷା କି ବାଧା କ'ଣ ଜଗନ୍ନାଥ ପ୍ରେମୀଙ୍କୁ ଅଟକାଇ ପାରିଥାନ୍ତା ? ଜମାରୁ ନୁହେଁ, ଆଜି ଯେଉଁଠି ରଥ ଅଟକିଛି, ଆସନ୍ତାକାଲି ସେଇଠୁ ପୁଣି ଆରମ୍ଭ ହେବ ରଥଟଣା । ସେଇ ଭକ୍ତିର ଦଉଡ଼ିକୁ ହାତରେ ଧରି ଗୁଣ୍ଡିଚା ମନ୍ଦିର ଅଭିମୁଖେ ବଡ଼ଠାକୁରଙ୍କୁ ନେବା ପାଇଁ ପ୍ରତିଟି ଜଗନ୍ନାଥ ପ୍ରେମୀ ଚାହିଁ ରହିଛନ୍ତି ।

pic.twitter.com/PNE85pQ1MX

— Shree Jagannatha Temple Office, Puri (@SJTA_Puri) July 16, 2026

ସବୁଠାରୁ ବଡ଼ ସୁଯୋଗ ହେଉଛି, ଆଜି ରାତିସାରା ମୁକ୍ତ ଆକାଶ ତଳେ ରଥ ଉପରେ ବିରାଜମାନ କରିବେ ଚତୁର୍ଦ୍ଧାମୂର୍ତ୍ତି । ପ୍ରଭୁଙ୍କ ଏହି ଦୁର୍ଲଭ ରୂପକୁ ଆଖି ପୂରାଇ ଦର୍ଶନ କରିବା ପାଇଁ ବଡ଼ଦାଣ୍ଡରେ ଭକ୍ତଙ୍କ ଅସମ୍ଭାଳ ଭିଡ଼ ଜମିବାରେ ଲାଗିଛି । ନା ଅଛି କ୍ଲାନ୍ତି, ନା ଅଛି ଶ୍ରାନ୍ତି, ଅଛି କେବଳ ସେଇ କାଳିଆ ପ୍ରତି ଅଫୁରନ୍ତ ପ୍ରୀତି ଆଉ ଭକ୍ତି ।
ସେପଟେ ଆସନ୍ତାକାଲି ହେବାକୁ ଥିବା ରଥଟଣା ଓ ଆଡ଼ପ ବିଜେ ନେଇ ଗୁରୁତ୍ବପୂର୍ଣ୍ଣ ସୂଚନା ଦେଇଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ । ସେ କହିଛନ୍ତି, ଆସନ୍ତାକାଲି ସକାଳ ୯.୩୦ରେ ଆରମ୍ଭ ହେବ ରଥଟଣା । କାଲି ରଥ ଉପରେ ସମ୍ପନ୍ନ ହେବ ସବୁ ନୀତିକାନ୍ତି । କାଲି ଶ୍ରୀଗୁଣ୍ଡିଚା ମନ୍ଦିର ଯାଏଁ ପହଞ୍ଚିବେ ତିନି ରଥ । ତେବେ ଆସନ୍ତାକାଲି ହୋଇପାରିବ ନାହିଁ ଆଡ଼ପ ମଣ୍ଡପ ପହଣ୍ଡି । ଶନିବାର ମହାପ୍ରଭୁ ଆଡ଼ପ ମଣ୍ଡପ ବିଜେ କରିବେ ।

ଅଧିକ ପଢ଼ନ୍ତୁ: କାହିଁକି ମହାପ୍ରଭୁଙ୍କ ମସ୍ତକରେ ଲାଗେ ଟାହିଆ ? ଜାଣନ୍ତୁ ଅଜଣା ଇତିହାସ

ସେହିପରି ଆଜିର ରଥଟଣା ବନ୍ଦ ନେଇ ମଧ୍ୟ ଶ୍ରୀମନ୍ଦିର ପ୍ରଶାସକ ସୂଚନା ଦେଇଛନ୍ତି । ଆଲୋକ ଅଭାବ ପାଇଁ ଆଜି ସ୍ଥଗିତ ରହିଲା ରଥଟଣା । ଆଜି ରଥଟଣା ବନ୍ଦ କରିବାକୁ ପରାମର୍ଶ ଦେଲେ ଭୋଇ ସର୍ଦ୍ଦାର । ପ୍ରତିକୂଳ ପାଗ ସତ୍ତ୍ବେ ଶ୍ରୀକ୍ଷେତ୍ରରେ ୧୦ ରୁ ୧୨ ଲକ୍ଷ ଭକ୍ତଙ୍କ ସମାଗମ । ସୁରକ୍ଷା ଦୃଷ୍ଟିରୁ ରଥଟଣା ବନ୍ଦ କରାଗଲା ବୋଲି ଶ୍ରୀମନ୍ଦିର ମୁଖ୍ୟ ପ୍ରଶିକ୍ଷକ କହିଛନ୍ତି ।