ରବିବାର ଟି-୨୦ କ୍ରିକେଟ ବିଶ୍ବକପ୍ ଫାଇନାଲ୍ । ଗୁଜରାଟ ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଏହି ଫାଇନାଲ୍ ମ୍ୟାଚ୍‌ ଖେଳାଯିବ । ମୁହାଁମୁହିଁ ହେବେ ଭାରତ ଓ ନ୍ୟୁଜିଲାଣ୍ଡ । ଏହି ଟୁର୍ଣ୍ଣାମେଣ୍ଟ୍ ଆରମ୍ଭ ହେବା ପୂର୍ବରୁ ସମସ୍ତେ ଆଶା କରିଥିଲେ ଯେ ଅଭିଷେକ ଶର୍ମା ଚମତ୍କାର ପ୍ରଦର୍ଶନ କରିବେ ଏବଂ ସର୍ବାଧିକ ରନ୍ ସ୍କୋରର୍ ହେବେ । କିନ୍ତୁ ଟିମ୍ ଇଣ୍ଡିଆର ଏହି ଓପନର୍ ଏପର୍ଯ୍ୟନ୍ତ କୌଣସି ପ୍ରଭାବ ପକାଇପାରି ନାହାନ୍ତି । ତାଙ୍କର ପ୍ରଦର୍ଶନ ୨୦୨୪ ଟି-୨୦ ବିଶ୍ୱକପ୍‌ରେ ବିରାଟ କୋହଲିଙ୍କ ପରି ରହିଛି । ଏବେ ସେ ଫାଇନାଲ୍‌ରେ ବିରାଟ କୋହଲିଙ୍କ କୃତିତ୍ୱକୁ ଦୋହରାଇବାକୁ ଚେଷ୍ଟା କରିବେ ।

୨୦୨୪ ଟି-୨୦ ବିଶ୍ୱକପ୍ ଫାଇନାଲ ପୂର୍ବରୁ ବିରାଟ କୋହଲିଙ୍କ ପାଇଁ ଖରାପ ରହିଥିଲା । ଫାଇନାଲ୍‌ ପୂର୍ବରୁ ସେ ୭ଟି ମ୍ୟାଚ୍‌ରେ ମୋଟ ୭୫ ରନ୍ କରିଥିଲେ । ତାଙ୍କର ସ୍କୋର ଥିଲା ୧, ୪, ୦, ୨୪, ୩୭, ୦ ଏବଂ ୯। ବିରାଟ କୋହଲି ପୂର୍ବରୁ କୌଣସି ଟି-୨୦ ବିଶ୍ୱକପ୍‌ରେ ଏତେ ନିରାଶ କରିନଥିଲେ ।

୨୯ ଜୁନ୍ ୨୦୨୪ରେ ବିରାଟ ଦକ୍ଷିଣ ଆଫ୍ରିକା ବିପକ୍ଷରେ ଟି-୨୦ ବିଶ୍ୱକପ୍ ଫାଇନାଲରେ ଏକ ଚମତ୍କାର ପ୍ରତ୍ୟାବର୍ତ୍ତନ କରିଥିଲେ । ସେ ୫୯ ବଲ୍‌ରେ ୭୬ ରନ୍‌ର ଏକ ଧମାକାଦାର ଇନିଂସ ଖେଳିଥିଲେ । ଏହା ଟିମ୍ ଇଣ୍ଡିଆକୁ ୧୭୬ ରନ୍‌ର ବିଶାଳ ସ୍କୋରରେ ପହଞ୍ଚାଇବାରେ ସାହାଯ୍ୟ କରିଥିଲା । ଆଉ ଶେଷରେ ରୋହିତ ବାହିନୀ ଏହି ମ୍ୟାଚ୍‌କୁ ନିଜ ନାମରେ କରିଥିଲା ।

ଅଭିଷେକ ଶର୍ମାଙ୍କ ଭାଗ୍ୟ ବିରାଟ କୋହଲିଙ୍କ ପରି ରହିଛି । ଏପର୍ଯ୍ୟନ୍ତ ସେ ୨୦୨୬ ଟି-୨୦ ବିଶ୍ୱକପ୍‌ରେ ସାତଟି ମ୍ୟାଚ୍ ଖେଳିଛନ୍ତି ଏବଂ ମାତ୍ର ୮୯ ରନ୍ କରିଛନ୍ତି ।

ଏବେ ଅଭିଷେକ ଶର୍ମାଙ୍କ ପାଖରେ ବିରାଟ କୋହଲିଙ୍କ ଇତିହାସକୁ ପୁନରାବୃତ୍ତି କରିବାର ସୁଯୋଗ ଅଛି । ଯେପରି ବିରାଟ ୨୦୨୪ ଟି-୨୦ ବିଶ୍ୱକପ୍‌ରେ ଅନେକ ବିଫଳତା ପରେ ବିଜୟୀ ହୋଇଥିଲେ, ଅଭିଷେକଙ୍କୁ ମଧ୍ୟ ସେହିପରି କରିବାକୁ ପଡିବ। ତାଙ୍କୁ ତାଙ୍କର ପୂର୍ବ ଇନିଂସଗୁଡ଼ିକୁ ଭୁଲି ଫାଇନାଲରେ ବଡ଼ ସ୍କୋର କରିବାକୁ ପଡିବ ।