ଆରମ୍ଭ ହୋଇସାରିଛି ଫଟାଫଟ୍‌ କ୍ରିକେଟ୍‌ ମହାକୁମ୍ଭ ଆଇପିଏଲ ୨୦୨୬ । କିନ୍ତୁ ଆଇପିଏଲ ଚଳିତ ସିଜିନ୍‌ରେ ଏପର୍ଯ୍ୟନ୍ତ ଅର୍ଜୁନ ତେନ୍ଦୁରକରଙ୍କୁ ପ୍ଲେଇଂ ଇଲେଭେନ୍‌ରେ ଖେଳିବାର ସୁଯୋଗ ମିଳିପାରିନି । ଆଇପିଏଲରେ ସେ ଅଧିକ ସୁଯୋଗ ପାଇଁ ମୁମ୍ବାଇ ଇଣ୍ଡିଆନ୍ସ ଛାଡ଼ି ଲକ୍ଷ୍ନୌ ସୁପର ଜାଏଣ୍ଟସରେ ଯୋଗ ଦେଇଛନ୍ତି । ଯଦିଓ ଚୁଡ଼ାନ୍ତ ଏକାଦଶରେ ଚୟନ ଖେଳାଳିଙ୍କ ନିୟନ୍ତ୍ରଣରେ ନାହିଁ, କିନ୍ତୁ ଅର୍ଜୁନ ନିଜକୁ ପ୍ରମାଣିତ କରିବାକୁ ସମସ୍ତ ପ୍ରକାରର ପ୍ରୟାସ ଜାରି ରଖିଛନ୍ତି । ଏମିତିକି ନେଟ୍ସରେ ତାଙ୍କର ବୋଲିଂ ଟିମ୍‌ ମ୍ୟାନେଜମେଣ୍ଟଙ୍କୁ ପ୍ରଭାବିତ କରିବା ଆରମ୍ଭ କରିଛି ।

୨୬ ବର୍ଷୀୟ ଅର୍ଜୁନ ତେନ୍ଦୁଲକରଙ୍କ ଏକ ଭିଡିଓ ଏବେ ସୋସିଆଲ ମିଡିଆରେ ବେଶ୍‌ ଭାଇରାଲ ହେବାରେ ଲାଗିଛି । ଯେଉଁଥିରେ ସେ ନେଟ୍ସରେ ଚମତ୍କାର ୟର୍କର ବୋଲିଂ କରୁଛନ୍ତି । ଭିଡିଓରେ, ଅର୍ଜୁନ ନିରନ୍ତର ଭାବରେ ୟର୍କର ବୋଲିଂ କରୁଛନ୍ତି । ଆଉ ତାଙ୍କ ସଠିକତା ସମସ୍ତଙ୍କ ଦୃଷ୍ଟି ଆକର୍ଷଣ କରିଛି । ଏମିତିକି ଶ୍ରେଷ୍ଠ ବ୍ୟାଟ୍ସମ୍ୟାନ୍‌ ମଧ୍ୟ ତାଙ୍କ ବୋଲିଂ ଖେଳିବାକୁ ସଂଘର୍ଷ କରୁଛନ୍ତି ।

ନେଟ୍ ସେସନ୍ ସମୟରେ ଅର୍ଜୁନ ତାଙ୍କ ନିଜ ସାଥୀ ଖେଳାଳିଙ୍କୁ ମଧ୍ୟ ଛାଡି ନଥିଲେ । ଦଳର ଅଧିନାୟକ ରିଷଭ ପନ୍ତଙ୍କୁ ମଧ୍ୟ ତାଙ୍କ ୟର୍କରର ଶିକାର ହୋଇଥିଲେ । ଅର୍ଜୁନଙ୍କ ନିରନ୍ତର ସଠିକ୍ ୟର୍କର ପନ୍ତଙ୍କୁ ରକ୍ଷଣାତ୍ମକ ଭାବରେ ଖେଳିବାକୁ ବାଧ୍ୟ କରିଥିଲା ।

Remember The Name - Arjun Tendulkar https://t.co/UGS1abBMKD pic.twitter.com/gHvUyNb39N

— Harsh shekhawat (@wordofshekhawat) April 6, 2026

ଅର୍ଜୁନଙ୍କ ବୋଲିଂ ସଠିକତା ଦେଖି ସୋସିଆଲ ମିଡିଆରେ ପ୍ରଶଂସକମାନେ ଲଗାତାର ପ୍ରଶ୍ନ କରୁଛନ୍ତି ଯେ ତାଙ୍କୁ କାହିଁକି ପ୍ଲେଇଂ ଇଲେଭେନ୍‌ରେ ସାମିଲ କରାଯାଉନାହିଁ । ଅନେକ ବିଶ୍ୱାସ କରନ୍ତି ଯେ ଅର୍ଜୁନଙ୍କୁ ଖୁବ୍‌ଶୀଘ୍ର ସୁଯୋଗ ମିଳିବା ଉଚିତ, କାରଣ ସେ ନେଟ୍ସରେ ପ୍ରଭାବଶାଳୀ ହୋଇଛନ୍ତି ।

ଘରୋଇ କ୍ରିକେଟରେ ଗୋଆ ପାଇଁ ଖେଳୁଥିବା ସମୟରେ ଅର୍ଜୁନ ତେନ୍ଦୁଲକର ତାଙ୍କର ଅଲରାଉଣ୍ଡର ପ୍ରଦର୍ଶନରେ ପ୍ରଭାବିତ କରିସାରିଛନ୍ତି । ଏବେ ସେ ଆଇପିଏଲରେ ମଧ୍ୟ ନିଜକୁ ପ୍ରମାଣିତ କରିବାକୁ ପ୍ରସ୍ତୁତ ଥିବା ପରି ମନେ ହେଉଛି । ସେ ତାଙ୍କ ବୋଲିଂକୁ ଆହୁରି ଉନ୍ନତ କରିବା ପାଇଁ ପ୍ରଶିକ୍ଷକ ଏବଂ ବରିଷ୍ଠ ଖେଳାଳିମାନଙ୍କ ସହିତ ନିରନ୍ତର କାମ କରୁଛନ୍ତି ।

ନିକଟରେ ପୂର୍ବତନ ଭାରତୀୟ ଅଲରାଉଣ୍ଡର ଯୁବରାଜ ସିଂହ ମଧ୍ୟ ଅର୍ଜୁନଙ୍କୁ ପ୍ରଶଂସା କରିଛନ୍ତି । ଯୁବରାଜ କହିଛନ୍ତି ଯେ ଅର୍ଜୁନ ବହୁତ ତୀକ୍ଷ୍ଣ ଏବଂ ଖେଳ ପ୍ରତି ତାଙ୍କର ପ୍ରତିବଦ୍ଧତା ଉତ୍କୃଷ୍ଟ । ତେବେ ଆଗାମୀ ଏପ୍ରିଲ୍‌ ୯ରେ ଲକ୍ଷ୍ନୌ ସୁପର ଜାଏଣ୍ଟସ୍‌ ଇଡେନ୍‌ ଗାର୍ଡେନ୍ସରେ ମୁକାବିଲା ଖେଳିବ । ଆଉ ଏହି ମ୍ୟାଚ୍‌ରେ ଅର୍ଜୁନଙ୍କୁ ସୁଯୋଗ ମିଳିପାରେ ବୋଲି ଚର୍ଚ୍ଚା ହେଉଛି ।