IPL ସିଜିନ୍‌-୧୯ ପୂର୍ବରୁ RCBକୁ ନେଇ ସାମ୍ନାକୁ ଆସିଛି ବଡ଼ ଖବର । ଆଇପିଏଲର ପୂର୍ବରୁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ମାଲିକ ପରିବର୍ତ୍ତନ କରିଛି । ୧୬ ହଜାର ୭୦୬ କୋଟି ମୂଲ୍ୟରେ ବିକ୍ରି ହୋଇଛି ଆରସିବି । ଆଉ ଏବେ RCBର ନୂଆ ମାଲିକ ଏମିତି ଜଣେ ବ୍ୟକ୍ତି ହୋଇଛନ୍ତି, ଯିଏ ଥରେ ଆଇପିଏଲ ନିଲାମରେ ୩୦ ଲକ୍ଷ ଟଙ୍କାରେ ବିକ୍ରି ହୋଇଥିଲେ । ତାଙ୍କୁ ରାଜସ୍ଥାନ ରୟାଲ୍ସ କିଣିଥିଲା । କିନ୍ତୁ ଆଇପିଏଲର ଗୋଟିଏ ବି ମ୍ୟାଚ୍‌ ସେ ଖେଳିନାହାନ୍ତି । ଏହି ବ୍ୟକ୍ତି ଜଣକ ଆଉ କେହି ନୁହଁନ୍ତି ବରଂ ଆର୍ଯ୍ୟମାନ ବିକ୍ରମ ବିର୍ଲା । ଯାହାଙ୍କର ଖେଳାଳିରୁ ଅଧ୍ୟକ୍ଷ ହେବା ଯାତ୍ରା ସହଜ ନଥିଲା ।

ସୂଚନା ଅନୁସାରେ, RCBକୁ ଆଦିତ୍ୟ ବିର୍ଲା ଗ୍ରୁପ୍, ଟାଇମ୍ସ ଅଫ୍ ଇଣ୍ଡିଆ ଗ୍ରୁପ୍, ବ୍ଲାକଷ୍ଟୋନର ପରପେଚୁଆଲ୍ ପ୍ରାଇଭେଟ୍ ଇକ୍ୱିଟି ଷ୍ଟ୍ରାଟେଜି ଏବଂ ବୋଲ୍ଟ ଭେଞ୍ଚର୍ସ ମିଳିତ ଭାବରେ ଅଧିଗ୍ରହଣ କରିଛନ୍ତି । ସେମାନେ ୟୁନାଇଟେଡ୍ ସ୍ପିରିଟ୍ସ ଲିମିଟେଡ୍ ସହିତ ୧୬,୭୦୬ କୋଟିରେ ଏକ ଚୁକ୍ତି ସ୍ବାକ୍ଷର କରିଛନ୍ତି । ତେବେ ଆସନ୍ତୁ ଜାଣିବା RCBର

ନୂତନ ମାଲିକ ଆର୍ଯ୍ୟମାନ ବିର୍ଲା କିଏ ?

ନୂତନ ମାଲିକାନା ଅଧୀନରେ ଆଦିତ୍ୟ ବିର୍ଲା ଗ୍ରୁପର ନିର୍ଦ୍ଦେଶକ ଆର୍ଯ୍ୟମାନ ଅଧ୍ୟକ୍ଷ ଭାବରେ କାର୍ଯ୍ୟ କରିବେ । ଟାଇମ୍ସ ଗ୍ରୁପ୍ ର ସତ୍ୟାନ ଗଜୱାନି ଉପାଧ୍ୟକ୍ଷ ଭାବରେ କାର୍ଯ୍ୟ କରିବେ ।

ଆର୍ଯ୍ୟମାନ ଆଦିତ୍ୟ ବିର୍ଲା ଗ୍ରୁପ୍ ଅଧ୍ୟକ୍ଷ କୁମାର ମଙ୍ଗଳମ୍ ବିର୍ଲାଙ୍କ ପୁଅ । ସେ ଘରୋଇ କ୍ରିକେଟରେ ମଧ୍ୟପ୍ରଦେଶର ପ୍ରତିନିଧିତ୍ୱ କରିଥିଲେ । ସେ RCBର ଅଧିନାୟକ ରଜତ ପାଟିଦାର ଏବଂ ଅଲରାଉଣ୍ଡର ଭେଙ୍କଟେଶ ଆୟରଙ୍କ ସହିତ ଡ୍ରେସିଂ ରୁମ୍ ସେୟାର କରିଥିଲେ । ଆର୍ଯ୍ୟମାନ ନଭେମ୍ବର ୨୦୧୭ରେ ଓଡ଼ିଶା ବିପକ୍ଷରେ ପ୍ରଥମ ଶ୍ରେଣୀ ଡେବ୍ୟୁ କରିଥିଲେ । ଏହି ମ୍ୟାଚ୍‌ରେ ସେ ପାଟିଦାରଙ୍କ ସହିତ ଇନିଂସ ଓପନ କରିଥିଲେ, ଆଉ ମାତ୍ର ୬ ରନ୍‌ କରି ରନ୍‌ଆଉଟ୍‌ ହୋଇଥିଲେ । ତାଙ୍କର ପ୍ରଥମ ଶ୍ରେଣୀ କ୍ୟାରିୟର ପ୍ରାୟ ଗୋଟିଏ ବର୍ଷରୁ ଅଧିକ ସମୟ ଧରି ଚାଲିଥିଲା । ସେ ତାଙ୍କର ଶେଷ ମ୍ୟାଚ୍ ଜାନୁଆରୀ ୨୦୧୯ରେ ଆନ୍ଧ୍ର ବିପକ୍ଷରେ ଖେଳିଥିଲେ । ସେ ନଅଟି ମ୍ୟାଚରେ ୪୧୪ ରନ କରିଥିଲେ । ଯେଉଁଥିରେ ଗୋଟିଏ ଶତକ ଏବଂ ଗୋଟିଏ ଅର୍ଦ୍ଧଶତକ ରହିଥିଲା ।

ଆର୍ଯ୍ୟମାନ ସେପ୍ଟେମ୍ବର ୨୦୧୮ରେ ହାଇଦ୍ରାବାଦ ବିପକ୍ଷରେ ତାଙ୍କର ଲିଷ୍ଟ ଏ ଡେବ୍ୟୁ କରିଥିଲେ। ଲିଷ୍ଟ ଏ କ୍ୟାରିୟରରେ ସେ ତାଙ୍କର ଶେଷ ମ୍ୟାଚ୍‌ ସୌରାଷ୍ଟ୍ର ବିପକ୍ଷରେ ଖେଳିଥିଲେ । ସେ IPL ୨୦୧୮ ମେଗା ନିଲାମରେ ଅଂଶଗ୍ରହଣ କରିଥିଲେ ଏବଂ ରାଜସ୍ଥାନ ରୟାଲ୍ସ ତାଙ୍କୁ ୩୦ ଲକ୍ଷ ଟଙ୍କାରେ କିଣିଥିଲା, କିନ୍ତୁ ସେ ଗୋଟିଏ ବି ମ୍ୟାଚ୍ ଖେଳି ନଥିଲେ । ୨୦୨୦ ସିଜିନ୍‌ ପୂର୍ବରୁ ରାଜସ୍ଥାନ ତାଙ୍କୁ ରିଲିଜ୍‌ କରିଥିଲା । ଏହା ପରଠୁ ସେ କେବେ କ୍ରିକେଟ୍‌ ଫିଲ୍ଡକୁ ଫେରିନଥିଲେ । ଆଉ ଏବେ ସେ ଆରସିବିକୁ କିଣି ଆଇପିଏଲରେ ଏକ ନୂଆ ଇତିହାସ ସୃଷ୍ଟି କରିଛନ୍ତି ।