Aryavir Sehwag Virat Kohli / ‘କେବଳ ସେହୱାଗ ନୁହେଁ, କୋହଲିଙ୍କ ଭଳି ବି ଖେଳିବି’, ଆର୍ଯ୍ୟବୀରଙ୍କ ଐତିହାସିକ ଇନିଂସ

କ୍ରିକେଟ୍ ମଇଦାନରେ ଯେତେବେଳେ କୌଣସି ମହାନ ଖେଳାଳିଙ୍କ ପୁଅ ପାଦ ଥାପନ୍ତି, ସେତେବେଳେ ତାଙ୍କୁ ନେଇ ତୁଳନା ହେବା ସ୍ୱାଭାବିକ । କିନ୍ତୁ ଭାରତର ପୂର୍ବତନ ବିସ୍ଫୋରକ ଓପନର୍ ବୀରେନ୍ଦ୍ର ସେହୱାଗଙ୍କ ପୁଅ ଆର୍ଯ୍ୟବୀର ସେହୱାଗ ନିଜର ଦମ୍‌ଦାର ବ୍ୟାଟିଂ ଜରିଆରେ ଏକ ଭିନ୍ନ ପରିଚୟ ସୃଷ୍ଟି କରିବାକୁ ପ୍ରସ୍ତୁତ ବୋଲି ପ୍ରମାଣ କରିଛନ୍ତି ।

ଅଣ୍ଡର-୧୯ ପୁରୁଷ ଏସିଆ କପ୍‌ ୨୦୨୬ର ଗ୍ରୁପ୍‌-ଏ ମ୍ୟାଚ୍‌ରେ ୟୁଏଇ ବିପକ୍ଷରେ ଆର୍ଯ୍ୟବୀର ଏକ ଚମତ୍କାର ଇନିଂସ ଖେଳି ସମସ୍ତଙ୍କ ଦୃଷ୍ଟି ଆକର୍ଷଣ କରିଛନ୍ତି । ଅଲ୍‌ ଆମେରତ୍‌ କ୍ରିକେଟ୍‌ ଗ୍ରାଉଣ୍ଡରେ ସେ ୧୬୮ଟି ବଲ୍‌ରୁ ୧୬୦ ରନ୍‌ର ଅପରାଜିତ ଇନିଂସ ଖେଳିଥିଲେ ।

କୋହଲିଙ୍କ ଭଳି ଖେଳିବାକୁ ଚାହାନ୍ତି ଆର୍ଯ୍ୟବୀର

ଏହି ମ୍ୟାଚ୍‌ ପୂର୍ବରୁ ଆର୍ଯ୍ୟବୀରଙ୍କ ଏକ ବୟାନ ବେଶ୍‌ ଭାଇରାଲ ହୋଇଥିଲା । ଏକ ପ୍ରମୋସନାଲ୍‌ ଭିଡିଓରେ ତାଙ୍କୁ ଖେଳିବା ଶୈଳୀ ସମ୍ପର୍କରେ ପଚରାଯିବାରୁ ସେ କହିଥିଲେ ଯେ, ସେ କେବଳ ନିଜ ବାପା ସେହୱାଗଙ୍କ ଶୈଳୀରେ ଖେଳିବାକୁ ଚାହାନ୍ତି ନାହିଁ, ବରଂ ବିରାଟ କୋହଲିଙ୍କ ଭଳି ଖେଳିବାକୁ ଚାହାନ୍ତି ।

ବୀରେନ୍ଦ୍ର ସେହୱାଗ ନିଜର ନିର୍ଭୀକ ଓ ଆକ୍ରମଣାତ୍ମକ ବ୍ୟାଟିଂ ପାଇଁ ପରିଚିତ । ଅନ୍ୟପଟେ ବିରାଟ କୋହଲି ନିଜର ଫିଟନେସ୍‌, ନିରନ୍ତର ପ୍ରଦର୍ଶନ, ଚାପରେ ଖେଳିବାର ଦକ୍ଷତା ଏବଂ ଧୈର୍ଯ୍ୟ ପାଇଁ ବିଶ୍ୱବିଖ୍ୟାତ । ଆର୍ଯ୍ୟବୀରଙ୍କ ଏହି ଇନିଂସରେ ବାପା ସେହୱାଗଙ୍କ ଆକ୍ରମଣାତ୍ମକ ଶୈଳୀ ସହ କୋହଲିଙ୍କ ଭଳି ଧୈର୍ଯ୍ୟ ଓ ପରିପକ୍ୱତା ଦେଖିବାକୁ ମିଳିଥିଲା ।

୧୩୧ ବଲ୍‌ରେ ଶତକ, ପରେ ଚୌକା-ଛକା ବର୍ଷା

ୟୁଏଇ ବିପକ୍ଷ ଏହି ମ୍ୟାଚ୍‌ରେ ଆରମ୍ଭରୁ ପିଚ୍‌ରେ ରନ୍‌ କରିବା ସହଜ ନଥିଲା । ଏଭଳି ପରିସ୍ଥିତିରେ ୧୯ ବର୍ଷୀୟ ଓପନର୍‌ ଆର୍ଯ୍ୟବୀର ଧୈର୍ଯ୍ୟର ସହ ବ୍ୟାଟିଂ କରି ନିଜ ଇନିଂସର ମୂଳଦୁଆ ପକାଇଥିଲେ । ସେ ୧୩୧ଟି ବଲ୍‌ରେ ନିଜର ଶତକ ପୂରଣ କରିଥିଲେ ।

ଶତକ ପରେ ତାଙ୍କ ବ୍ୟାଟିଂର ଗତି ବଦଳି ଯାଇଥିଲା । ମଇଦାନର ଚାରିଆଡ଼କୁ ଚୌକା ଓ ଛକା ବର୍ଷା କରିଥିଲେ। ବିଶେଷ କରି ୩୭ତମ ଓଭରରେ ବୋଲର ଉଦ୍ଦିଶ ସୁରୀଙ୍କୁ ଟାର୍ଗେଟ୍‌ କରି ଦୁଇଟି ଛକା ଓ ଦୁଇଟି ଚୌକା ମାରିଥିଲେ । ଏହାପରେ ମଧ୍ୟ ତାଙ୍କ ଆକ୍ରମଣ ଜାରି ରହିଥିଲା ଏବଂ ସେ ୧୫୦ ରନ୍‌ ଅତିକ୍ରମ କରିଥିଲେ । ଶେଷରେ ୧୬୦ ରନ୍‌ରେ ଅପରାଜିତ ରହିଥିଲେ ।

ଭାରତର ୭୦ ରନ୍‌ରେ ବିଜୟ, ସେମିଫାଇନାଲ୍‌ରେ ଦଳ

ଆର୍ଯ୍ୟବୀରଙ୍କ ଏହି ଦମ୍‌ଦାର ଇନିଂସ ବଳରେ ଭାରତୀୟ ଦଳ ୫୦ ଓଭରରେ ୭ ୱିକେଟ୍‌ ହରାଇ ୩୦୯ ରନ୍‌ ସଂଗ୍ରହ କରିଥିଲା। ଜବାବରେ ୟୁଏଇ ଦଳ ନିର୍ଦ୍ଧାରିତ ୫୦ ଓଭରରେ ୨୩୯ ରନ୍‌ କରିପାରିଥିଲା । ଫଳରେ ଭାରତ ୭୦ ରନ୍‌ରେ ଏହି ମ୍ୟାଚ୍‌ ଜିତି ଅଣ୍ଡର-୧୯ ଏସିଆ କପ୍‌ର ସେମିଫାଇନାଲ୍‌ରେ ସ୍ଥାନ ପକ୍କା କରିଛି । ଏବେ ସେମିଫାଇନାଲ୍‌ରେ ଭାରତର ମୁକାବିଲା ଗୁରୁବାର ଆଫଗାନିସ୍ତାନ ସହ ହେବ ।