Team India Coach / ‘ଟିମ୍ ଇଣ୍ଡିଆର କୋଚ୍ ହେଲେ ପତ୍ନୀ ଦେଇଦେବେ ଛାଡ଼ପତ୍ର’, ଜାଣନ୍ତୁ କାହିଁକି ଏମିତି କହିଲେ ଆଶିଷ ନେହେରା

ଭାରତୀୟ କ୍ରିକେଟ୍ ଦଳର ପୂର୍ବତନ ଦ୍ରୁତ ବୋଲର ଆଶିଷ ନେହରା ନିଜର ମଜାଦାର ଅନ୍ଦାଜ ପାଇଁ ବେଶ୍ ପରିଚିତ । ସେ କେବଳ ନିଜ ବୋଲିଂ ପାଇଁ ନୁହେଁ ବରଂ ନଜର କୋଚିଂ ପାଇଁ ବେଶ୍‌ ପରିଚିତ । IPL ରେ ଗୁଜରାଟ ଟାଇଟନ୍ସର କୋଚ୍ ଭାବେ ମଧ୍ୟ ତାଙ୍କର ଯାତ୍ରା ଖୁବ୍ ସଫଳ ରହିଛି । ଗୁଜରାଟ ଟାଇଟନ୍ସକୁ ପ୍ରଥମ ସିଜିନ୍‌ରେ ହିଁ ନେହେରା ଚାମ୍ପିୟନ୍ କରାଇଥିଲେ ।

ତେବେ ନିକଟରେ ଆଶିଷ ନେହରାଙ୍କୁ ଟିମ୍ ଇଣ୍ଡିଆର ହେଡ୍ କୋଚ୍ ହେବା ସମ୍ପର୍କରେ ଏକ ପ୍ରଶ୍ନ ପଚରାଯାଇଥିଲା । ଆଉ ଏହି ପ୍ରଶ୍ନରେ ନେହେରା ଯେଉଁ ଉତ୍ତର ଦେଇଛନ୍ତି ତାହା ଶୁଣି ସମସ୍ତେ ହସିହସି ବେଦମ ହୋଇଛନ୍ତି । ମଜାଳିଆ ଢଙ୍ଗରେ ନେହେରା କହିଛନ୍ତି, ଟିମ୍ ଇଣ୍ଡିଆର କୋଚ୍ ହେବା ପୂର୍ବରୁ ଘରର ‘ହାଇ କମିଶନ୍’ ଅର୍ଥାତ୍ ପତ୍ନୀଙ୍କ ଅନୁମତି ନେବାକୁ ପଡ଼ିବ, ନହେଲେ ହୋଇପାରେ ଛାଡ଼ପତ୍ର ।

ଭାରତ ଓ ଆଫଗାନିସ୍ତାନ ମଧ୍ୟରେ ସେପ୍ଟେମ୍ବର ୧୩ରୁ ଦିଲ୍ଲୀରେ ଆରମ୍ଭ ହେବାକୁ ଥିବା ଟି-୨୦ ସିରିଜ୍ ପୂର୍ବରୁ କୋଲକାତାରେ ଆୟୋଜିତ ସିଏବିର ବାର୍ଷିକ ପୁରସ୍କାର ସମାରୋହରେ ଆଶିଷ ନେହେରା ଯୋଗ ଦେଇଥିଲେ । ସେଠାରେ ତାଙ୍କୁ ପଚରାଯାଇଥିଲା ଯେ, ଭବିଷ୍ୟତରେ ସେ ଟିମ୍ ଇଣ୍ଡିଆକୁ କୋଚିଂ ଦେବାକୁ ଚାହିଁବେ କି ?
ଏହାର ଉତ୍ତରରେ ନେହେରା ହସି ହସି କହିଥିଲେ ଯେ, ଏବେ ଏନେଇ କିଛି କହିବା ବହୁତ କଷ୍ଟକର। ପ୍ରଥମେ ତାଙ୍କୁ ଘରର ‘ହାଇ କମିଶନ୍’ ଅର୍ଥାତ୍ ତାଙ୍କ ପତ୍ନୀଙ୍କୁ ପଚାରିବାକୁ ପଡ଼ିବ । ନହେଲେ ତାଙ୍କର ଛାଡ଼ପତ୍ର ହୋଇପାରେ ବୋଲି ସେ ମଜାରେ କହିଥିଲେ ।

କାହିଁକି ନେହେରାଙ୍କୁ ଲାଗୁଛି ଇଣ୍ଟରନ୍ୟାସନାଲ୍ କୋଚିଂ କଷ୍ଟକର ?

ନେହେରା ଏହି ମଜାଦାର ବୟାନ ପଛରେ ଥିବା ଗମ୍ଭୀର କାରଣ ମଧ୍ୟ କହିଥିଲେ । ତାଙ୍କ ଅନୁସାରେ, ଇଣ୍ଟରନ୍ୟାସନାଲ୍ କ୍ରିକେଟ୍‌ରେ କୋଚ୍ ହେବାର ଅର୍ଥ ହେଉଛି ବର୍ଷର ପ୍ରାୟ ୮ରୁ ୯ ମାସ ଘର-ପରିବାରଠାରୁ ଦୂରରେ ରହି ଲଗାତାର ଯାତ୍ରା କରିବା ।

ତାଙ୍କ କହିବା ଅନୁସାରେ, ଏହି ଦାୟିତ୍ୱ ଆଦୌ ସହଜ ନୁହେଁ । ଇଣ୍ଟରନ୍ୟାସନାଲ୍ ସ୍ତରର କୋଚିଂରେ ଅନେକ ଚାପ ରହିଥାଏ । ଏଥିପାଇଁ ଅଧିକାଂଶ ବ୍ୟକ୍ତି ୩ରୁ ୪ ବର୍ଷରୁ ଅଧିକ ସମୟ ଏହି ପଦରେ ରହିପାରନ୍ତି ନାହିଁ ବୋଲି ନେହେରା କହିଛନ୍ତି ।

ଆଇପିଏଲ୍ ନା ନ୍ୟାସନାଲ୍ ଟିମ୍, କେଉଁଠି ଅଧିକ ଚାପ ?

ଗୁଜରାଟ ଟାଇଟନ୍ସକୁ ନିଜର କୋଚିଂରେ ଆଇପିଏଲ୍ ଚାମ୍ପିୟନ୍ କରାଇଥିବା ନେହେରାଙ୍କୁ ଯେତେବେଳେ ଆଇପିଏଲ୍ ଓ ଇଣ୍ଟରନ୍ୟାସନାଲ୍ କ୍ରିକେଟ୍‌ର କୋଚିଂ ମଧ୍ୟରେ ତୁଳନା କରିବାକୁ କୁହାଯାଇଥିଲା, ସେ ଖୋଲାଖୋଲି ନିଜ ମତ ରଖିଥିଲେ ।

ନେହେରା କହିଥିଲେ ଯେ, କୌଣସି ଦେଶର ନ୍ୟାସନାଲ୍ ଟିମ୍‌ର କୋଚ୍ ହେବା ଅଧିକ କଷ୍ଟକର । ବର୍ଷର ପ୍ରାୟ ୯ ମାସ ଯାତ୍ରା କରିବା କୌଣସି ଛୋଟ କଥା ନୁହେଁ ।
ଗୁଜରାଟ ଟାଇଟନ୍ସ ବିଷୟରେ ନେହେରା କହିଥିଲେ ଯେ, ଲୋକେ ଯେତେବେଳେ ପଚାରନ୍ତି ସେ ଗୁଜରାଟ ପାଇଁ କାମ କରୁଛନ୍ତି କି, ସେ କହନ୍ତି ଏହା କେବଳ କାମ ନୁହେଁ, ଏହା ତାଙ୍କର ପ୍ୟାସନ୍ । ତାଙ୍କ ମତରେ, ଆଇପିଏଲ୍‌ରେ ୧୦ଟି ଦଳ ମଧ୍ୟରେ କଡ଼ା ପ୍ରତିଯୋଗିତା ହୁଏ, କିନ୍ତୁ ନ୍ୟାସନାଲ୍ ଟିମ୍ ସମ୍ଭାଳିବା ଏକ ସମ୍ପୂର୍ଣ୍ଣ ଭିନ୍ନ ସ୍ତରର ଦାୟିତ୍ୱ ।

ଭବିଷ୍ୟତରେ ଟିମ୍ ଇଣ୍ଡିଆର କୋଚ୍ ହେବେ କି ନେହେରା ?

ଟିମ୍ ଇଣ୍ଡିଆର କୋଚ୍ ହେବାର ସମ୍ଭାବନା ସମ୍ପର୍କରେ ନେହେରା କହିଛନ୍ତି ଯେ, ଏହା ତାଙ୍କ ପାଇଁ ନିଶ୍ଚିତ ଭାବେ ଏକ ବଡ଼ ସମ୍ମାନ ଓ ଗର୍ବର ବିଷୟ ହେବ । କିନ୍ତୁ ଏବେ ପର୍ଯ୍ୟନ୍ତ ସେ ଏନେଇ କୌଣସି ଯୋଜନା କରିନାହାନ୍ତି । ନେହେରା କହିଛନ୍ତି ଯେ, ସେ ବର୍ତ୍ତମାନ ନିଜ ଜୀବନ ଓ କାମରେ ବେଶ୍ ଖୁସି ଅଛନ୍ତି । ବର୍ତ୍ତମାନ ଭାରତୀୟ କ୍ରିକେଟ୍ ଦଳର କୋଚିଂ ଦାୟିତ୍ୱ ଗୌତମ ଗମ୍ଭୀରଙ୍କ ହାତରେ ରହିଛି ।