Argus News - ବାଂଲାଦେଶକୁ ୧୧ ରନ୍‌ରେ ହରାଇଲା ପାକିସ୍ତାନ, ଫାଇନାଲ୍‌ରେ ଭାରତ ସହ ମୁକାବିଲା

ଦୁବାଇ: ଏସିଆ କପ୍‌ର ଫାଇନାଲ୍‌ରେ ପ୍ରଥମଥର ପାଇଁ ଭାରତ-ପାକିସ୍ତାନ ମଧ୍ୟରେ ଲଢ଼େଇ ହେବ । ଏହି ମୁକାବିଲା ସେପ୍ଟେମ୍ବର ୨୮ରେ ଦୁବାଇ ଅନ୍ତର୍ଜାତୀୟ ଷ୍ଟାଡିୟମ୍‌ରେ ଖେଳାଯିବ । ଗୁରୁବାର ପାକିସ୍ତାନ-ବାଂଲାଦେଶ ମଧ୍ୟରେ ଖେଳା ଯାଇଥିବା ସୁପର୍-୪ ମ୍ୟାଚ୍‌କୁ ପାକିସ୍ତାନ ୧୧ ରନ୍‌ରେ ଜିତି ନେବା ସହ ଫାଇନାଲ୍‌ରେ ପହଞ୍ଚିଛି ।

ଗୁରୁବାର ଦୁବାଇରେ ପାକିସ୍ତାନ-ବାଂଲାଦେଶ ମ୍ୟାଚ୍ ଖେଳା ଯାଇଥିଲା । ପାକିସ୍ତାନ ଦେଇଥିବା ୧୩୬ ରନ୍‌ର ଟାର୍ଗେଟ୍‌ର ପିଛା କରି ୨୦ ଓଭର୍‌ରେ ୯ ୱିକେଟ୍ ହରାଇ ବାଂଲାଦେଶ ୧୨୪ ରନ୍‌ରେ ଅଟକି ଥିଲା । ଫଳରେ ପାକିସ୍ତାନ ୧୧ ରନ୍‌ରେ ମ୍ୟାଚ୍ ଜିତିବା ସହ ଫାଇନାଲ୍‌ରେ ସ୍ଥାନ ପକ୍କା କରିଛି ।

ଏଥିସହ ପଢ଼ନ୍ତୁ: ଭଲ ନାହିଁ ପାକିସ୍ତାନ ଫର୍ମ, ଫିଲ୍ଡିଂ ବି ଢିଲା..

ବାଂଲାଦେଶ ପକ୍ଷରୁ ଶାମିମ ହୋସେନ୍ ସର୍ବାଧିକ ୩୦ ରନ୍ କରିଥିବା ବେଳେ ଅଧିନାୟକ ଜାକେର ଅଲୀ ୫ ରନ୍ କରି ଆଉଟ୍ ହୋଇଥିଲେ । ଶାମିମଙ୍କୁ ଛାଡ଼ିଦେଲେ କୌଣସି ଖେଳାଳି ୨୦ ରନ୍ ମଧ୍ୟ କରିପାରି ନଥିଲେ । ପାକିସ୍ତାନ ପକ୍ଷରୁ ସାହିନ ଆଫ୍ରିଦି ଓ ହରିସ ରାଊ ୩ଟି ଲେଖାଏଁ ୱିକେଟ୍ ନେଇଥିବା ବେଳେ ସାଏମ ଆୟୁବ ୨ଟି ଓ ମହମ୍ମଦ ନୱାଜ ଗୋଟିଏ ସଫଳତା ପାଇଥିଲେ ।

ଟସ୍ ହାରି ପ୍ରଥମେ ପାକିସ୍ତାନ ବ୍ୟାଟିଂ କରିଥିଲା । ୨୦ ଓଭରରେ ୮ ୱିକେଟ୍ ହରାଇ ୧୩୫ ରନ୍ କରିବାରେ ସକ୍ଷମ ହୋଇଥିଲା ପାକିସ୍ତାନ ଦଳ । ଯାହାକି ଟି-ଟ୍ଵେଣ୍ଟିରେ ବାଂଲାଦେଶ ବିପକ୍ଷରେ ପାକିସ୍ତାନର ସବୁଠୁ କମ ସ୍କୋର୍ । ପାକିସ୍ତାନ ପକ୍ଷରୁ ମହମ୍ମଦ ହାରିସ ୩୧ ରନ୍ କରିଥିବା ବେଳେ ଦଳ ୪୯ ରନ୍‌ରେ ୫ଟି ୱିକେଟ୍ ହରାଇଥିଲା । ବାଂଲାଦେଶ ପକ୍ଷରୁ ତସ୍କିନ୍ ଅହମଦ ୩ଟି, ମେହଦୀ ହସନ ଓ ରିଷାଦ ହୁସୈନ ୨ଟି ଲେଖାଏଁ ୱିକେଟ୍ ନେଇଥିଲେ ।

ଏଥିସହ ପଢ଼ନ୍ତୁ: ବିଦେଶୀ ଔଷଧ ଉପରେ ୧୦୦ ପ୍ରତିଶତ ଟିକସ ଲଗାଇଲେ ଟ୍ରମ୍ପ, ଭାରତ ଉପରେ କ'ଣ ରହିବ ପ୍ରଭାବ ?

ତେବେ ଏସିଆ କପ୍‌ ଫାଇନାଲ୍ ମୁକାବିଲା ଇତିହାସ ରଚିବାକୁ ଯାଉଛି । କାରଣ ୪୧ ବର୍ଷର ଇତିହାସରେ ପ୍ରଥମଥର ପାଇଁ ଭାରତ ଓ ପାକିସ୍ତାନ ଟ୍ରଫି ପାଇଁ ଲଢ଼ିବେ । ଆଉ ଦୁବାଇରେ ହେବାକୁ ଥିବା ଏହି ମହାମୁକାବିଲା ପାଇଁ ସୋସିଆଲ୍ ମିଡିଆରେ ବେଶ ଉତ୍ସାହ ରହିଛି । ମ୍ୟାଚ୍‌ର ୭୨ ଘଣ୍ଟା ପୂର୍ବରୁ ଟ୍ରେଣ୍ଡ କରିବାରେ ଲାଗିଛି ।

ଏସିଆ କପ୍‌ରେ ରେକର୍ଡ

ଭାରତ ଓ ପାକିସ୍ତାନ ମଧ୍ୟରେ ଏବେ ସୁଦ୍ଧା ଏସିଆ କପ୍‌ରେ ୧୮ଟି ମୁକାବିଲା ଖେଳା ଯାଇଛି । ଯେଉଁଥିରୁ ଭାରତ ୧୦ଟି ମ୍ୟାଚ୍ ଜିତିଥିବା ବେଳେ ପାକିସ୍ତାନ ୬ଟିରେ ବିଜୟୀ ହୋଇଛି । ୨ଟି ମ୍ୟାଚ୍ ଡ୍ର ରହିଥିଲା ।

ଆଉ ୨୦୨୫ ଏସିଆ କପ୍‌ରେ ରେକର୍ଡ ଭାରତ ପକ୍ଷରେ ରହିଛି । କାରଣ ଗ୍ରୁପ୍ ଷ୍ଟେଜ୍ ସହ ସୁପର୍-୪ରେ ଭାରତ ପାକିସ୍ତାନକୁ ହରାଇଛି । ଆଉ ଏବେ ୨ ପାରମ୍ପରିକ ପ୍ରତିଦ୍ଵନ୍ଦ୍ଵୀ ଭାରତ-ପାକିସ୍ତାନ ଫାଇନାଲ୍ ମୁକାବିଲାକୁ ନେଇ କ୍ରେଜ୍ ଦେଖିବାକୁ ମିଳିଲାଣି ।