ସେପ୍ଟେମ୍ବର ୨୮ରେ ଏସିଆ କପ୍‌ ଫାଇନାଲ ମ୍ୟାଚ୍ ଖେଳାଯାଇଥିଲା । ଏହି ମ୍ୟାଚ୍‌ରେ ଭାରତ ପାରମ୍ପାରିକ ପ୍ରତିଦ୍ବନ୍ଦୀ ପାକିସ୍ତାନକୁ ୫ ଓ୍ବିକେଟରେ ହରାଇ ଏସିଆ କପ୍‌ ଟ୍ରଫି ଜିତିଥିଲା । କିନ୍ତୁ ACC ମୁଖ୍ୟ ମୋହସିନ୍‌ ନକଭୀଙ୍କ ଜିଦ୍‌ ପାଇଁ ଭାରତକୁ ଟ୍ରଫି ମିଳିପାରିନଥିଲା । ଆଉ ଏହାର ମଧ୍ୟରେ ଏକ ମାସରୁ ଅଧିକ ସମୟ ବିତି ସାରିଲାଣି କିନ୍ତୁ ଏପର୍ଯ୍ୟନ୍ତ ବି ଭାରତକୁ ଏସିଆ କପ୍‌ ଟ୍ରଫି ମିଳିନି । ଯାହାକୁ ନେଇ ବିସିସିଆଇ ବାରମ୍ବାର ଅସନ୍ତୋଷ ପ୍ରକାଶ କରିଛି ।

ତେବେ ଏସବୁ ମଧ୍ୟରେ ଏବେ ମୋହସିନ୍‌ ନକଭିଙ୍କୁ ଚେତାବନୀ ଦିଆଯାଇଛି । ବିସିସିଆଇ ସଚିବ ଦେବଜିତ ସାଇକିଆ ଏସିଆ କପ୍ ଟ୍ରଫି ଏହାର ପ୍ରକୃତ ମାଲିକ ଟିମ୍ ଇଣ୍ଡିଆ ପାଖରେ ପହଞ୍ଚି ନଥିବାରୁ ନିରାଶା ପ୍ରକାଶ କରିଛନ୍ତି । ଏହା ସହ ସାଇକିଆ କହିଛନ୍ତି, ଯଦି ନଭେମ୍ବର ୪ ତାରିଖ ପୂର୍ବରୁ ଟ୍ରଫି ଭାରତୀୟ ଦଳ ପାଖରେ ନ ପହଞ୍ଚେ ତେବେ ସେ ନଭେମ୍ବର ୪ ତାରିଖରେ ଆଇସିସି ବୈଠକରେ ଏକ ପ୍ରସଙ୍ଗ ଉଠାଇବେ ।

ନ୍ୟୁଜ୍ ଏଜେନ୍ସି PTI ଅନୁଯାୟୀ, BCCI ସଚିବ ଦେବଜିତ ସାଇକିଆ କହିଛନ୍ତି, "ଏକ ମାସ ପରେ ମଧ୍ୟ ଟ୍ରଫି ଆମକୁ ହସ୍ତାନ୍ତର କରାଯାଇ ନଥିବାରୁ ଆମେ ନିରାଶ।" ସାଇକିଆ ଏହା ମଧ୍ୟ କହିଛନ୍ତି ଯେ ଭାରତୀୟ ବୋର୍ଡ ଯଥାର୍ଥ ପ୍ରକ୍ରିୟା ଅନୁସରଣ କରି ଏସୀୟ କ୍ରିକେଟ୍ ପରିଷଦକୁ ଟିମ୍ ଇଣ୍ଡିଆକୁ ଟ୍ରଫି ହସ୍ତାନ୍ତର କରିବାକୁ ଅନୁରୋଧ କରିଥିଲା, କିନ୍ତୁ ମୋହସିନ୍ ନକଭି ନିଜ ଜିଦରେ ଅଟଳ ରହି ଟ୍ରଫି ହସ୍ତାନ୍ତର କରିବାକୁ ମନା କରିଦେଇଥିଲେ।

BCCIର ଦାବି ପରେ, ନକଭି କହିଛନ୍ତି ଯେ ଯଦି ଭାରତୀୟ ଦଳ ଟ୍ରଫି ଗ୍ରହଣ କରିବାକୁ ଚାହେଁ, ତେବେ ସେମାନଙ୍କୁ ACC କାର୍ଯ୍ୟାଳୟକୁ ଆସି ଏହାକୁ ଗ୍ରହଣ କରିବାକୁ ପଡିବ । ଏସିସି ତଥା ପିସିବି ଅଧ୍ୟକ୍ଷ ନକଭି କହିଛନ୍ତି ଯେ ସେ ଏକ ପ୍ରେଜେଣ୍ଟେସନ୍‌ ସମାରୋହ ଆୟୋଜନ କରିବାକୁ ପ୍ରସ୍ତୁତ, ଯେଉଁଥିରେ ସେ ବ୍ୟକ୍ତିଗତ ଭାବରେ ଟିମ୍ ଇଣ୍ଡିଆକୁ ଟ୍ରଫି ହସ୍ତାନ୍ତର କରିବେ।

ଯଦି ଟ୍ରଫି ଗୋଟିଏ କିମ୍ବା ଦୁଇ ଦିନ ମଧ୍ୟରେ ନ ପହଞ୍ଚେ...

ଦେବଜିତ ସାଇକିଆ କହିଛନ୍ତି, "ଆମେ ପ୍ରାୟ ୧୦ ଦିନ ପୂର୍ବରୁ ଏସିସି ଅଧ୍ୟକ୍ଷଙ୍କୁ ଚିଠି ଲେଖିଥିଲୁ, କିନ୍ତୁ ସେ ଏହାକୁ ଗ୍ରହଣ କରିବାକୁ ପ୍ରସ୍ତୁତ ନୁହଁନ୍ତି । ଟ୍ରଫି ଏବେ ବି ତାଙ୍କ ପାଖରେ ଅଛି, କିନ୍ତୁ ଆମେ ଆଶା କରୁଛୁ ଯେ ଏହା ଗୋଟିଏ କିମ୍ବା ଦୁଇ ଦିନ ମଧ୍ୟରେ ଆମକୁ ପ୍ରଦାନ କରାଯିବ ।"
ସୂଚନା ଅନୁସାରେ, ଭାରତ ୨୦୨୫ ଏସିଆ କପରେ ପାକିସ୍ତାନକୁ ତିନିଥର ପରାସ୍ତ କରିଥିଲା। ଫାଇନାଲରେ ଟିମ୍ ଇଣ୍ଡିଆ ପାକିସ୍ତାନକୁ ୫ ୱିକେଟରେ ପରାସ୍ତ କରି ଟାଇଟଲ ଜିତିଥିଲା । ଏସିଆ କପ୍‌ ବିଜେତା ହେବା ପରେ ମଧ୍ୟ ଭାରତ ଏପର୍ଯ୍ୟନ୍ତ ଟ୍ରଫି ପାଇନାହିଁ ।