BPL Suspended / ବନ୍ଦ ହେଲା ବାଂଲାଦେଶ ପ୍ରିମିୟର ଲିଗ୍‌, BCBର ହଠାତ୍ ନିଷ୍ପତ୍ତିରେ ସମସ୍ତେ ଆଶ୍ଚର୍ଯ୍ୟ

ବାଂଲାଦେଶ କ୍ରିକେଟ୍‌କୁ ବଡ଼ ଝଟକା । ଦେଶର ସବୁଠାରୁ ଲୋକପ୍ରିୟ ଟି-୨୦ ଲିଗ୍‌ ବାଂଲାଦେଶ ପ୍ରିମିୟର ଲିଗ୍‌ ବା BPLକୁ ଏଥର ପାଇଁ ସସ୍‌ପେଣ୍ଡ କରିଦିଆଯାଇଛି । ଯେଉଁ ଲିଗ୍‌କୁ ନେଇ କ୍ରିକେଟ୍‌ ପ୍ରେମୀଙ୍କ ମଧ୍ୟରେ ସବୁବେଳେ ଉତ୍ସାହ ରହିଥାଏ, ସେହି ଟୁର୍ଣ୍ଣାମେଣ୍ଟ ଏବେ ନିଜେ ଆର୍ଥିକ ସଙ୍କଟରେ ଫସିଯାଇଛି । ଗତ ଦୁଇ ବର୍ଷରେ BPLରୁ ବୋର୍ଡକୁ କୋଟି କୋଟି ଟଙ୍କାର କ୍ଷତି ହୋଇଥିବା ଦାବି କରାଯାଇଛି ।

ବାଂଲାଦେଶ କ୍ରିକେଟ୍‌ ବୋର୍ଡ (BCB) ପକ୍ଷରୁ ବଡ଼ ନିଷ୍ପତ୍ତି ନିଆଯାଇ କୁହାଯାଇଛି ଯେ ଚଳିତ ବର୍ଷ BPL ଆୟୋଜନ ହେବ ନାହିଁ । ଲିଗ୍‌କୁ ନୂଆ ଢଙ୍ଗରେ ଏବଂ ଅଧିକ ସୁବ୍ୟବସ୍ଥିତ ଭାବେ ଫେରାଇ ଆଣିବାକୁ ବୋର୍ଡ ଚାହୁଁଛି ।

ଏହି ନିଷ୍ପତ୍ତି ପଛରେ ମୁଖ୍ୟ କାରଣ ହେଉଛି ଲଗାତାର ଆର୍ଥିକ କ୍ଷତି । BCB ଅଧ୍ୟକ୍ଷ ତଥା ପୂର୍ବତନ କ୍ରିକେଟର ତମିମ ଇକବାଲଙ୍କ କହିବା ଅନୁସାରେ, ଗତ ଦୁଇ ବର୍ଷ ମଧ୍ୟରେ BPL ଯୋଗୁଁ ବୋର୍ଡକୁ ପ୍ରାୟ ୩.୩ ମିଲିୟନ୍ ଡଲାର, ଅର୍ଥାତ୍ ପ୍ରାୟ ୩୧.୫ କୋଟି ଟଙ୍କାର କ୍ଷତି ହୋଇଛି ।

ତମିମ ଇକବାଲ କହିଛନ୍ତି ଯେ BPL ଏକ ଭଲ ଟୁର୍ଣ୍ଣାମେଣ୍ଟ ଏବଂ କ୍ରିକେଟ୍‌ପ୍ରେମୀମାନେ ଏହାକୁ ଭଲପାଆନ୍ତି । କିନ୍ତୁ ଫ୍ରାଞ୍ଚାଇଜି କ୍ରିକେଟ୍‌ରୁ ବୋର୍ଡକୁ ଲାଭ ହେବା ଉଚିତ, କ୍ଷତି ନୁହେଁ । ତେଣୁ ଆଭ୍ୟନ୍ତରୀଣ ସମସ୍ୟାର ସମାଧାନ ନହେବା ପର୍ଯ୍ୟନ୍ତ କ୍ଷତିରେ ଚାଲୁଥିବା ଟୁର୍ଣ୍ଣାମେଣ୍ଟକୁ ସସପେଣ୍ଡ କରିବା ଭୁଲ ନୁହେଁ ବୋଲି ସେ କହିଛନ୍ତି ।

ବିବାଦରେ ରହିଛି BPL

କେବଳ ଆର୍ଥିକ କ୍ଷତି ନୁହେଁ, BPL ଗତ କିଛି ସମୟ ଧରି ବିବାଦରେ ମଧ୍ୟ ରହିଆସିଛି। ଚଳିତ ବର୍ଷ ମେ’ ମାସରେ BCB ଜଣେ ଖେଳାଳି ଏବଂ ଟିମ୍‌ର କିଛି ଅଧିକାରୀଙ୍କୁ ସସ୍‌ପେଣ୍ଡ କରିଥିଲା । ବୋର୍ଡର ଆଣ୍ଟି-କରପ୍ସନ୍‌ ୟୁନିଟ୍‌ ସେମାନଙ୍କୁ ବେଟିଂ ବା ସଟ୍ଟାବାଜି ସହ ଜଡ଼ିତ ଥିବା ନେଇ ଚିହ୍ନଟ କରିଥିଲା ।
ତମିମ ଇକବାଲଙ୍କ କହିବା ଅନୁସାରେ, BPLକୁ ପୁଣି ଠିକ୍‌ ରାସ୍ତାରେ ଫେରାଇ ଆଣିବା ପାଇଁ ବୋର୍ଡ ପ୍ରୟାସ କରିବ। ସମସ୍ୟାଗୁଡ଼ିକର ସମାଧାନ ପରେ ଲିଗ୍‌କୁ ଯଥାଶୀଘ୍ର ପୁଣି ଆରମ୍ଭ କରିବା ହେଉଛି ବୋର୍ଡର ଲକ୍ଷ୍ୟ ।

୨୦୧୨ରେ ହୋଇଥିଲା BPLର ଆରମ୍ଭ

ବାଂଲାଦେଶ ପ୍ରିମିୟର ଲିଗ୍‌ର ଆରମ୍ଭ ୨୦୧୨ ମସିହାରେ ହୋଇଥିଲା । ଗତ ୧୫ ବର୍ଷ ମଧ୍ୟରେ ଏହାର ୧୨ଟି ସିଜନ୍‌ ଖେଳାଯାଇଛି । ୨୦୧୪ରେ ରାଜନୈତିକ ସଙ୍କଟ କାରଣରୁ ଏବଂ ୨୦୨୦ ଓ ୨୦୨୧ରେ କୋଭିଡ୍‌ ମହାମାରୀ କାରଣରୁ BPL ଆୟୋଜନ ହୋଇନଥିଲା ।