ବାରବାଟୀରେ ଟିମ୍ ଇଣ୍ଡିଆ ବଡ଼ ବିଜୟ । ୧୦ ବର୍ଷ ପରେ ପ୍ରତିଶୋଧ ନେଲା ଭାରତ । ୨୦୧୫ରେ ବାରବାଟୀ ଷ୍ଟାଡିୟମରେ ଭାରତ ଶୋଚନୀୟ ପରାଜୟ ବରଣ କରିଥିଲା । ଆଉ ୨୦୨୫ରେ ଏହାର ବଦଲା ନେଇଛି ଟିମ୍ ଇଣ୍ଡିଆ । ଦକ୍ଷିଣ ଆଫ୍ରିକାକୁ ପ୍ରଥମ ଟି-୨୦ରେ ଶୋଚନୀୟ ଭାବେ ପରାସ୍ତ କରିଛି ସୂର୍ଯ୍ୟ ବ୍ରିଗେଡ୍‌ ।

ତାରିଖ ଥିଲା ୫ ଅକ୍ଟୋବର ୨୦୧୫ । ସ୍ଥାନ- ବାରବାଟୀ ଷ୍ଟାଡିୟମ, କଟକ । ଟି-୨୦ ମ୍ୟାଚ୍‌ରେ ମୁହାଁମୁହିଁ ହୋଇଥିଲେ ଭାରତ-ଦକ୍ଷିଣ ଆଫ୍ରିକା । ଏହି ମ୍ୟାଚ୍‌ରେ ଟସ୍‌ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା ଦକ୍ଷିଣ ଆଫ୍ରିକା । ଅର୍ଥାତ ବ୍ୟାଟିଂ କରିଥିଲା ଟିମ୍ ଇଣ୍ଡିଆ । ଆଉ ମାତ୍ର ୯୨ ରନ୍‌ କରି ଅଲଆଉଟ୍‌ ହୋଇଥିଲା । ଭାରତ ପକ୍ଷରୁ ରୋହିତ ଶର୍ମା ଓ ସୁରେଶ ରାଇନା ସର୍ବାଧିକ ୨୨ ରନ୍‌ କରିଥିଲେ। ଭାରତର ୭ ଜଣ ବ୍ୟାଟ୍ସମ୍ୟାନ୍‌ ଦୁଇ ଅଙ୍କ ମଧ୍ୟ ଛୁଇଁ ପାରିନଥିଲା । ସେହିପରି ଦକ୍ଷିଣ ଆଫ୍ରିକା ପକ୍ଷରୁ ଏଲବି ମୋର୍କେଲ ସର୍ବାଧିକ ୩ଟି ଓ୍ବିକେଟ୍‌ ନେଇଥିଲେ ।

୯୩ ରନ୍‌ର ଟାର୍ଗେଟ ନେଇ ପଡ଼ିଆକୁ ଓହ୍ଲାଇଥିବା ଦକ୍ଷିଣ ଆଫ୍ରିକା ଏହି ଲକ୍ଷ୍ୟକୁ ଅତି ସହଜରେ ହାସଲ କରି ନେଇଥିଲା । ଋ ଓ୍ବିକେଟରେ ଭ୍ରମଣକାରୀ ଦଳ ଏହି ମ୍ୟାଚକୁ ନିଜ ନାମରେ କରିଥିଲା । ଦକ୍ଷିଣ ଆଫ୍ରିକା ପକ୍ଷରୁ ଜେପି ଡୁମୁନି ସର୍ବାଧିକ ୩୦ ରନ୍‌ କରିଥିଲେ । ଆଉ ଘରୋଇ ମାଟିରେ ଲଜ୍ଜାଜନକ ପରାଜୟ ବରଣ କରିଥିଲା ଧୋନିଙ୍କ ନେତୃତ୍ବାଧୀନ ଟିମ୍ ଇଣ୍ଡିଆ ।

୨୦୧୫ରେ ହୋଇଥିବା ଏହି ଲଜ୍ଜାଜନକ ପରାଜୟର ବଦଲା ୨୦୨୫ରେ ନେଇଛି ଟିମ୍ ଇଣ୍ଡିଆ । ୯ ଡିସେମ୍ବରରେ ଖେଳାଯାଇଥିବା ମ୍ୟାଚ୍‌ରେ ଟସ୍‌ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା ଦକ୍ଷିଣ ଆଫ୍ରିକା । ପ୍ରଥମ ବ୍ୟାଟିଂ କରି ଏଥର କିନ୍ତୁ ଭାରତ ଦକ୍ଷିଣ ଆଫ୍ରିକା ସାମ୍ନାରେ ୧୭୫ ରନ୍‌ର ବଡ଼ ସ୍କୋର ରଖିଥିଲା । ଯଦିଓ ଆରମ୍ଭରୁ ଭାରତର ବ୍ୟାଟିଂ ବିପର୍ଯ୍ୟୟର ସାମ୍ନା କରିଥିଲା । କିନ୍ତୁ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ୫୯ ରନ୍‌ ବଳରେ ଭାରତ ୧୭୫ ରନ୍‌ କରିବାରେ ସଫଳ ହୋଇଥିଲା ।

୧୭୬ ରନ୍‌ର ଟାର୍ଗେଟ ନେଇ ପଡ଼ିଆକୁ ଓହ୍ଲାଇଥିବା ଦକ୍ଷିଣ ଆଫ୍ରିକା ଆରମ୍ଭରୁ ବ୍ୟାକଫୁଟରେ ରହିଥିଲା । ଭାରତୀୟ ବୋଲରଙ୍କ ଆକ୍ରମଣାତ୍ମକ ବୋଲିଂର ସାମ୍ନା କରିପାରିନଥିଲେ ଭ୍ରମଣକାରୀ ଦଳର ବ୍ୟାଟ୍ସମ୍ୟାନ୍‌ । ଯାହାଫଳରେ ମାତ୍ର ୭୪ ରନ୍‌ରେ ଅଲଆଉଟ୍‌ ହୋଇଥିଲା ଦକ୍ଷିଣ ଆଫ୍ରିକା । ଯାହାଫଳରେ ଭାରତ ୧୦୧ ରନ୍‌ର ବଡ଼ ବିଜୟ ହାସଲ କରିଥିଲା । ଭାରତ ପକ୍ଷରୁ ବୁମ୍ରା, ଅର୍ଶଦୀପ, ବରୁଣ ଓ ଅକ୍ସର ପଟେଲ ଦୁଇଟି ଲେଖାଏଁ ଓ୍ବିକେଟ୍‌ ଅକ୍ତିଆର କରିଥିଲେ । ଏହି ବିଜୟ ସହ ଭାରତ ୨୦୧୫ରେ ବାରବାଟୀରେ ହୋଇଥିବା ଲଜ୍ଜାଜନକ ପରାଜୟର ପ୍ରତିଶୋଧ ସେହି ବାରବାଟୀରେ ନେଇଛି ।