ଡିସେମ୍ବର ୯ରେ ବାରବାଟୀ ଷ୍ଟାଡିୟମରେ ଖେଳାଯିବ ମହାମୁକାବିଲା । ମୁହାଁମୁହିଁ ହେବେ ଭାରତ-ଦକ୍ଷିଣ ଆଫ୍ରିକା । ଏଥିପାଇଁ ସମସ୍ତ ପ୍ରସ୍ତୁତି ପ୍ରାୟ ଶେଷ ପର୍ଯ୍ୟାୟରେ ପହଞ୍ଚିଛି । ଡିସେମ୍ବର ୧ ତାରିଖରେ ଅନଲାଇନ୍‌ରେ ଟିକେଟ୍‌ ବିକ୍ରି ହୋଇଥିଲା । ଆଉ ଆଜି ଅର୍ଥାତ ଡିସେମ୍ବର ୫ରେ ଅଫଲାଇନ୍‌ରେ ଦର୍ଶକଙ୍କ ପାଇଁ ଟିକେଟ୍‌ ବିକ୍ରି ଆରମ୍ଭ ହୋଇଛି । ସକାଳ ୯ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଟିକେଟ୍‌ ବିକ୍ରି ହେବ ।

କିନ୍ତୁ କାଉଣ୍ଟରରୁ ଖଣ୍ଡେ ଟିକେଟ୍‌ ପାଇବା ପାଇଁ ଗତକାଲି ସନ୍ଧ୍ୟାରେ କ୍ରିକେଟ୍‌ ପ୍ରେମୀ ଭିଡ଼ ଲଗାଇଛନ୍ତି । ଏମିତିକି ପୋଲିସ୍‌ର ବାରଣ ସତ୍ତ୍ବେ ଗୁରୁବାର ସନ୍ଧ୍ୟାରେ ହଠାତ୍‌ ହଜାର ହଜାର ଲୋକ ବାରବାଟୀ ଷ୍ଟାଡିୟମ ଆଡ଼କୁ ମାଡ଼ି ଆସିଥିଲେ । ପୋଲିସ୍ ଯେତେ ଘଉଡ଼ାଇଲେ ବି ସେମାନେ ସେଠାରୁ ଯାଇନଥିଲେ । ଟିକେଟ୍‌ ପାଇଁ ଲାଇନ୍‌ରେ ଠିଆ ହେବାକୁ ଠେଲାପେଲା ଓ ଧସ୍ତାଧସ୍ତି ସ୍ଥିତି ଉପୁଜିଥିଲା । ସାରା ରାତି ଭିଡ଼ ନିୟନ୍ତ୍ରଣ କରିବାକୁ ପୋଲିସ୍‌ ନାକେଦମ୍ ହୋଇଛି ।

ଅଧିକ ପଢ଼ନ୍ତୁ: ଶୀତ କାକରକୁ ହରାଇଲା କ୍ରିକେଟ ନିଶା: ବାରବାଟୀ ଷ୍ଟାଡିୟମ ବାହାରେ ଅସମ୍ଭାଳ ସ୍ଥିତି

ତେବେ ଗତକାଲି ସନ୍ଧ୍ୟାରୁ ଲାଇନ୍‌ରେ ଠିଆ ହେବା ପରେ ମଧ୍ୟ କିଛି ଦର୍ଶକ ଟିକେଟ୍‌ ନପାଇ ନିରାଶ ହୋଇଛନ୍ତି । ଜଣେ କ୍ରିକେଟ୍ ପ୍ରେମୀ କହିଛନ୍ତି, କାଲି ସନ୍ଧ୍ୟା ୭ଟାରୁ ଆସିଛି । ଲୋକ ଗତକାଲି ୨ଟାରୁ ଆସିଛନ୍ତି । ଏତେ ଲମ୍ବା ଲାଇନ୍‌ ଓ ଭିଡ଼ ଦେଖି ଆମେ ହାରିଗଲୁ ଆଜ୍ଞା । ଆମେ ଟିକେଟ୍‌ ନପାଇ ହତାଶ ହୋଇଗଲୁ । ବହୁତ ଆଶା ଥିଲା ଟିମ୍‌ ଇଣ୍ଡିଆକୁ ଚିୟର୍‌ କରିବାକୁ । କିନ୍ତୁ ମୋ ଆଶା ଆଶାରେ ରହିଗଲା ।



ସେହିପରି ଆଉ ଜଣେ ମହିଳା ଦର୍ଶକ କହିଛନ୍ତି, କାଲି ସନ୍ଧ୍ୟା ୫ଟାରୁ ଆସିଛୁ । କିନ୍ତୁ ଏ ଭିଡ଼ ଦେଖି ମୁଣ୍ଡ ବୁଲାଇଲାଣି । ଏପଟୁ ସେପଟ ଖାଲି ଠେଲାପେଲା ହେଉଛନ୍ତି । ଲୋକମାନେ ଏ ଭିଡ଼ ଦେଖି ଫେରି ପଳାଉଛନ୍ତି । ଆମେ କିନ୍ତୁ ଟିକେଟ୍‌ ନେଇକି ଯିବୁ ।

ବାରବାଟୀ ଷ୍ଟାଡିୟମ ଟିକେଟ୍‌ ମୂଲ୍ୟ
ଗ୍ୟାଲେରୀ ନମ୍ବର ୧ ଓ ୩: ୧୧୦୦ ଟଙ୍କା
ଗ୍ୟାଲେରୀ ନମ୍ବର ୨ ଓ ୪: ୯୦୦ ଟଙ୍କା
ଗ୍ୟାଲେରୀ ନମ୍ବର ୫: ୧୨୦୦ ଟଙ୍କା
ଗ୍ୟାଲେରୀ ନମ୍ବର ୭: ୭୦୦ ଟଙ୍କା
ସ୍ପେଶାଲ ଏନକ୍ଲୋଜର: ୬,୦୦୦ ଟଙ୍କା
ଏସି ବକ୍ସ: ୮,୦୦୦ ଟଙ୍କା
ନ୍ୟୁ ପାଭିଲିୟନ୍: ୧୦,୦୦୦ ଟଙ୍କା
କର୍ପୋରେଟ୍ ବକ୍ସ: ୨୦,୦୦୦ ଟଙ୍କା