ପ୍ରଥମେ କୋଲକାତା । ପରେ ଗୌହାଟୀ । ଉଭୟ ଟେଷ୍ଟରେ ଟିମ୍ ଇଣ୍ଡିଆର ଲଜ୍ଜାଜନକ ପରାଜୟ । ଗୌହାଟୀରେ ଖେଳାଯାଇଥିବା ଦ୍ୱିତୀୟ ଟେଷ୍ଟରେ ଦକ୍ଷିଣ ଆଫ୍ରିକା ୪୦୮ ରନର ରେକର୍ଡ ବ୍ୟବଧାନରେ ବିଜୟୀ ହୋଇଥିଲା । ଦକ୍ଷିଣ ଆଫ୍ରିକା ୨୫ ବର୍ଷ ପରେ ଭାରତରେ ଟେଷ୍ଟ ସିରିଜ ଜିତିଥିଲା। ଟେଷ୍ଟ କ୍ରିକେଟ ଇତିହାସରେ ଭାରତର ସବୁଠାରୁ ବଡ଼ ପରାଜୟ ପରେ ପୂର୍ବତନ ପାକିସ୍ତାନୀ କ୍ରିକେଟର ବାସିତ ଅଲି ଜାତୀୟ ଗଣମାଧ୍ୟମରେ ଆଲୋଚନା କରି ଏକ ବଡ଼ ବୟାନ ଦେଇଛନ୍ତି । ସେ କହିଛନ୍ତି, ଗୌତମ ଗମ୍ଭୀରଙ୍କ ପୂର୍ବରୁ ଚୟନ କମିଟିକୁ ହଟାଇ ଦିଆଯିବା ଉଚିତ୍ । ସେ ଏହା ମଧ୍ୟ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିରାଟ କୋହଲିଙ୍କୁ କଲ୍‌ କରିବା ଉଚିତ।

ଏକ ସାକ୍ଷାତକାରରେ ଯେତେବେଳେ ବାସିତ ଅଲିଙ୍କୁ ପଚରାଗଲା ଯେ ଦକ୍ଷିଣ ଆଫ୍ରିକା ବିପକ୍ଷରେ ଭାରତର ପରାଜୟର ସବୁଠାରୁ ବଡ଼ କାରଣ କ'ଣ ? ସେ ଉତ୍ତରରେ କହିଥିଲେ, "ଭାରତୀୟ ଖେଳାଳିମାନେ ହ୍ବାଇଟ୍‌ ବଲ୍ କ୍ରିକେଟ ବିଷୟରେ ଅତ୍ୟଧିକ ଚିନ୍ତା କରୁଛନ୍ତି । ଟଙ୍କା ଏକ ପ୍ରମୁଖ କାରଣ ପାଲଟିଛି। ତୁମେ ଇଂଲଣ୍ଡରେ ସିରିଜ ଡ୍ର' କରିଥିଲ, କିନ୍ତୁ ତାହା ତୁମର ସଫଳତା ନଥିଲା । ଏହା ସେମାନଙ୍କର ଦୋଷ ଥିଲା । ସେମାନଙ୍କର ପିଚ୍ ଭଲ ନଥିଲା। ସେମାନେ ODI ଶୈଳୀର ପିଚ୍ ପ୍ରସ୍ତୁତ କରିଥିଲେ । ସେମାନେ ଦ୍ରୁତ କ୍ରିକେଟ ଖେଳୁଥିଲେ ।

ଅଧିକ ପଢ଼ନ୍ତୁ: ଗୌତମ ଗମ୍ଭୀରଙ୍କ ନିଷ୍ପତ୍ତିକୁ ନେଇ ଏମିତି କହିଲେ କୋହଲି, ସୋସିଆଲ ମିଡିଆରେ ଭାଇରାଲ ହେଲା ପୋଷ୍ଟ

ସେ ଆହୁରି କହିଛନ୍ତି, "ଆପଣଙ୍କ ଖେଳିବା ଶୈଳୀ କାହିଁକି ବଦଳି ଯାଇଛି ? ଭାରତ କ'ଣ ପୂର୍ବରୁ ସ୍ପିନରମାନଙ୍କୁ ଖେଳି ପାରୁନଥିଲା ? ରାହୁଲ ଦ୍ରାବିଡ, ସଚିନ ତେନ୍ଦୁଲକର ଇତ୍ୟାଦି ସ୍ପିନରମାନଙ୍କୁ ଭଲ ଭାବରେ ଖେଳୁ ନଥିଲେ? ଯେତେବେଳେ ଲକ୍ଷ୍ମଣ ଏବଂ ଦ୍ରାବିଡ ଅଷ୍ଟ୍ରେଲିଆ ବିପକ୍ଷରେ ସେହି ପାର୍ଟନରସିପ୍‌ କରିଥିଲେ, ସେତେବଳେ କ'ଣ ବଲ୍‌ ବ୍ରେକ୍‌ ହୋଇନଥିଲା ? ପ୍ରକୃତରେ, ଭାରତର ପ୍ରଶିକ୍ଷକ ଚାହାଁନ୍ତି ଯେ ଟେଷ୍ଟ ଅଢ଼େଇ ଦିନରେ ସରିଯାଉ । ଆଉ ରେଜଲ୍ଟ ତାଙ୍କ ସପକ୍ଷରେ ଆସୁ । କିନ୍ତୁ ଯେତେବେଳେ ଅଢ଼େଇ ଦିନିଆ ପିଚ୍ ପ୍ରସ୍ତୁତ ହୁଏ, ଟସ୍ ଗୁରୁତ୍ବପୂର୍ଣ୍ଣ ଭୂମିକା ତୁଲାଇଥାଏ । ଟେଷ୍ଟରେ ସେହି ଖେଳାଳିମାନଙ୍କୁ ଚୟନ କରାଯିବା ଉଚିତ ଯେଉଁମାନେ ବ୍ୟାଟିଂକୁ ଭଲ ପାଆନ୍ତି, ଯେଉଁମାନେ ସଟ୍ ପସନ୍ଦ କରନ୍ତି । ପନ୍ତଙ୍କ ଭଳି ଖେଳାଳିଙ୍କୁ ଚୟନ କରନ୍ତୁ ନାହିଁ ଯିଏ ଦୁଇଟି ଚୌକା ଏବଂ ଗୋଟିଏ ଛକା ମାରି ଆଉଟ୍ ହେଉଛନ୍ତି । ଯଦି ଆପଣ ଏହା କରନ୍ତି ନାହିଁ, ତେବେ ଭାରତ ବାଂଲାଦେଶ, ୱେଷ୍ଟଇଣ୍ଡିଜ୍ ଏବଂ ପାକିସ୍ତାନ ପରି ଶେଷ ହେବ ।

ବାସିତ ଅଲି ଆହୁରି କହିଛନ୍ତି, 'ଯଦି ଗୌତମ ଗମ୍ଭୀରଙ୍କୁ ହଟାଇବା ବିଷୟରେ ଆଲୋଚନା ହେଉଛି, ତେବେ ପ୍ରଥମେ ଚୟନ କମିଟିକୁ ହଟାଇ ଦିଆଯିବା ଉଚିତ । ଯଦି ଚୟନ କମିଟି ଏବଂ ଗୌତମ ଗମ୍ଭୀରଙ୍କୁ ହଟାଯାଏ, ତେବେ IPL ଶୈଳୀରେ ଟେଷ୍ଟ କ୍ରିକେଟ୍ ଖେଳୁଥିବା ଖେଳାଳିମାନଙ୍କୁ ମଧ୍ୟ ହଟାଯିବା ଉଚିତ । ଟେଷ୍ଟ କ୍ରିକେଟକୁ ଟେଷ୍ଟ କ୍ରିକେଟ୍ ପରି ଖେଳିବା ଉଚିତ'।

ବାସିତ ଅଲି ଆହୁରି କହିଛନ୍ତି, "କେତେବେଳେ ୱାଶିଂଟନ ସୁନ୍ଦର ନମ୍ବର ତିନିରେ ଖେଳୁଛନ୍ତି, କେତେବେଳେ ଆଠରେ, କେତେବେଳେ ଚାରିରେ ଏବଂ କେତେବେଳେ ସାତରେ । ମୁଁ ଅନୁରୋଧ କରୁଛି କି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୟାକରି ବିରାଟ କୋହଲିଙ୍କୁ ଫୋନ୍ କରନ୍ତୁ ଏବଂ ତାଙ୍କୁ କୁହନ୍ତୁ, ଆପଣ ଶୀଘ୍ର ଅବସର ନେଇଛନ୍ତି । ଦେଶକୁ ଆପଣଙ୍କର ଆବଶ୍ୟକତା ଅଛି । ଆପଣ ଆପଣଙ୍କର ଅବସର ଫେରାଇ ନେବା ଉଚିତ । ଏହା ହିଁ ଏକମାତ୍ର ସମାଧାନ।'"