ଲର୍ଡସରେ ରୋହିତ ଶର୍ମା ଖେଳିବେ ତାଙ୍କର ଶେଷ ଦିନିକିଆ ମ୍ୟାଚ୍ ? ଗତ କିଛି ଦିନ ଧରି ଏହି ଚର୍ଚ୍ଚା କ୍ରିକେଟ୍ ମହଳରେ ଜୋର ଧରିଥିଲା । ରୋହିତଙ୍କ ଦିନିକିଆ କ୍ରିକେଟରୁ ଅବସରକୁ ନେଇ ଚାଲିଥିବା ଚର୍ଚ୍ଚା ମଧ୍ୟରେ ବଡ଼ ସ୍ପଷ୍ଟୀକରଣ ଦେଇଛି ବିସିସିଆଇ । BCCI ସମସ୍ତ ଗୁଜବରେ ପୂର୍ଣ୍ଣବିରାମ ଲଗାଇ ସ୍ପଷ୍ଟ କରିଛି—'ହିଟମ୍ୟାନ୍' ଏବେ ବି ଟିମ୍ ଇଣ୍ଡିଆ ପାଇଁ ଖେଳ ଜାରି ରଖିବେ ।

ଗତ କିଛି ଦିନ ଧରି ରୋହିତଙ୍କ ଅବସରକୁ ନେଇ ଜାରି ରହିଥିବା ସମସ୍ତ କଳ୍ପନାଜଳ୍ପନାର ଅନ୍ତ ଘଟାଇଛି ବିସିସିଆଇ । ବୋର୍ଡ ସଚିବ ଦେବଜିତ ସାଇକିଆ ସ୍ପଷ୍ଟ କରିଛନ୍ତି ଯେ, ଇଂଲଣ୍ଡ ବିପକ୍ଷ ଲର୍ଡସରେ ହେବାକୁ ଥିବା ତୃତୀୟ ଦିନିକିଆ ପରେ ରୋହିତ ଶର୍ମା ଅବସର ନେଉନାହାନ୍ତି । ସେ ଆଗାମୀ ଦିନରେ ମଧ୍ୟ ଭାରତ ପାଇଁ ଖେଳ ଜାରି ରଖିବେ । ଗଣମାଧ୍ୟମ ରିପୋର୍ଟରେ ଦାବି କରାଯାଇଥିଲା ଯେ ଇଂଲଣ୍ଡ ବିପକ୍ଷ ତୃତୀୟ ODI ପରେ ରୋହିତ ଶର୍ମା ଦିନିକିଆ ଫର୍ମାଟରୁ ଅବସର ନେବେ, କିନ୍ତୁ BCCI ଏହି ରିପୋର୍ଟଗୁଡ଼ିକୁ ମିଥ୍ୟା ବୋଲି ଖାରଜ କରିଛି ।

ନ୍ୟୁଜ୍‌ ଏଜେନ୍ସି PTI ସହିତ ଆଲୋଚନା କରି BCCI ସଚିବ ଦେବଜିତ ସାଇକିଆ କହିଛନ୍ତି, "ରୋହିତ ଶର୍ମାଙ୍କ ଭବିଷ୍ୟତକୁ ନେଇ ଗଣମାଧ୍ୟମରେ ବହୁତ କଳ୍ପନାଜଳ୍ପନା ଚାଲିଛି । ମୁଁ ପୂର୍ଣ୍ଣ ବିଶ୍ୱାସର ସହିତ କହିପାରିବି ଯେ ରବିବାର ଲର୍ଡସ୍‌ରେ ରୋହିତ ତାଙ୍କର ଶେଷ ମ୍ୟାଚ୍ ଖେଳିବେ ବୋଲି କୌଣସି ଆଲୋଚନା ହୋଇନାହିଁ ।"

ଅଧିକ ପଢ଼ନ୍ତୁ: ଯେଉଁ ମଇଦାନରୁ ରୋହିତଙ୍କ ଓପନିଂ ଆରମ୍ଭ, ସେହିଠାରୁ ଆରମ୍ଭ ହେଲା ଅବସର ଚର୍ଚ୍ଚା ?

ଦେବଜିତ ସାଇକିଆଙ୍କ ବୟାନ ଏପରି ସମୟରେ ଆସିଛି ଯେତେବେଳେ ଗଣମାଧ୍ୟମ ରିପୋର୍ଟରେ ଦାବି କରାଯାଇଥିଲା ଯେ ଚୟନକର୍ତ୍ତା ଏବଂ ପ୍ରଶିକ୍ଷକ ଗୌତମ ଗମ୍ଭୀର ୨୦୨୭ ODI ବିଶ୍ୱକପ୍ ଯୋଜନାରୁ ରୋହିତ ଶର୍ମାଙ୍କୁ ବାଦ ଦେଇଛନ୍ତି । ଏପରି କଳ୍ପନାଜଳ୍ପନା ଥିଲା ଯେ ଟିମ୍ ମ୍ୟାନେଜମେଣ୍ଟ ଯୁବପିଢ଼ିଙ୍କୁ ସୁଯୋଗ ଦେବାକୁ ଚାହୁଁଥିଲା ଏବଂ ରୋହିତ ଶର୍ମାଙ୍କ ଅବସର ପରେ ଯଶସ୍ୱୀ ଜୟସ୍ୱାଲଙ୍କୁ ଇନିଂସ ଓପନ କରିବାର ସୁଯୋଗ ଦିଆଯାଇପାରେ ।

ରୋହିତ ଶର୍ମା ଖେଳିବା ଜାରି ରଖିବେ

ବିସିସିଆଇ ସଚିବ ଆହୁରି କହିଛନ୍ତି, "ରୋହିତ ଶର୍ମା ଭାରତୀୟ ଦିନିକିଆ ଦଳର ଜଣେ ନିୟମିତ ସଦସ୍ୟ । ଯେପର୍ଯ୍ୟନ୍ତ ସେ ଭବିଷ୍ୟତ ଯୋଜନାର ଅଂଶ ଅଛନ୍ତି, ସେପର୍ଯ୍ୟନ୍ତ ସେ ଦେଶ ପାଇଁ ଖେଳ ଜାରି ରଖିବେ। ଅର୍ଥାତ୍ ଲର୍ଡସର ମ୍ୟାଚ୍ ତାଙ୍କର ଶେଷ ଦିନିକିଆ ନୁହେଁ ।"

ଅନ୍ୟପଟେ, ଭାରତ-ଇଂଲଣ୍ଡ ତିନି ମ୍ୟାଚ୍ ବିଶିଷ୍ଟ ଦିନିକିଆ ଶୃଙ୍ଖଳା ବର୍ତ୍ତମାନ ରୋମାଞ୍ଚକ ସ୍ଥିତିରେ ରହିଛି । ଦୁଇଟି ମ୍ୟାଚ୍ ଶେଷ ହେବା ପରେ ଉଭୟ ଦଳ ୧-୧ରେ ସମାନ ସ୍ଥିତିରେ ଅଛନ୍ତି । ତୃତୀୟ ତଥା ନିର୍ଣ୍ଣାୟକ ମୁକାବିଲା ଜୁଲାଇ ୧୯ରେ ଐତିହାସିକ ଲର୍ଡସ ମଇଦାନରେ ଖେଳାଯିବ । ଆଉ ଏହି ମ୍ୟାଚ୍‌ ହିଁ ନିର୍ଣ୍ଣୟ କରିବ କଦିନିକିଆ ସିରିଜ୍‌କୁ ହାତେଇବ କିଏ ।