ଶ୍ରୀଲଙ୍କା କ୍ରିକେଟ୍ ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (BCCI)କୁ ଦୁଇଟି ଚ୍ୟାରିଟି ମ୍ୟାଚ୍ ଖେଳିବାକୁ ଅନୁରୋଧ କରିଥିଲା । ଶ୍ରୀଲଙ୍କା କ୍ରିକେଟ୍ ବାତ୍ୟା 'ଡିଟଓ୍ବା' ପ୍ରଭାବିତ ଲୋକଙ୍କୁ ସାହାଯ୍ୟ କରିବା ପାଇଁ ଡିସେମ୍ବରରେ ଏହି ଟି-୨୦ ମ୍ୟାଚ୍ ଖେଳିବାକୁ ଚାହୁଁଥିଲା । କିନ୍ତୁ ବାଣିଜ୍ୟିକ କାରଣରୁ ବିସିସିଆଇ ଏହି ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛି । ତଥାପି, ଅଗଷ୍ଟରେ ଭାରତୀୟ ଦଳର ଶ୍ରୀଲଙ୍କା ଗସ୍ତ ନିର୍ଦ୍ଧାରିତ ସମୟ ଅନୁଯାୟୀ ରହିବ । ଭାରତ ଏହି ଗସ୍ତରେ ଦୁଇଟି ଟେଷ୍ଟ ଏବଂ ଦୁଇଟି ଟି-୨୦ ମ୍ୟାଚ୍ ଖେଳିବ ।

ବିସିସିଆଇ କାହିଁକି ପ୍ରସ୍ତାବକୁ ପ୍ରତ୍ୟାଖ୍ୟାନ କଲା ?

ସାମ୍ବାଦିକମାନଙ୍କ ସହ ଆଲୋଚନାରେ ଶ୍ରୀଲଙ୍କା କ୍ରିକେଟ୍ ସଭାପତି ଶାମ୍ମି ସିଲଭା କହିଛନ୍ତି ଯେ ସେମାନେ ବାତ୍ୟା 'ଡିଟ୍‌ଓ୍ବା' ପୀଡିତଙ୍କୁ ସାହାଯ୍ୟ କରିବା ପାଇଁ ଡିସେମ୍ବର ୨୭ ଏବଂ ୨୯ ତାରିଖରେ ଦୁଇଟି ଚ୍ୟାରିଟି ମ୍ୟାଚ୍ ଖେଳିବା ଯୋଜନା ଉପରେ ଆଲୋଚନା କରିଛନ୍ତି । ତଥାପି, ସେମାନେ ସମୟ ମଧ୍ୟରେ ବାଣିଜ୍ୟିକ ବ୍ୟବସ୍ଥା ଚୂଡ଼ାନ୍ତ କରିପାରି ନଥିଲେ । ଘୂର୍ଣ୍ଣିଝଡ଼ ଡିଟ୍‌ଓ୍ବା ପ୍ରଭାବରେ ଶ୍ରୀଲଙ୍କାରେ ପ୍ରାୟ ୧.୬ ବିଲିୟନ ଆମେରିକୀୟ ଡଲାର କ୍ଷତି ହେବା ସହ ୬୦୦ ଲୋକଙ୍କ ମୃତ୍ୟୁ ହୋଇଥିଲା।

ଅଗଷ୍ଟରେ ଭାରତ ଶ୍ରୀଲଙ୍କା ଗସ୍ତ କରିବ

ଶାମ୍ମି ସିଲଭା ମଧ୍ୟ ସ୍ପଷ୍ଟ କରିଛନ୍ତି ଯେ ଅଗଷ୍ଟରେ ଭାରତୀୟ ଦଳର ଶ୍ରୀଲଙ୍କା ଗସ୍ତ ନିର୍ଦ୍ଧାରିତ ସମୟ ଅନୁଯାୟୀ ରହିବ। ଏହି ଗସ୍ତରେ ଦୁଇଟି ଟେଷ୍ଟ ମ୍ୟାଚ୍ ଖେଳାଯିବ । ଯାହା ବିଶ୍ୱ ଟେଷ୍ଟ ଚାମ୍ପିଅନସିପ୍ ୨୦୨୫-୨୭ ର ଅଂଶ । ଭାରତ ପୂର୍ବରୁ କୌଣସି ଟେଷ୍ଟ ସିରିଜ୍ ଖେଳିନାହିଁ। ଏହି ଗସ୍ତରେ ଦୁଇଟି ଟି-୨୦ ଆନ୍ତର୍ଜାତୀୟ ମ୍ୟାଚ୍ ମଧ୍ୟ ଖେଳାଯିବ ।

ଶ୍ରୀଲଙ୍କା କ୍ରିକେଟ୍ ମଧ୍ୟ ଆସନ୍ତା ସପ୍ତାହରେ ପାକିସ୍ତାନ ବିପକ୍ଷରେ ଖେଳାଯିବାକୁ ଥିବା ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜରୁ ପ୍ରାପ୍ତ ଆୟକୁ ଘୂର୍ଣ୍ଣିବାତ୍ୟା ରିଲିଫ୍ ପାଣ୍ଠିକୁ ଦାନ କରିବ । ଏହି ମ୍ୟାଚ୍‌ଗୁଡ଼ିକ ଡାମ୍ବୁଲାରେ ଖେଳାଯିବ ।

ଶ୍ରୀଲଙ୍କା ଟି-୨୦ ବିଶ୍ୱକପ୍ ପାଇଁ ପ୍ରସ୍ତୁତି କରୁଛି

ଟି-୨୦ ବିଶ୍ୱକପ୍ ୨୦୨୬ ଫେବୃଆରୀ ୭ ତାରିଖରେ ଆରମ୍ଭ ହେବ । ଶ୍ରୀଲଙ୍କା ମଧ୍ୟ ଭାରତ ସହିତ ଟୁର୍ଣ୍ଣାମେଣ୍ଟ ଆୟୋଜନ କରୁଛି । ପାକିସ୍ତାନ ତା'ର ସମସ୍ତ ମ୍ୟାଚ୍ ଶ୍ରୀଲଙ୍କାରେ ଖେଳିବ, ସମସ୍ତ ଗ୍ରୁପ୍ B ମ୍ୟାଚ୍ ଶ୍ରୀଲଙ୍କାରେ ଅନୁଷ୍ଠିତ ହେବ । ଯଦି ପାକିସ୍ତାନ ଫାଇନାଲରେ ପହଞ୍ଚେ ତେବେ ଟାଇଟଲ୍ ମ୍ୟାଚ୍ ମଧ୍ୟ କଲମ୍ବୋରେ ଖେଳାଯିବ ।