ଲକ୍ଷ୍ନୌରେ ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଚତୁର୍ଥ ଟି-୨୦ ଅନ୍ତର୍ଜାତୀୟ ମ୍ୟାଚ୍ ଘନ କୁହୁଡ଼ି ଯୋଗୁଁ ବାତିଲ୍ କରାଯାଇଥିଲା । କୁହୁଡ଼ି ଏତେ ଘନ ଥିଲା ଯେ ଟସ୍ ମଧ୍ୟ ହୋଇପାରିନଥିଲା । ମ୍ୟାଚ୍ ବାତିଲ୍ ହେବା ପରେ ପ୍ରଶଂସକମାନେ କ୍ଷୁବ୍ଧ ହୋଇଥିଲେ । ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (ବିସିସିଆଇ) ମ୍ୟାଚ୍‌ ବାତିଲ ପରେ ପ୍ରତିକ୍ରିୟା ଦେଇଛି । ବିସିସିଆଇ ଏବେ ଭବିଷ୍ୟତ କାର୍ଯ୍ୟସୂଚୀରେ ପାଗ ଏବଂ ପ୍ରଦୂଷଣ ବିଚାରକୁ ଅଧିକ ଗମ୍ଭୀରତାର ସହ ନେବ ବୋଲି ବିସିସିଆଇର ଜଣେ ବରିଷ୍ଠ ଅଧିକାରୀ କହିଛନ୍ତି ।

ଜାତୀୟ ଗଣମାଧ୍ୟମରେ ଆଲୋଚନା ସମୟରେ ବିସିସିଆଇ ଉପାଧ୍ୟକ୍ଷ ରାଜୀବ ଶୁକ୍ଲା ସ୍ୱୀକାର କରିଛନ୍ତି ଯେ ବାତିଲ୍ ଅତ୍ୟନ୍ତ ନିରାଶାଜନକ ଥିଲା । ସେ କହିଛନ୍ତି, "ଲକ୍ଷ୍ନୌ ଟି-୨୦ ମ୍ୟାଚ୍ ବାତିଲ୍ କରାଯାଇଥିଲା ଏବଂ ସମସ୍ତେ ନିରାଶ ହୋଇଛନ୍ତି। ସମସ୍ତ ପ୍ରସ୍ତୁତି ସମ୍ପୂର୍ଣ୍ଣ ହୋଇଥିଲା ଏବଂ ଶେଷ ମୁହୂର୍ତ୍ତ ପର୍ଯ୍ୟନ୍ତ ଯାଞ୍ଚ କରାଯାଇଥିଲା । କିନ୍ତୁ ଶେଷରେ ଘନ କୁହୁଡ଼ି ଯୋଗୁଁ ମ୍ୟାଚ୍ ବାତିଲ୍ କରିବାକୁ ପଡିଲା ।"

ଭାରତ ରତ୍ନ ଶ୍ରୀ ଅଟଳ ବିହାରୀ ବାଜପେୟୀ ଏକାନା କ୍ରିକେଟ୍ ଷ୍ଟାଡିୟମରେ ସନ୍ଧ୍ୟା ୭ଟାରେ ମ୍ୟାଚ୍ ଆରମ୍ଭ ହେବାର କାର୍ଯ୍ୟକ୍ରମ ଥିଲା । କିନ୍ତୁ ଘନ କୁହୁଡ଼ି କାରଣରରୁ ଟସ୍ ମଧ୍ୟ ହୋଇପାରିନଥିଲା । ଛଅ ଥର ଯାଞ୍ଚ ପରେ ମ୍ୟାଚ୍ ଅଧିକାରୀମାନେ ରାତି ୯:୩୦ ରେ ଶେଷରେ ଖେଳ ବାତିଲ କରିବାକୁ ନିଷ୍ପତ୍ତି ନେଇଥିଲେ । ରାଜୀବ ଶୁକ୍ଲା ସ୍ୱୀକାର କରିଛନ୍ତି ଯେ ଡିସେମ୍ବର ୧୫ରୁ ଜାନୁଆରୀ ୧୫ ମଧ୍ୟରେ ଉତ୍ତର ଭାରତରେ କୁହୁଡ଼ି ଏକ ପ୍ରମୁଖ ସମସ୍ୟା ହୋଇଥାଏ । ତେଣୁ ଭବିଷ୍ୟତରେ ମ୍ୟାଚ୍‌ର କାର୍ଯ୍ୟସୂଚୀ କରିବା ସମୟରେ ଏହି କାରଣକୁ ବିଚାରକୁ ନିଆଯିବ ବୋଲି ସେ କହିଛନ୍ତି ।

ଯାଞ୍ଚ ସମୟରେ ରାଜୀବ ଶୁକ୍ଲା ନିଜେ ଅମ୍ପାୟାରଙ୍କ ସହ କଥାବାର୍ତ୍ତା କରୁଥିବା ପଡ଼ିଆରେ ଦେଖାଯାଇଥିଲେ। ସେ ଏହା ମଧ୍ୟ ଉଲ୍ଲେଖ କରିଛନ୍ତି ଯେ ପ୍ରଦୂଷଣ ସମସ୍ୟା କେବଳ ଗୋଟିଏ ସହର ପର୍ଯ୍ୟନ୍ତ ସୀମିତ ନୁହେଁ; ଦିଲ୍ଲୀ-ଏନସିଆର ଏବଂ ଉତ୍ତର ପ୍ରଦେଶର ଅନେକ ସ୍ଥାନରେ ବାୟୁ ଗୁଣବତ୍ତା ଖରାପ । ଏପରିସ୍ଥିତିରେ ଫିଲ୍ଡରମାନେ ବିଶେଷ କରି ବାଉଣ୍ଡ୍ରି ନିକଟରେ ଫିଲ୍ଡିଂ କରିବା ସମୟରେ ଏବଂ ଉଚ୍ଚ କ୍ୟାଚ୍‌ ନେବା ଅତ୍ୟନ୍ତ କଷ୍ଟକର ହୋଇଥାଏ ।

ମ୍ୟାଚ୍‌ ବାତିଲ ହେବା ପରେ ଷ୍ଟାଡିୟମ୍ ବାହାରେ ପ୍ରଶଂସକମାନେ ବେଶ୍‌ କ୍ରୋଧିତ ଥିଲେ । ଏକ ଭିଡିଓରେ ଦେଖିବାକୁ ମିଳୁଛି ଯେଉଁଥିରେ ଜଣେ କ୍ରିକେଟ୍‌ପ୍ରେମୀ ସେମାନଙ୍କର ଟିକେଟ୍‌ ଦେଖାଉଛନ୍ତି ଏବଂ ଅଧିକାରୀଙ୍କଠାରୁ ଟଙ୍କା ଫେରସ୍ତ ପାଇଁ ଦାବି କରୁଛନ୍ତି । ଜଣେ ପ୍ରଶଂସକ କହିଛନ୍ତି, "ମୁଁ ମ୍ୟାଚ୍ ଦେଖିବାକୁ ଏଠାକୁ ଆସିବା ପାଇଁ ତିନି ବସ୍ତା ଗହମ ବିକ୍ରି କରିଥିଲି। ମୁଁ ମୋର ଟଙ୍କା ଫେରସ୍ତ ଚାହୁଁଛି..."। ଅନ୍ୟ ଜଣେ ପ୍ରଶଂସକ କହିଛନ୍ତି ଯେ ପଡ଼ିଆରେ ଟିମ୍‌ ଇଣ୍ଡିଆର ଖେଳ ଦେଖି ନପାରି ମୁଁ ଦୁଃଖିତ ।