ପୁଣି କମ୍ପିବ ଚିନ୍ନାସ୍ବାମୀ ଷ୍ଟାଡିୟମ । ବେଙ୍ଗାଲୁରୁର ଚିନ୍ନାସ୍ବାମୀ ଷ୍ଟାଡିୟମରେ ପୁଣି ଶୁଣାଯିବ RCB...RCB ନାରା । ଅନ୍ତର୍ଜାତୀୟ କ୍ରିକେଟ୍ ଏବଂ ଇଣ୍ଡିଆନ୍ ପ୍ରିମିୟର ଲିଗ୍ (IPL) ଏବେ ବେଙ୍ଗାଲୁରୁର ପ୍ରତିଷ୍ଠିତ ଏମ. ଚିନ୍ନାସ୍ୱାମୀ ଷ୍ଟାଡିୟମକୁ ଫେରିବାକୁ ଯାଉଛି । କର୍ଣ୍ଣାଟକ ରାଜ୍ୟ କ୍ରିକେଟ୍ ସଂଘ (KSCA) ରାଜ୍ୟ ସରକାରଙ୍କ ଗୃହ ବିଭାଗରୁ ମ୍ୟାଚ୍ ଆୟୋଜନ ପାଇଁ ସରକାରୀ ଅନୁମୋଦନ ପାଇଛି । ଏହି ଅନୁମୋଦନ କିଛି ସର୍ତ୍ତ ଏବଂ ନିୟମାବଳୀ ସହିତ ଆସିଛି ।

KSCA ଏକ ପ୍ରେସ୍ ନୋଟ୍ ଜାରି କରି କହିଛି ଯେ ପୂର୍ବରୁ ସୁରକ୍ଷା, ଭିଡ଼ ପରିଚାଳନା ଏବଂ ଷ୍ଟାଡିୟମ୍ ପରିଚାଳନା ସହିତ ଜଡିତ ସମସ୍ତ ଆବଶ୍ୟକତା ସମ୍ପର୍କରେ ବିଶେଷଜ୍ଞ ସମୀକ୍ଷା କମିଟିକୁ ଏକ ବିସ୍ତୃତ ରୋଡମ୍ୟାପ୍ ଦାଖଲ କରିସାରିଛି । KSCA କହିଛି, "ଏହି ଅନୁମତି ସରକାର ଏବଂ ପ୍ରାସଙ୍ଗିକ କର୍ତ୍ତୃପକ୍ଷଙ୍କ ଦ୍ୱାରା ସ୍ଥିର କରାଯାଇଥିବା ସର୍ତ୍ତାବଳୀ ଉପରେ ନିର୍ଭର କରେ । KSCA ସମସ୍ତ ନିୟମାବଳୀକୁ ସମ୍ପୂର୍ଣ୍ଣ ପାଳନ କରିବାକୁ ଆତ୍ମବିଶ୍ୱାସୀ ରହିଛି ।"

ଜୁନ୍ ୪, ୨୦୨୫ରେ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋର (RCB) ବିଜୟ ଉତ୍ସବ ସମୟରେ ଚିନ୍ନାସ୍ୱାମୀ ଷ୍ଟାଡିୟମ ବାହାରେ ବିଶୃଙ୍ଖଳା ସୃଷ୍ଟି ହୋଇଥିଲା । ବିଜୟ ଉତ୍ସବ ପାଳନ ସମୟରେ ଷ୍ଟାଡିମୟ ବାହାରେ ଦଳାଚକଟା ହୋଇଥିଲେ । ଯେଉଁଥିରେ ୧୧ ଜଣଙ୍କର ମୃତ୍ୟୁ ହୋଇଥିଲା । ଏହି ଘଟଣା ପରେ ସୁରକ୍ଷା କାରଣରୁ ଷ୍ଟାଡିୟମରେ କୌଣସି ପ୍ରମୁଖ କ୍ରିକେଟ୍ ମ୍ୟାଚ୍ ଆୟୋଜନ କରାଯାଇନଥିଲା । ଏପରିକି ୨୦୨୫-୨୬ ବିଜୟ ହଜାରେ ଟ୍ରଫି ମ୍ୟାଚ୍ ଚିନ୍ନାସ୍ୱାମୀ ଷ୍ଟାଡିୟମରେ ଅନୁଷ୍ଠିତ ହୋଇନଥିଲା । ୨୦୨୫ ମହିଳା କ୍ରିକେଟ ବିଶ୍ୱକପ୍ ଏବଂ ଆଗାମୀ ପୁରୁଷ T-୨୦ ବିଶ୍ୱକପ୍ ପାଇଁ ବେଙ୍ଗାଲୁରୁକୁ ଭେନ୍ୟୁ ଭାବରେ ମନୋନୀତ କରାଯାଇନଥିଲା ।

ଡିସେମ୍ବରରେ କର୍ଣ୍ଣାଟକ କ୍ୟାବିନେଟ୍ IPL ମ୍ୟାଚ୍ ଆୟୋଜନ ପାଇଁ ସର୍ତ୍ତମୂଳକ ଅନୁମୋଦନ ପ୍ରଦାନ କରିଥିଲେ । ନବନିଯୁକ୍ତ KSCA ସଭାପତି ଭେଙ୍କଟେଶ ପ୍ରସାଦ ତାଙ୍କ କାର୍ଯ୍ୟକାଳ ପାଇଁ ଷ୍ଟାଡିୟମର ପୁନରୁଦ୍ଧାରକୁ ପ୍ରାଥମିକତା ଦେଇଥିଲେ । ବର୍ତ୍ତମାନ ସରକାରୀ ଅନୁମୋଦନ ସହିତ ଏହା ସ୍ପଷ୍ଟ ଯେ ଚିନ୍ନାସ୍ୱାମୀ ଷ୍ଟାଡିୟମ ପୁଣି ଥରେ ଦର୍ଶକଙ୍କ ପାଇଁ ଖୋଲିବ । ICCର ଟୁର୍ଣ୍ଣାମେଣ୍ଟ ସୂଚୀ ପୂର୍ବରୁ ସ୍ଥିର ହୋଇସାରିଥିବାରୁ ଏହି ଭେନ୍ୟୁକୁ ଅନ୍ତର୍ଜାତୀୟ ମ୍ୟାଚ୍ ଫେରିବାକୁ କିଛି ସମୟ ଲାଗିପାରେ । ତଥାପି, ଚିନ୍ନାସ୍ୱାମୀ ଷ୍ଟାଡିୟମ ଚଳିତ ବର୍ଷ IPLରେ ମ୍ୟାଚ୍ ଆୟୋଜନ କରିପାରେ । ଏହା ବେଙ୍ଗାଲୁରୁ କ୍ରିକେଟ୍ ପ୍ରେମୀଙ୍କ ପାଇଁ ଏକ ବଡ଼ ଆଶ୍ୱସ୍ତି ଏବଂ ରୋମାଞ୍ଚକର ଖବର ଯେଉଁମାନେ ଦୀର୍ଘ ସମୟ ଧରି ନିଜ ପ୍ରିୟ ଗ୍ରାଉଣ୍ଡରେ ମ୍ୟାଚ୍ ପାଇଁ ଅପେକ୍ଷା କରି ରହିଛନ୍ତି ।