କଥାରେ ଅଛି ଯେପରି ପିତା, ସେପରି ପୁତ୍ର । କିନ୍ତୁ ଯେତେବେଳେ ଜଣେ ପୁଅ ତାଙ୍କ ପିତାଙ୍କୁ ପଛରେ ପକାଇ ଆଗକୁ ବଢ଼େ, ସେହି ସମୟଟି ଜଣେ ପିତାଙ୍କ ପାଇଁ ବେଶ୍‌ ଗର୍ବର ମୁହୂର୍ତ୍ତ । ଜାନୁଆରୀ ୧୧, ୨୦୨୬ । ରବିବାର । ବାଂଲାଦେଶ ପ୍ରିମିୟର ଲିଗ୍‌ରେ ଏକ ରୋମାଞ୍ଚକର ଘଟଣା ଦେଖିବାକୁ ମିଳିଥିଲା । କ୍ରିକେଟ୍‌ ଇତିହସରେ ପ୍ରଥମ ଥର ପାଇଁ ବାପ-ପୁଅ ଏକାଠି ବ୍ୟାଟିଂ କରିଥିଲେ । ଆଉ ସବୁଠୁ ଆକର୍ଷଣୀୟ କଥା ହେଉଛି ପୁଅ ତାଙ୍କ ପିତାଙ୍କ ରେକର୍ଡ ଭାଙ୍ଗିଛି ।

ରବିବାର ଦିନ ବାଂଲାଦେଶ ପ୍ରିମିୟର ଲିଗ୍‌ରେ ନୋଆଖାଲି ଏକ୍ସପ୍ରେସ୍ ଏବଂ ଢାକା କ୍ୟାପିଟାଲ୍ସ ମଧ୍ୟରେ ମ୍ୟାଚ୍‌ ଅନୁଷ୍ଠିତ ହୋଇଥିଲା । ଏହି ମ୍ୟାଚ୍‌ରେ ବାପା-ପୁଅ ଯୋଡ଼ି ଏକ ମ୍ୟାଚ୍‌ ଓ୍ବିନିଂ ଅର୍ଦ୍ଧଶତକୀୟ ପାର୍ଟନରସିପ୍‌ କରିଥିଲେ ।

ଆଫଗାନିସ୍ତାନର କିମ୍ବଦନ୍ତୀ ଅଲରାଉଣ୍ଡର ମହମ୍ମଦ ନବି ଏବଂ ତାଙ୍କ ପୁଅ ହାସନ ଇସାଖିଲ୍ BPLରେ ନୋଆଖାଲି ଏକ୍ସପ୍ରେସ୍ ପକ୍ଷରୁ ଖେଳୁଛନ୍ତି । ଢାକା କ୍ୟାପିଟାଲ୍ସ ବିପକ୍ଷ ମ୍ୟାଚ୍‌ରେ ନୋଆଖାଲି ଏକ୍ସପ୍ରେସ୍ ପ୍ରଥମେ ବ୍ୟାଟିଂ କରିଥିଲେ । ଇନିଂସ୍ ଆରମ୍ଭ କରି ହାସନ ଇସାଖିଲ୍, ସୌମ୍ୟ ସରକାରଙ୍କ ସହିତ ମିଶି ୯.୨ ଓଭରରେ ପ୍ରାରମ୍ଭିକ ୱିକେଟ୍ ପାଇଁ ୧୦୧ ରନ୍ ଯୋଡ଼ିଥିଲେ । ସୌମ୍ୟ ସରକାର ୪୮ ରନ୍ କରି ଆଉଟ୍ ହୋଇଥିଲେ । ପରେ ଆଉ ଦୁଇ ଜଣ ବ୍ୟାଟ୍ସମ୍ୟାନ୍ ଶାହଦତ୍ ହୋସେନ୍ ଏବଂ ହବିବୁର୍ ମଧ୍ୟ ପ୍ୟାଭିଲିୟନ୍‌ ଫେରିଥିଲେ । ଆଉ ଏହାପରେ ଗୋଟିଏ ପଟେ ବ୍ୟାଟିଂ କରୁଥିବା ହାସନ୍‌ ଇସାଖିଲଙ୍କୁ ସାଥ୍‌ ଦେବାକୁ ଆସିଥିଲେ ତାଙ୍କ ପିତା ମହମ୍ମଦ ନବି ।

ପିତା-ପୁତ୍ର ଯୋଡ଼ି ପ୍ରଥମ ଥର ପାଇଁ ଏକାଠି ବ୍ୟାଟିଂ କରିଥିଲେ

ଯେତେବେଳେ ଏକ ବଡ଼ ଟୁର୍ଣ୍ଣାମେଣ୍ଟରେ ପିତା-ପୁତ୍ର ଯୋଡ଼ି ଏକାଠି ବ୍ୟାଟିଂ କରିଥିଲେ ସେହି ମୁହୂର୍ତ୍ତ ଐତିହାସିକ ଥିଲା । ମହମ୍ମଦ ନବି ଏବଂ ତାଙ୍କ ପୁଅ ହାସନ୍ ୫୩ ରନ୍‌ର ଅର୍ଦ୍ଧଶତକୀୟ ପାର୍ଟନରସିପ୍‌ କରିଥିଲେ । ଯାହା ଟି-୨୦ କ୍ରିକେଟ୍‌ରେ ନୋଆଖାଲି ଏକ୍ସପ୍ରେସ୍‌ ପାଇଁ ସର୍ବାଧିକ ଚତୁର୍ଥ ୱିକେଟ୍‌ ପାର୍ଟନରସିପ୍‌ । ତେବେ ନବି ୧୭ ରନ୍ କରି ଆଉଟ୍ ହେବା ପରେ ପିତା-ପୁତ୍ରଙ୍କ ପାର୍ଟନରସିପ୍‌ ଭାଙ୍ଗି ଯାଇଥିଲା ।

ମହମ୍ମଦ ନବିଙ୍କ ପୁଅ ହାସନ ଇସାଖିଲ ୯୨ ରନ କରିଥିଲେ ଏବଂ ନୋଆଖାଲି ଏକ୍ସପ୍ରେସ ପ୍ରଥମେ ବ୍ୟାଟିଂ କରି ୭ ୱିକେଟରେ ୧୮୪ ରନର ଟାର୍ଗେଟ ଦେଇଥିଲା । ୧୮୫ ରନର ଟାର୍ଗେଟକୁ ପିଛା କରି ଢାକା କ୍ୟାପିଟାଲ୍ସ ୨୦ ଓଭର ପୂରଣ କରିପାରି ନ ଥିଲା । ୧୮.୨ ଓଭରରେ ୧୪୩ ରନରେ ଅଲଆଉଟ ହୋଇଯାଇଥିଲା । ଯାହା ଫଳରେ ନୋଆଖାଲି ଏକ୍ସପ୍ରେସ ଏହି ମ୍ୟାଚ୍‌କୁ ୪୨ ରନ୍‌ରେ ନିଜ ନାମରେ କରିଥିଲା ।