ପୂର୍ବତନ ଭାରତୀୟ ବ୍ୟାଟ୍ସମ୍ୟାନ୍ ଶିଖର ଧାୱନ ୪୦ ବର୍ଷ ବୟସରେ ଦ୍ୱିତୀୟ ବିବାହ କରିଛନ୍ତି । ସେ ତାଙ୍କ ଆଇରିଶ ପ୍ରେମିକା ସୋଫି ସାଇନଙ୍କ ସହିତ ବିବାହ ବନ୍ଧନରେ ବାନ୍ଧି ହୋଇଛନ୍ତି । ଆୟର୍ଲାଣ୍ଡର ବାସିନ୍ଦା ସୋଫି ଏବଂ ଧାଓ୍ବନ ଦୀର୍ଘ ଦିନ ଧରି ଡେଟିଂ କରୁଥିଲେ । ଆଉ ଶନିବାର ଉଭୟ ଧାୱନ ଏବଂ ସୋଫି ସାଇନଙ୍କ ବିବାହ ଖବର ସାମ୍ନାକୁ ଆସିଛି ।

ଉଲ୍ଲେଖନୀୟ ଯେ ଧାୱନ ପ୍ରଥମ ବିବାହ ୨୦୧୨ରେ କରିଥିଲେ । ସେତେବେଳେ ସେ ବକ୍ସର ଆୟେଶା ମୁଖାର୍ଜୀଙ୍କ ସହିତ ବିବାହ କରିଥିଲେ । ସେମାନଙ୍କ ବିବାହ ମାତ୍ର ନଅ ବର୍ଷ ଚାଲିଥିଲା । ୨୦୨୧ରେ ସେମାନଙ୍କ ବିଚ୍ଛେଦର ଖବର ସାମ୍ନାକୁ ଆସିଥିଲା । ତା'ପରେ, ଦୁଇ ବର୍ଷ ପରେ ୨୦୨୩ରେ ସେମାନଙ୍କର ଛାଡପତ୍ର ହୋଇଥିଲା ।

ଦୁଇ ବର୍ଷ ଧରି ଡେଟିଂ

ଶିଖର ଧାୱନ ଏବଂ ସୋଫି ସାଇନ ପ୍ରାୟ ଦୁଇ ବର୍ଷ ଧରି ଡେଟିଂ କରୁଥିବା ଜଣାପଡିଛି । ୨୦୨୪ରେ ସେମାନଙ୍କ ଡେଟିଂର ଖବର ପ୍ରକାଶ ପାଇଥିଲା । ତା'ପରେ ୨୦୨୫ରେ ପ୍ରାୟ ସେମାନଙ୍କ ସମ୍ପର୍କ ନିଶ୍ଚିତ ହୋଇଥିଲା । ଏବେ ୨୦୨୬ରେ ସେମାନେ ବିବାହ କରି ନୂଆ ଅଧ୍ୟାୟ ଆରମ୍ଭ କରିଛନ୍ତି ।

ଶିଖର ଧାୱନଙ୍କ ଦ୍ୱିତୀୟ ବଧୂ କିଏ ?

ଯଦି ଆପଣ ମଧ୍ୟ ଏହି ପ୍ରଶ୍ନର ଉତ୍ତର ଖୋଜୁଛନ୍ତି, ଶିଖର ଧାୱନଙ୍କ ଦ୍ୱିତୀୟ ବଧୂ ସୋଫି ସାଇନ କିଏ ? ସୋଫି ପେଶାରେ ଜଣେ ଉତ୍ପାଦ ପରାମର୍ଶଦାତା ବୋଲି ଜଣାପଡିଛି । ଗଣମାଧ୍ୟମ ରିପୋର୍ଟ ଅନୁଯାୟୀ, ସୋଫି ଲିମେରିକ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜିରୁ ସ୍ନାତକ ହାସଲ କରିଥିଲେ। ତା'ପରେ ସେ କାସଲରୟ କଲେଜରେ ମାର୍କେଟିଂ ଏବଂ ପରିଚାଳନା ପାଠପଢା କରିଥିଲେ। ସେ ୟୁଏଇର ଆବୁଧାବିରେ ନର୍ଦର୍ଣ୍ଣ ଟ୍ରଷ୍ଟ କର୍ପୋରେସନରେ ଦ୍ୱିତୀୟ ଉପାଧ୍ୟକ୍ଷ ଭାବରେ କାର୍ଯ୍ୟ କରିଥିବା ଜଣାପଡ଼ିଛି।

ସୋସିଆଲ ମିଡିଆରେ ବହୁତ ସକ୍ରିୟ

ଏହା ଉଲ୍ଲେଖନୀୟ ଯେ ସୋଫି ସାଇନ ସୋସିଆଲ ମିଡିଆରେ ମଧ୍ୟ ବହୁତ ସକ୍ରିୟ। ତାଙ୍କୁ ଇନଷ୍ଟାଗ୍ରାମରେ ୩୭୦,୦୦୦ରୁ ଅଧିକ ଲୋକ ଫଲୋ କରନ୍ତି । ସେ ତାଙ୍କ ପ୍ରଶଂସକମାନଙ୍କ ପାଇଁ ପ୍ରାୟତଃ ଫଟୋ ଏବଂ ଭିଡିଓ ସେୟାର କରନ୍ତି ।
ଏଥିସହ ପଢ଼ନ୍ତୁ: ୪୦ ବର୍ଷରେ ଦ୍ବିତୀୟ ବିବାହ କରୁଛନ୍ତି ଗବର...ଗର୍ଲଫ୍ରେଣ୍ଡ ହାତରେ ଲାଗିଲା ମେହେନ୍ଦୀ