Ronaldo Suspension / କ୍ରିଷ୍ଟିଆନୋ ରୋନାଲ୍ଡୋ ସସ୍‌ପେଣ୍ଡ ! ପର୍ତ୍ତୁଗାଲ୍ ପାଇଁ ୩୦ ଦିନ ଖେଳିପାରିବେନି, ଜାଣନ୍ତୁ କାରଣ

ଫୁଟବଲ ଜଗତର ମହାନ ଖେଳାଳି କ୍ରିଷ୍ଟିଆନୋ ରୋନାଲ୍ଡୋଙ୍କ ପାଇଁ ବଢ଼ିଲା ଅଡ଼ୁଆ । ପର୍ତ୍ତୁଗାଲ୍ ଫୁଟବଲ୍ ଆସୋସିଏସନ୍ ରୋନାଲ୍ଡୋଙ୍କ ଉପରେ ୩୦ ଦିନର ନିଲମ୍ବନ ସହ ୨୮୫ ଡଲାର ଜରିମାନା ଲଗାଇଛି । ଦଳରେ ନିଜ ଭୂମିକାକୁ ନେଇ କୋଚ୍ ଜର୍ଜ ଜିସସ୍‌ଙ୍କ ସହ ବିବାଦ ହେବା ପରେ ଏହି କାର୍ଯ୍ୟାନୁଷ୍ଠାନ ହୋଇଥିବା ଜଣାପଡ଼ିଛି ।

ପର୍ତ୍ତୁଗାଲ୍ ଫୁଟବଲ୍ ଆସୋସିଏସନ୍‌ର ଅନୁଶାସନ କମିଟି ୪୧ ବର୍ଷୀୟ ରୋନାଲ୍ଡୋଙ୍କ ବିରୋଧରେ ଆସିଥିବା ଅଭିଯୋଗକୁ ସମର୍ଥନ କରିଛି । ଏହାପରେ ତାଙ୍କୁ ୩୦ ଦିନ ପାଇଁ ନିଲମ୍ବିତ କରିବା ସହ ଜରିମାନା ଲଗାଯାଇଛି । ତେବେ ଏହି ବିବାଦ ପଛରେ ରୋନାଲ୍ଡୋଙ୍କ ପକ୍ଷର ମଧ୍ୟ ଏକ କାହାଣୀ ରହିଛି । ସେ କୋଚ୍ ଜର୍ଜ ଜିସସ୍‌ଙ୍କ ଉପରେ ଦୁଇଥର ପ୍ରତିଶ୍ରୁତି ଭାଙ୍ଗିଥିବା ଅଭିଯୋଗ କରିଛନ୍ତି ।

କୋଚ୍‌ଙ୍କ ସହ କାହିଁକି ହେଲା ବିବାଦ ?

ନେସନ୍ସ ଲିଗ୍‌ରେ ଡେନମାର୍କ ବିପକ୍ଷ ମ୍ୟାଚ୍ ପୂର୍ବରୁ ରୋନାଲ୍ଡୋ ପର୍ତ୍ତୁଗାଲ୍ ଦଳର କ୍ୟାମ୍ପ ଛାଡ଼ି ଚାଲିଯାଇଥିଲେ । ନରୱେ ବିପକ୍ଷ ମ୍ୟାଚ୍‌ରେ ତାଙ୍କୁ ବଦଳ ଖେଳାଳି ଭାବେ ମଧ୍ୟ ପଡ଼ିଆକୁ ଓହ୍ଲାଇବାର ସୁଯୋଗ ଦିଆଯାଇନଥିଲା ବୋଲି ସେ ଅଭିଯୋଗ କରିଥିଲେ ।

ରୋନାଲ୍ଡୋଙ୍କ କହିବା ଅନୁସାରେ, ଦଳରେ ତାଙ୍କ ଭୂମିକାକୁ ନେଇ କୋଚ୍ ଦୁଇଥର ନିଜ ପ୍ରତିଶ୍ରୁତିରୁ ଓହରି ଯାଇଥିଲେ । ଏହି ଘଟଣା ପରେ ଖେଳାଳି ଓ କୋଚ୍‌ଙ୍କ ମଧ୍ୟରେ ବିବାଦ ଆହୁରି ତୀବ୍ର ହୋଇଥିଲା । ଅନ୍ୟପକ୍ଷରେ, କୋଚ୍ ଜର୍ଜ ଜିସସ୍ ରୋନାଲ୍ଡୋଙ୍କ ସମସ୍ତ ଅଭିଯୋଗକୁ ଖଣ୍ଡନ କରିଥିଲେ । ତଥାପି ଦଳକୁ ରୋନାଲ୍ଡୋଙ୍କ ଫେରିବା ପାଇଁ ଦ୍ୱାର ଖୋଲା ରହିଛି ବୋଲି ସେ କହିଥିଲେ ।

କେଉଁ ନିୟମ ଭାଙ୍ଗିଥିଲେ ରୋନାଲ୍ଡୋ ?

ରିପୋର୍ଟ ଅନୁଯାୟୀ, ରୋନାଲ୍ଡୋ ଅନୁଶାସନ ନିୟମର ଧାରା ୧୬୦(୧) ଉଲ୍ଲଂଘନ କରିଥିଲେ । ଏହି କାରଣରୁ ତାଙ୍କ ବିରୋଧରେ ୩୦ ଦିନର ନିଲମ୍ବନ ଓ ଜରିମାନା ଘୋଷଣା କରାଯାଇଛି । ତେବେ କେଉଁ ମ୍ୟାଚ୍‌ଗୁଡ଼ିକରେ ଏହି ନିଲମ୍ବନ ଲାଗୁ ହେବ ଏବଂ ଏହାର ଅବଧି ପୂର୍ବରୁ ଶେଷ ହୋଇସାରିଛି କି ନାହିଁ, ସେ ସମ୍ପର୍କରେ ଫୁଟବଲ୍ ଫେଡେରେସନ୍ ପକ୍ଷରୁ ସ୍ପଷ୍ଟ ସୂଚନା ଦିଆଯାଇନାହିଁ ।

ନିଷ୍ପତ୍ତି ବିରୋଧରେ ଅପିଲ୍ କରିପାରିବେ ରୋନାଲ୍ଡୋ

ରୋନାଲ୍ଡୋ ଚାହିଁଲେ ଏହି ନିଲମ୍ବନ ବିରୋଧରେ ଅପିଲ୍ କରିପାରିବେ । କିନ୍ତୁ ସେ ଏହି ଘଟଣା ପାଇଁ ପୂର୍ବରୁ କ୍ଷମା ମାଗିସାରିଛନ୍ତି । ତାଙ୍କୁ ଦଣ୍ଡ ମିଳିବ ବୋଲି ଆଗରୁ ଆଶା କରିଥିବା ମଧ୍ୟ ସେ କହିଥିଲେ । ତେବେ ୩୦ ଦିନର ନିଲମ୍ବନ ଓ ଜରିମାନା ନେଇ ସେ କୌଣସି ବ୍ୟକ୍ତିଗତ ପ୍ରତିକ୍ରିୟା ଦେଇନାହାନ୍ତି ।