ଗତ ସପ୍ତାହରେ ବିରାଟ କୋହଲି ICC ବ୍ୟାଟ୍ସମ୍ୟାନ୍‌ ରାଙ୍କିଂରେ ଏକ ନମ୍ବର ବ୍ୟାଟ୍ସମ୍ୟାନ୍‌ ହୋଇଥିଲେ । କିନ୍ତୁ ବୁଧବାର ସେ ସ୍ଥାନ ହରାଇଛନ୍ତି । ବୁଧବାର ଆଇସିସି ସଦ୍ୟତମ ODI ରାଙ୍କିଂ ପ୍ରକାଶ କରିଛି । ନ୍ୟୁଜିଲାଣ୍ଡର ଷ୍ଟାର ବ୍ୟାଟ୍ସମ୍ୟାନ ଡାରିଲ ମିଚେଲ ଦିନିକିଆରେ ନୂଆ ନମ୍ବର ଓ୍ବାନ୍‌ ବ୍ୟାଟ୍ସମ୍ୟାନ୍‌ ହୋଇଛନ୍ତି । ସେହିପରି ରୋହିତ ଶର୍ମା ମଧ୍ୟ ଗୋଟିଏ ସ୍ଥାନ ତଳକୁ ଯାଇଛନ୍ତି । KL ରାହୁଲ ଗୋଟିଏ ସ୍ଥାନ ବୃଦ୍ଧି ପାଇ ତାଲିକାର ଶୀର୍ଷ ୧୦ରେ ପ୍ରବେଶ କରିଛନ୍ତି ।

ବିରାଟ କୋହଲି ନ୍ୟୁଜିଲାଣ୍ଡ ବିପକ୍ଷ ପ୍ରଥମ ODIରେ ୯୩ ରନର ଏକ ଚମତ୍କାର ଇନିଂସ ଖେଳିଥିଲେ । ଯେଉଁଥି ପାଇଁ ତାଙ୍କୁ ପ୍ଲେୟାର ଅଫ୍ ଦି ମ୍ୟାଚ୍ ପୁରସ୍କାର ମିଳିଥିଲା । ଏହି ଇନିଂସ ପରେ ବିରାଟ କୋହଲି ICC ରାଙ୍କିଂରେ ନମ୍ବର-୧ ୱାନଡେ ବ୍ୟାଟ୍ସମ୍ୟାନ ହୋଇଥିଲେ । ସେ ମାତ୍ର ଗୋଟିଏ ସପ୍ତାହ ମଧ୍ୟରେ ଏହି ସ୍ଥାନ ହରାଇଥିଲେ, କିନ୍ତୁ ଗତ ରବିବାର ସେ ଆଉ ଏକ ଚମତ୍କାର ଇନିଂସ ଖେଳିଥିଲେ । ସେ ତୃତୀୟ ODIରେ ୧୨୪ ରନ କରିଥିଲେ, ଯଦିଓ ଟିମ୍ ଇଣ୍ଡିଆ ମ୍ୟାଚ୍ ହାରିଯାଇଥିଲା। ଡାରିଲ ମିଚେଲ ମଧ୍ୟ ଏହି ମ୍ୟାଚରେ ଏକ ଶତକ ହାସଲ କରିଥିଲେ ।

ନମ୍ବର ୧ ଭାବରେ ବିରାଟ କୋହଲିଙ୍କ ସ୍ଥାନ ନେଇଛନ୍ତି ଡାରିଲ ମିଚେଲ

ଇନ୍ଦୋରରେ ଭାରତ ବିପକ୍ଷ ତୃତୀୟ ODIରେ ଡାରିଲ ମିଚେଲ ୧୩୭ ରନର ଏକ ଚମତ୍କାର ଇନିଂସ ଖେଳିଥିଲେ । ସେ ଏହି ଇନିଂସରେ ୧୩୧ ବଲରୁ ୩ ଛକା ଏବଂ ୧୫ ଚୌକା ମାରିଥିଲେ । ଏହି ଇନିଂସ ଗୁରୁତ୍ୱପୂର୍ଣ୍ଣ ଥିଲା କାରଣ ସେ ମାତ୍ର ୫ ରନରେ ଦୁଇଟି ୱିକେଟ ପଡ଼ିବା ପରେ ଆସିଥିଲେ । ଯଦିଓ ଏହି ମ୍ୟାଚ୍‌ରେ କୋହଲି ମଧ୍ୟ ଶତକ ହାସଲ କରିଥିଲେ, କିନ୍ତୁ ସେ ଦଳକୁ ବିଜୟ ଆଡ଼କୁ ନେଇପାରି ନଥିଲେ । ମିଚେଲ ୮୪୫ ରେଟିଂ ସହିତ ଶୀର୍ଷରେ ପହଞ୍ଚିଛନ୍ତି । ଯାହା ତାଙ୍କ କ୍ୟାରିୟରର ସର୍ବୋତ୍ତମ ରେଟିଂ । ସେହିପରି ୭୯୫ ରେଟିଂ ସହିତ ବିରାଟ କୋହଲି ଦ୍ୱିତୀୟ ସ୍ଥାନକୁ ଖସିଛନ୍ତି ।

ରେଟିଂରେ ପାର୍ଥକ୍ୟ ଏବେ ଗୁରୁତ୍ୱପୂର୍ଣ୍ଣ କାରଣ ମିଚେଲ ମଧ୍ୟ ଗତ ସପ୍ତାହରେ ଖେଳାଯାଇଥିବା ଦ୍ୱିତୀୟ ଏକଦିବସୀୟରେ ୧୩୧ ରନର ଇନିଂସ ଖେଳିଥିଲେ, ଯେଉଁଥିରେ ବିରାଟ କୋହଲି ଭଲ ପ୍ରଦର୍ଶନ କରିପାରିନଥିଲେ ।

ଆଫଗାନିସ୍ତାନର ଇବ୍ରାହିମ୍ ଜାଦ୍ରାନ୍ ଚତୁର୍ଥ ସ୍ଥାନରୁ ତୃତୀୟ ସ୍ଥାନକୁ ଆସିଛନ୍ତି । ଯାହାଙ୍କ ରେଟିଂ ୭୬୪ ରହିଛି । ସେହିପରି ରୋହିତ ଶର୍ମା ୭୫୭ ରେଟିଂ ସହିତ ତୃତୀୟ ସ୍ଥାନରୁ ଚତୁର୍ଥ ସ୍ଥାନକୁ ଖସି ଯାଇଛନ୍ତି । ICC ODI ବ୍ୟାଟିଂ ରାଙ୍କିଂରେ ପୂର୍ବରୁ ୧୦ତମ ସ୍ଥାନରେ ଥିବା ଶ୍ରେୟସ ଆୟର ଏବେ ୧୧ତମ ସ୍ଥାନକୁ ଖସି ଯାଇଛନ୍ତି । କେଏଲ ରାହୁଲ ୧୧ତମ ସ୍ଥାନରୁ ଶୀର୍ଷ ୧୦କୁ ଉଠିଛନ୍ତି । ରାହୁଲ ୬୭୦ ରେଟିଂ ସହିତ ୧୦ତମ ସ୍ଥାନକୁ ଉଠିଛନ୍ତି ।