Dravid Backs Vaibhav / ରେଡ୍ ବଲ୍ କ୍ରିକେଟ୍‌ରେ ବି ଧମାଲ୍ କରିବେ ବୈଭବ! ଦ୍ରାବିଡଙ୍କ ବଡ଼ ଭବିଷ୍ୟବାଣୀ

ମାତ୍ର ୧୫ ବର୍ଷ ବୟସରେ କ୍ରିକେଟ୍ ଦୁନିଆରେ ଧମାକା କରୁଥିବା ବୈଭବ ସୂର୍ଯ୍ୟବଂଶୀଙ୍କୁ ନେଇ ଏବେ ଆଉ ଏକ ବଡ଼ ଭବିଷ୍ୟବାଣୀ କରିଛନ୍ତି ଟିମ୍ ଇଣ୍ଡିଆର ମହାନ କ୍ରିକେଟର୍ ରାହୁଲ ଦ୍ରାବିଡ୍ । ଆଇପିଏଲ୍‌ରେ ବୈଭବଙ୍କ ସହ କାମ କରିଥିବା ଦ୍ରାବିଡ ବିଶ୍ୱାସ କରନ୍ତି ଯେ ଏହି ଯୁବ ବ୍ୟାଟ୍ସମ୍ୟାନ୍‌ ଆଗକୁ କେବଳ ହ୍ୱାଇଟ୍ ବଲ୍ ନୁହେଁ, ରେଡ୍ ବଲ୍ କ୍ରିକେଟ୍‌ରେ ମଧ୍ୟ ନିଜର ଦବଦବା ଦେଖାଇପାରିବେ ଏବଂ ଭାରତ ପାଇଁ ତିନୋଟି ଫର୍ମାଟ୍‌ରେ ଖେଳିପାରିବେ ।

ମାତ୍ର ୧୫ ବର୍ଷ ବୟସରେ କ୍ରିକେଟ୍ ଦୁନିଆରେ ଚର୍ଚ୍ଚାରେ ଥିବା ବୈଭବ ସୂର୍ଯ୍ୟବଂଶୀ ଏବେ ରେଡ୍ ବଲ୍ କ୍ରିକେଟ୍‌ରେ ନିଜକୁ ପ୍ରମାଣ କରିବାର ସୁଯୋଗ ପାଇବେ । ବୈଭବ ଦଲୀପ୍ ଟ୍ରଫିରେ ଇଷ୍ଟ ଜୋନ୍ ପାଇଁ ଖେଳିବେ । ଇଷ୍ଟ ଜୋନ୍‌ର ନେତୃତ୍ୱ ନେବେ ଇଶାନ କିଶନ । ଟୁର୍ଣ୍ଣାମେଣ୍ଟରେ ବୈଭବଙ୍କୁ ଅତିକମ୍‌ରେ ଦୁଇଟି ଲଗାତାର ମ୍ୟାଚ୍ ଖେଳିବାର ସୁଯୋଗ ମିଳିପାରେ । ଯଦି ଇଷ୍ଟ ଜୋନ୍ ଫାଇନାଲ୍‌ରେ ପହଞ୍ଚେ, ତେବେ ସେ ମୋଟ ୩ଟି ଫର୍ଷ୍ଟ କ୍ଲାସ୍ ମ୍ୟାଚ୍ ଖେଳିପାରିବେ ।

ଏହାରି ଭିତରେ ବୈଭବଙ୍କୁ ନେଇ ବଡ଼ କଥା କହିଛନ୍ତି ପୂର୍ବତନ ଭାରତୀୟ ଅଧିନାୟକ ରାହୁଲ ଦ୍ରାବିଡ୍ । ଆଇପିଏଲ୍‌ରେ ବୈଭବଙ୍କ ସହ କାମ କରିଥିବା ଦ୍ରାବିଡଙ୍କ ବିଶ୍ୱାସ, ଏହି ଯୁବ ବ୍ୟାଟ୍ସମ୍ୟାନ୍‌ ଭବିଷ୍ୟତରେ ରେଡ୍ ବଲ୍ କ୍ରିକେଟ୍‌ରେ ମଧ୍ୟ ଟପ୍ ଲେଭଲ୍‌ରେ ନିଜ ସ୍ଥାନ ତିଆରି କରିପାରିବେ । ଏପରିକି ସେ ଭାରତ ପାଇଁ ତିନୋଟି ଯାକ ଫର୍ମାଟ୍‌ରେ ଖେଳୁଥିବା ଜଣେ ଖେଳାଳି ହୋଇପାରନ୍ତି ବୋଲି ଦ୍ରାବିଡ୍ ଆଶା ପ୍ରକାଶ କରିଛନ୍ତି ।

ବୈଭବ ଯେତେବେଳେ ଆଇପିଏଲ୍‌ରେ ଡେବ୍ୟୁ କରିଥିଲେ, ସେତେବେଳେ ରାଜସ୍ଥାନ ରୟାଲ୍ସର ହେଡ୍ କୋଚ୍ ଥିଲେ ରାହୁଲ ଦ୍ରାବିଡ୍ । ତେଣୁ ବୈଭବଙ୍କ ଖେଳକୁ ସେ ନିକଟରୁ ଦେଖିଛନ୍ତି ।

ଦ୍ରାବିଡଙ୍କ ମତରେ ବୈଭବଙ୍କ ପାଇଁ ହ୍ୱାଇଟ୍ ବଲ୍ କ୍ରିକେଟ୍‌ର ସୁଯୋଗ ଏବଂ ରେଡ୍ ବଲ୍ କ୍ରିକେଟ୍ ମଧ୍ୟରେ ଏକ ସଠିକ୍ ସନ୍ତୁଳନ ରଖିବା ଦରକାର । ସେ କହିଛନ୍ତି ଯେ IPL ଜରିଆରେ ବୈଭବ ଭାରତରେ ହ୍ୱାଇଟ୍ ବଲ୍ କ୍ରିକେଟ୍‌ର ଅନୁଭବ ପାଉଛନ୍ତି । ସେହି ସମୟରେ ଘରୋଇ କ୍ରିକେଟ୍‌ରେ ରେଡ୍ ବଲ୍ ମ୍ୟାଚ୍ ଖେଳି ଏହି ଫର୍ମାଟ୍‌ରେ ନିଜ କ୍ୟାରିୟର୍ ଗଢ଼ିବାର ସମୟ ମଧ୍ୟ ତାଙ୍କୁ ମିଳୁଛି ।

ତେବେ ଦ୍ରାବିଡ୍ ସବୁଠାରୁ ଅଧିକ ଗୁରୁତ୍ୱ ଦେଇଛନ୍ତି ‘ଧୈର୍ଯ୍ୟ’କୁ। ତାଙ୍କ କହିବା ଅନୁସାରେ, ବୈଭବ ଏବେ ମାତ୍ର ୧୫ ବର୍ଷର। ସେ ହ୍ୱାଇଟ୍ ବଲ୍ ତୁଳନାରେ ରେଡ୍ ବଲ୍ କ୍ରିକେଟ୍ ବହୁତ ଅଧିକ ଖେଳିନାହାନ୍ତି। ଆରମ୍ଭରୁ ତାଙ୍କୁ ଅନେକ ସଫଳତା ମିଳିଛି, କିନ୍ତୁ ଆଗାମୀ ଦିନରେ କଷ୍ଟକର ସମୟ ମଧ୍ୟ ଆସିବ । ସେହି ସମୟରେ ତାଙ୍କ ପ୍ରତି ଲୋକଙ୍କୁ ଧୈର୍ଯ୍ୟ ରଖିବାକୁ ପଡ଼ିବ ।

ଦ୍ରାବିଡ୍ ଆହୁରି କହିଛନ୍ତି ଯେ ବୈଭବଙ୍କୁ କିଛି ସଫଳତା ମିଳିବ, କିନ୍ତୁ ଏମିତି ସମୟ ମଧ୍ୟ ଆସିବ ଯେତେବେଳେ ଜିନିଷ ତାଙ୍କ ସପକ୍ଷରେ ରହିବ ନାହିଁ । ହେଲେ ଏହା ମନେ ରଖିବା ଦରକାର ଯେ ସେ ମାତ୍ର ୧୫ ବର୍ଷର ଏବଂ ତାଙ୍କ ଆଗରେ ଏକ ଦୀର୍ଘ କ୍ରିକେଟ୍ ଯାତ୍ରା ପଡ଼ିଛି ।

ବୈଭବଙ୍କ ଫର୍ଷ୍ଟ କ୍ଲାସ୍ ରେକର୍ଡ ଦେଖିଲେ, ସେ ଏପର୍ଯ୍ୟନ୍ତ ୮ଟି ମ୍ୟାଚ୍ ଖେଳି ୧୨ଟି ଇନିଂସ୍‌ରେ ୨୦୭ ରନ୍ କରିଛନ୍ତି । ଏବେ ଦଲୀପ୍ ଟ୍ରଫି ହେବ ବୈଭବଙ୍କ ପାଇଁ ରେଡ୍ ବଲ୍ କ୍ରିକେଟ୍‌ରେ ନିଜକୁ ଆହୁରି ଭଲ ଭାବରେ ପ୍ରମାଣ କରିବାର ଏକ ବଡ଼ ମଞ୍ଚ। ରାହୁଲ ଦ୍ରାବିଡଙ୍କ ଭଳି ଅଭିଜ୍ଞ କ୍ରିକେଟରଙ୍କ ବିଶ୍ୱାସ ଯଦି ସତ ହୁଏ, ତେବେ ଆଗାମୀ ଦିନରେ ବୈଭବ ସୂର୍ଯ୍ୟବଂଶୀ ଭାରତୀୟ କ୍ରିକେଟ୍‌ରେ ତିନୋଟି ଫର୍ମାଟ୍‌ର ଜଣେ ବଡ଼ ତାରକା ଭାବେ ଉଭା ହୋଇପାରନ୍ତି ।