Duleep Trophy Semifinal / ଅଢ଼େଇ ଦିନରେ ମ୍ୟାଚ୍ ଜିତିଲା ବୈଭବଙ୍କ ଟିମ୍, ବ୍ୟାଟ୍ ପରେ ବୋଲିଂରେ କଲେ କମାଲ

ଦୁଲୀପ ଟ୍ରଫିର ଇଷ୍ଟ ଜୋନର ଦବଦବା । ଗୋଟିଏ ପଟେ ରନ୍‌ର ପାହାଡ଼, ଅନ୍ୟପଟେ ଓ୍ବିକେଟ୍‌ର ଝଡ଼ । ପ୍ରଥମ କ୍ବାଟରଫାଇନାଲରେ ନର୍ଥ ଇଷ୍ଟ ଜୋନ୍‌କୁ ଏକ ଇନିଂସ ଓ ୨୧୦ ରନ୍‌ରେ ପରାସ୍ତ କରି ସେମିଫାଇନାଲ ଟିକେଟ୍‌ ହାସଲ କରିଛି ଇଷ୍ଟ ଜୋନ୍‌ ।

ବେଙ୍ଗାଲୁରୁସ୍ଥିତ ବିସିସିଆଇ ସେଣ୍ଟର ଅଫ୍ ଏକ୍ସିଲେନ୍ସରେ ଖେଳାଯାଇଥିବା ମ୍ୟାଚ୍‌ରେ ନର୍ଥ ଇଷ୍ଟ ଜୋନ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା । ସୁଦୀପ କୁମାର ଘରାମୀ ଓ ଶାହବାଜ ଅହମଦଙ୍କ ଶତକୀୟ ଇନିଂସ ବଳରେ ଇଷ୍ଟ ଜୋନ୍‌ ପ୍ରଥମ ଇନିଂସରେ ବିଶାଳ ୪୬୭ ରନ୍ ସଂଗ୍ରହ କରିଥିଲା । ସୁଦୀପ ୧୪୬ ରନ୍ କରିଥିବା ବେଳେ ଶାହବାଜ ଅହମଦ ଧମାକାଦାର ୧୬୭ ରନ୍‌ର ପାଳି ଖେଳିଥିଲେ ।

୪୬୭ ରନ୍‌ର ବିଶାଳ ସ୍କୋରର ଜବାବରେ ନର୍ଥ ଇଷ୍ଟ ଜୋନର ବ୍ୟାଟିଂ ସମ୍ପୂର୍ଣ୍ଣ ଭାବେ ବିଫଳ ହୋଇଥିଲା । ପ୍ରଥମ ଇନିଂସରେ ଦଳ ମାତ୍ର ୧୧୧ ରନ୍‌ରେ ଅଲଆଉଟ୍ ହୋଇଯାଇଥିଲା । ଅଭିଜିତ ସରକାର ୫ଟି ୱିକେଟ୍ ନେଇଥିବା ବେଳେ ଶାହବାଜ ଅହମଦ ୩ଟି ୱିକେଟ୍ ହାସଲ କରିଥିଲେ । ଦଳର ୬ ଜଣ ବ୍ୟାଟ୍ସମ୍ୟାନ୍‌ ଦୁଇ ଅଙ୍କ ମଧ୍ୟ ଛୁଇଁ ପାରିନଥିଲେ । ଅର୍ପିତ ଭଟେୱାରା ୩୨ ରନ୍ କରି ଦଳର ସର୍ବାଧିକ ସ୍କୋରର ହୋଇଥିଲେ ।

ପ୍ରଥମ ଇନିଂସରେ ମାତ୍ର ୧୧୧ ରନ୍‌ରେ ଅଲଆଉଟ୍ ହେବାରୁ ନର୍ଥ ଇଷ୍ଟ ଜୋନ ଫଲୋଅନ୍‌ ବଞ୍ଚାଇ ପାରିନଥିଲା । ଫଳରେ ତାଙ୍କୁ ପୁଣିଥରେ ବ୍ୟାଟିଂ କରିବାକୁ ପଡ଼ିଥିଲା । କିନ୍ତୁ ଦ୍ୱିତୀୟ ଇନିଂସରେ ମଧ୍ୟ ଦଳର ବ୍ୟାଟ୍ସମ୍ୟାନ୍‌ ନିରାଶ କରିଥିଲେ । ସମଗ୍ର ଦଳ ୧୪୬ ରନ୍‌ରେ ଅଲଆଉଟ୍ ହୋଇଯାଇଥିଲା ।

ଦ୍ୱିତୀୟ ଇନିଂସରେ ଅନୁକୁଲ ରୟ ୫ଟି ୱିକେଟ୍ ନେଇ ନର୍ଥ ଇଷ୍ଟ ଜୋନର ବ୍ୟାଟିଂ ଲାଇନ୍‌ଅପ୍‌କୁ ଧ୍ୱଂସ କରିଦେଇଥିଲେ । ଏହି ଇନିଂସରେ ବୈଭବ ସୂର୍ଯ୍ୟବଂଶୀ ମଧ୍ୟ ବୋଲିଂରେ ନିଜର ଜଲୱା ଦେଖାଇଥିଲେ । ସେ ମାତ୍ର ୩ ଓଭର ବୋଲିଂ କରି ୧୧ ରନ୍ ବ୍ୟୟରେ ୨ଟି ୱିକେଟ୍ ନେଇଥିଲେ । ଅର୍ଥାତ୍ ବ୍ୟାଟିଂରେ ବିଫଳ ହେଲେ ମଧ୍ୟ ବୋଲିଂରେ ସେ ନିଜ ଅବଦାନ ରଖିଥିଲେ ।

ମ୍ୟାଚ୍‌ରେ ଅଲରାଉଣ୍ଡ ପ୍ରଦର୍ଶନ ପାଇଁ ଶାହବାଜ ଅହମଦଙ୍କୁ ପ୍ଲେୟର ଅଫ୍ ଦି ମ୍ୟାଚ୍ ବା POTM ପୁରସ୍କାର ମିଳିଥିଲା । ପ୍ରଥମ ଇନିଂସରେ ୧୬୭ ରନ୍‌ର ଚମତ୍କାର ପାଳି ଖେଳିବା ସହ ସେ ପ୍ରଥମ ଇନିଂସରେ ୩ଟି ଏବଂ ଦ୍ୱିତୀୟ ଇନିଂସରେ ଗୋଟିଏ ୱିକେଟ୍ ନେଇଥିଲେ ।

ଏହି ବିଜୟ ସହ ଇଷ୍ଟ ଜୋନ୍‌ ଏବେ ଦଲୀପ ଟ୍ରଫିର ସେମିଫାଇନାଲରେ ପହଞ୍ଚିଛି। ଆସନ୍ତା ୩୦ ଅଗଷ୍ଟରୁ ଆରମ୍ଭ ହେବାକୁ ଥିବା ସେମିଫାଇନାଲରେ ଇଷ୍ଟ ଜୋନର ସାମ୍ନା ସେଣ୍ଟ୍ରାଲ ଜୋନ୍‌ ସହ ହେବ । ଏହି ମ୍ୟାଚ୍‌ରେ ସମସ୍ତଙ୍କ ନଜର ରହିବ ଯୁବ ବୈଭବ ସୂର୍ଯ୍ୟବଂଶୀଙ୍କ ଉପରେ । କ୍ୱାର୍ଟର ଫାଇନାଲରେ ବ୍ୟାଟିଂରେ ବିଫଳ ହୋଇଥିବା ବୈଭବ ସେମିଫାଇନାଲରେ ଏକ ବଡ଼ ଇନିଂସ ଖେଳିବେ ବୋଲି କ୍ରିକେଟ୍‌ ପ୍ରେମୀ ଆଶା କରିଛନ୍ତି ।