Fatima Sana Crying / ସେମିଫାଇନାଲରେ ହାରିଲା ଦଳ, ପଡ଼ିଆ ମଝିରେ ଭୋ ଭୋ ହୋଇ କାନ୍ଦିଲେ ପାକିସ୍ତାନ କ୍ୟାପ୍‌ଟେନ୍‌

ଦଳ ସେମିଫାଇନାଲରେ ହାରିଲା । ଆଉ ପଡ଼ିଆ ମଝିରେ ଭୋ ଭୋ ହୋଇ କାନ୍ଦିଲେ ପାକିସ୍ତାନ ମହିଳା ଦଳର ଅଧିନାୟକ । ପାକିସ୍ତାନ ମହିଳା ଦଳର ଅଧିନାୟକ ଫାତିମା ସନାଙ୍କ ପାଇଁ ମହିଳା ଏସିଆ କପ୍ ୨୦୨୬ର ସେମିଫାଇନାଲ ମ୍ୟାଚ୍ ବେଶ୍ ଯନ୍ତ୍ରଣାଦାୟକ ଥିଲା । ଦଳକୁ ଫାଇନାଲରେ ପହଞ୍ଚାଇବା ପାଇଁ ସେ ବ୍ୟାଟ୍ ଓ ବଲ୍ ଉଭୟରେ ନିଜର ସବୁକିଛି ଲଗାଇ ଦେଇଥିଲେ । କିନ୍ତୁ ତାଙ୍କର ଲଢ଼ୁଆ ପ୍ରୟାସ ଶେଷରେ ଅଧୁରା ରହିଗଲା ।

ସେପ୍ଟେମ୍ବର ୧୧ ତାରିଖରେ ଦୁବାଇ ଇଣ୍ଟରନ୍ୟାସନାଲ୍ କ୍ରିକେଟ୍ ଷ୍ଟାଡିୟମରେ ପାକିସ୍ତାନ-ଶ୍ରୀଲଙ୍କା ମଧ୍ୟରେ ସେମିଫାଇନାଲ ମ୍ୟାଚ୍‌ ଖେଳାଯାଇଥିଲା । ଏହି ମ୍ୟାଚ୍‌ରେ ଶ୍ରୀଲଙ୍କା ୪ ଓ୍ବିକେଟରେ ପାକିସ୍ତାନକୁ ପରାସ୍ତ କରି ଫାଇନାଲରେ ନିଜ ସ୍ଥାନ ପକ୍କା କରିଛି । ମ୍ୟାଚ୍ ଶେଷ ହେବା ପରେ ଫାତିମା ନିଜର ଭାବନାକୁ ଆଉ ନିୟନ୍ତ୍ରଣ କରିପାରିନଥିଲେ । ତାଙ୍କ ଆଖିରୁ ଲୁହ ଝରିପଡ଼ିଥିଲା ।

ଟସ୍ ହାରି ପ୍ରଥମେ ବ୍ୟାଟିଂ କରିଥିବା ପାକିସ୍ତାନ ନିର୍ଦ୍ଧାରିତ ଓଭରରେ ୬ ୱିକେଟ୍ ହରାଇ ୧୩୦ ରନ୍ କରିଥିଲା । ଦଳର ଭଲ ଆରମ୍ଭ କରିନଥିଲା । ଲଗାତାର ୱିକେଟ୍ ପଡ଼ିବାରୁ ପାକିସ୍ତାନ ଚାପରେ ଥିଲା । ଏଭଳି ସମୟରେ ଫାତିମା ସନା ଅଧିନାୟକତ୍ୱ ଇନିଂସ୍ ଖେଳିଥିଲେ ।

ଫାତିମା ୩୬ ବଲ୍‌ରୁ ଅପରାଜିତ ୪୭ ରନ୍ କରିଥିଲେ । ମ୍ୟାଚ୍ ସମୟରେ ଭୀଷଣ ଗରମ ଯୋଗୁଁ ତାଙ୍କୁ କ୍ରାମ୍ପ୍ସ ସମସ୍ୟା ମଧ୍ୟ ହୋଇଥିଲା । ତଥାପି ସେ ହାର ମାନିନଥିଲେ ଏବଂ ଶେଷ ପର୍ଯ୍ୟନ୍ତ କ୍ରିଜ୍‌ରେ ରହିଥିଲେ । ତୁବା ହସନଙ୍କ ସହ ମିଶି ଶେଷ ୪ ଓଭରରେ ଦ୍ରୁତ ରନ୍ ସଂଗ୍ରହ କରି ପାକିସ୍ତାନର ସ୍କୋରକୁ ୧୩୦ ରନ୍‌ରେ ପହଞ୍ଚାଇଥିଲେ ।

ଏହାପରେ ୧୩୧ ରନ୍‌ର ଲକ୍ଷ୍ୟକୁ ଡିଫେଣ୍ଡ କରିବାକୁ ଓହ୍ଲାଇଥିବା ପାକିସ୍ତାନକୁ ଫାତିମା ବଲ୍‌ରେ ମଧ୍ୟ ଜବରଦସ୍ତ ଆରମ୍ଭ ଦେଇଥିଲେ । ନିଜର ପ୍ରଥମ ଓଭରରେ ସେ ଲଗାତାର ଦୁଇଟି ବଲ୍‌ରେ ଶ୍ରୀଲଙ୍କା ଅଧିନାୟକ ଚମାରୀ ଅଟାପାଟ୍ଟୁ ଏବଂ ସଞ୍ଜନା କବିନ୍ଦିଙ୍କୁ ପ୍ୟାଭିଲିୟନ୍ ପଠାଇଥିଲେ । ଏକ ସମୟରେ ଶ୍ରୀଲଙ୍କା ୩୩ ରନ୍‌ରେ ୪ଟି ୱିକେଟ୍ ହରାଇଥିଲା । ମ୍ୟାଚ୍ ପାକିସ୍ତାନ ହାତକୁ ଯାଉଥିବା ଭଳି ଲାଗୁଥିଲା। କିନ୍ତୁ ହର୍ଷିତା ସମରବିକ୍ରମା ଏବଂ କବିଶା ଦିଲହାରୀ ମିଶି ୬୭ ରନ୍‌ର ଗୁରୁତ୍ୱପୂର୍ଣ୍ଣ ପାର୍ଟନରଶିପ୍ କରି ମ୍ୟାଚ୍‌ର ମୋଡ଼ ବଦଳାଇଦେଇଥିଲେ ।

ଫାତିମା ପୁଣିଥରେ ପାକିସ୍ତାନକୁ ମ୍ୟାଚ୍‌କୁ ଫେରାଇ ଆଣିଥିଲେ । ନିଜର ତୃତୀୟ ଓଭରରେ ସେ ପ୍ରଥମେ ହର୍ଷିତା ସମରବିକ୍ରମାଙ୍କୁ ଆଉଟ୍ କରିଥିଲେ । ଏହାପରେ କବିଶା ଦିଲହାରୀଙ୍କୁ ଏଲ୍‌ବିଡବ୍ଲ୍ୟୁ କରି ମ୍ୟାଚ୍‌ରେ ନିଜର ଚତୁର୍ଥ ୱିକେଟ୍ ହାସଲ କରିଥିଲେ । କିନ୍ତୁ ଏହାପରେ କୌଶାନୀ ନୁତ୍ୟାଙ୍ଗନା ଏବଂ ନୀଲାକ୍ଷିକା ସିଲ୍‌ଭା ଦାୟିତ୍ୱ ନେଇଥିଲେ । ନୁତ୍ୟାଙ୍ଗନା ଫାତିମାଙ୍କ ବଲ୍‌ରେ ନିଜ ଅନ୍ତର୍ଜାତୀୟ କ୍ୟାରିୟରର ପ୍ରଥମ ଛକା ମାରିଥିଲେ । ପରେ ନୀଲାକ୍ଷିକା ସିଲ୍‌ଭା ଚୌକା ମାରି ଶ୍ରୀଲଙ୍କାକୁ ଫାଇନାଲରେ ପହଞ୍ଚାଇଥିଲେ ।

ଏହି ମ୍ୟାଚ୍‌ରେ ଫାତିମା ସନା ୪୭ ରନ୍‌ର ଅପରାଜିତ ପାରି ସହ ୪ଟି ୱିକେଟ୍ ନେଇଥିଲେ। ତାଙ୍କ ଅଲରାଉଣ୍ଡ ପ୍ରଦର୍ଶନ ପାଇଁ ତାଙ୍କୁ ‘ପ୍ଲେୟର ଅଫ୍ ଦ ମ୍ୟାଚ୍’ ମଧ୍ୟ ଚୟନ କରାଯାଇଥିଲା। କିନ୍ତୁ ବ୍ୟକ୍ତିଗତ ସଫଳତା ମଧ୍ୟ ଦଳର ପରାଜୟର ଯନ୍ତ୍ରଣାକୁ କମାଇପାରିନଥିଲା । ମ୍ୟାଚ୍ ଶେଷରେ ଫାତିମାଙ୍କ ଆଖିରେ ଲୁହ ଦେଖିବାକୁ ମିଳିଥିଲା। ଦଳକୁ ଫାଇନାଲରେ ପହଞ୍ଚାଇବା ପାଇଁ ସେ ଶେଷ ବଲ୍ ପର୍ଯ୍ୟନ୍ତ ଲଢ଼ିଥିଲେ । କିନ୍ତୁ ଦଳକୁ ବିଜୟ ଭେଟି ଦେଇପାରିନଥିଲେ ।